އިންޑިއާގެ އިންވެސްޓަރުނަށް އަޅުގަނޑުމެން މަރުޙަބާ ކިޔަން- ރައީސް

ދިވެހިރާއްޖެއާއި ގުޅިގެން މަސައްކަތް ކުރެއްވުމަށް، ދަޢުވަތު އަރުއްވާ ކަމަށާއި، އިންޑިއާގެ އިންވެސްޓަރުނަށް މަރުހަބާ ކިޔާކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ. 

ރައީސް މިހެން ވިދާޅުވީ އިންޑިއާ މޯލްޑީވްސް ބިޒްނަސް ފޯރަމްގައި ތަޤުރީރު ކުރައްވަމުންނެވެ. ރައީސް ވިދާޅުވީ، އިޤްތިޞާދު ކުރިއެރުވުމުގައި އަމިއްލަ އިންވެސްޓްމަންޓްތައްވެސް މުހިންމު ދައުރެއް އަދާކުރާކަމަށާއި، އިޤްތިޞާދީ އުފެއްދުންތެރިކަން އިތުރުކުރުމާއި، ދެމެހެއްޓެނިވި އިޤްތިޞާދީ ކުރިއެރުމަށް އަމިއްލަ ވިޔަފާރިތަކުގެ އެހީތެރިކަން ކޮންމެހެންވެސް ބޭނުންވާކަމަށެވެ. އެއާއެކު ރާއްޖޭގެ ޢަމާޒުހުރީ ޑިޖިޓަލް އިޤްތިޞާދަކާ ދިމާލަށްކަމަށާއި، މިދާއިރާގައި އިންވެސްޓްކުރުމަށް ރާއްޖެއަކީ ފަހި މާހައުލެއް އޮތްތަނެއްކަން ފާހަގަ ކުރައްވަމުން ރައީސް ވިދާޅުވީ ޑިޖިޓަލް އިޤްތިޞާދެއް ގެނައުމަށް ކުރެވޭ މަސައްކަތުގައި އިންޑިއާގެ އެއްބާރުލުން ލިބޭނެކަމަށް އުންމީދުކުރައްވާކަމަށެވެ.

މި ފޯރަމްގައި ރައީސުލްޖުމްހޫރިއްޔާ ކުރެއްވި ތަޤުރީރުގައި ދެ ޤައުމުގެ ދެމެދުގައިވާ ގުޅުމާއި ކުރިއަށް އޮތްތަނުގައި ގުޅުން ބަދަހިކުރުމަށް ހުރި ފުރުޞަތުތަކުގެ މައްޗަށް އަލިއަޅުއްވާލައްވާފައި ވެއެވެ. ރައީސް ވިދާޅުވީ ފަތުރުވެރިކަމުގެ އިތުރުން، މާލީ ޚިދުމަތްތަކާއި، މެރިޓައިމް ސިނާޢަތާއި، ޑިޖިޓަލް އިޤްތިޞާދު ފަދަ ދާއިރާތައް ހިމެނޭ ގޮތަށް އިޤްތިޞާދު ސިންދަފާތުކުރުމަކީ އެމަނިކުފާނުގެ އެޖެންޑާއެއް ކަމުގައެވެ.އެގޮތުން ރާއްޖޭގެ މަދަނިއްޔަތަށް އެދެވޭ ބަދަލެއް ގެނައުމުގެ މަޤްޞަދުގައި ތަރައްޤީކުރާ އިކޯ ސިޓީ، ރަސްމާލެއަކީވެސް މި އެޖެންޑާގައި ހިމަނޭ މަސައްކަތެއްކަން ފާހަގަ ކުރެއްވިއެވެ.

ރައީސްގެ ވާހަކަފުޅުގައި، މިހާރު ފައްޓަވާފައިވާ އިޤްތިޞާދީ އިސްލާޙީ މަސައްކަތްތަކަށްވެސް އަލިއަޅުއްވާލައްވާފައެވެ. އޭގެ ތެރޭގައި އައު ފޮރިން އިންވެސްޓްމަންޓް ޤާނޫނާއި، 2025 ވަނަ އަހަރު އިފްތިތާޙުކުރުމަށް ހަމަޖެހިފައިވާ މޯލްޑިވްސް އިންޓަރނޭޝަނަލް ފައިނޭންޝަލް ސެންޓަރުގެ މަސައްކަތް ހިމެނެއެވެ. އަދި ރާއްޖޭގެ ފުރަތަމަ ޑިވެލޮޕްމަންޓް ބޭންކްގެ މަސައްކަތްވެސް ވަރަށް އަވަހަށް ފެށޭނެކަން އެމަނިކުފާނު އިޢުލާންކުރެއްވިއެވެ.

2030 ވަނަ އަހަރު އަންނަން ވާއިރަށް، ރާއްޖޭގެ އުފެއްދުންތެރިކަމުގެ 15 އިންސައްތަ ހިއްސާކުރާނީ ޑިޖިޓަލް އިޤްތިޞާދުންކަމުގައި ހެއްދެވުމަށްޓަކައި، ޑިޖިޓަލް ދާއިރާ ކުރިއަރައިދިއުން މުހިންމުކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި ރާއްޖޭގައި "ރުޕޭ" ކާޑު ބޭނުންކުރެވެން ފެށުމާއެކު، އިންޑިއާ އާއި ރާއްޖެއާ ދެމެދު މާލީ މުއާމަލާތްތައް ކުރުން އިތުރަށް ލުއިފަސޭހަ ވެގެންދާނޭކަމަށްވެސް އެމަނިކުފާނު ވިދާޅުވިއެވެ.

ރައީސް އިންޑިއާއަށް ކުރައްވާ ރަސްމީ ދަތުރުފުޅުގައި ދެޤައުމުގެ ގުޅުން ވަރުގަދަކޮށް ރާއްޖޭގެ އިޤްތިޞާދު ވަރުގަދަކުރުމަށް ގިނަ މަސައްކަތްތަކެއް ދަނީ ކުރައްވަމުންނެވެ.