ރައީސްގެ ދެކަނބަލުން ބެންގަލޫރުގައި، ދިވެހިންނާ ބައްދަލުކުރައްވާ ބިޒްނަސް ފޯރަމްގައި ބައިވެރިވެ ވަޑައިގަންނަވާނެ!

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު އިންޑިއާއަށް ކުރައްވާ ފުރަމާނަ ދަތުރުފުޅުގައި ބެންގަލޫރަށް ވަޑައިގެންފިއެވެ.

 ރައީސުލްޖުމްހޫރިއްޔާގެ ދެކަނބަލުން ބެންގަލޫރަށް ވަޑައިގަތުމުން  އެއަރޕޯޓުން ވަނީ ހޫނު މަރުހަބާއެއް ދަންނަވާފައެވެ.

ރައީސުލްޖުމްހޫރިއްޔާގެ ބެންގަލޫރަށް ކުރައްވާ ދަތުރުފުޅުގެ ތެރެއިން އިންޑިއާ މޯލްޑިވްސް ބިޒްނަސް ފޯރަމްގައި ބައިވެރިވެވަޑައިގަތުމަށް ވަނީ ހަމަޖެހިފައެވެ. ބެންގަލޫރުގައި ބާއްވާ ބިޒްނަސް ފޯރަމަކީ މި ދަތުރުފުޅުގައި ކުރިއަށްގެންދަވާ ތިންވަނަ ފޯރަމެވެ. މީގެކުރިން މި ފޯރަމް ވަނީ ނިއުދިއްލީ އަދި މުމްބާއީގައިވެސް ބާއްވާފައެވެ.

އިންޑިއާގައި ކުރިއަށްދާ މި ފޯރަމް ތަކަކީ ރާއްޖެއަށް މުހިންމު  ފޯރަމްތަކެކެވެ. މި ފޯރަމްތަކުގައި ރައީސުލްޖުމްހޫރިއްޔާ ގެންދަވަނީ ރާއްޖޭގައި ހުރި ވިޔަފާރިއާއި އިންވެސްޓްމަންޓްގެ ފުރުޞަތުތައް ހާމަކޮށްދެއްވަމުންނެވެ. އަދި ވިޔަފާރިތަކުގެ ވެރިންނާއި، އިންވެސްޓަރުންނަށް ފޯރަމްތަކުގައި ބައިވެރިވެވަޑައިގެން ރާއްޖޭގައި އިންވެސްޓްކުރުމަށް ދަޢުވަތު ދެއްވާފައިވެއެވެ.

ރައީސުލްޖުމްހޫރިއްޔާގެ މި ދަތުރުފުޅުގައި ބެންގަލޫރުގައި މިރޭ ދިވެހިންނާ ބައްދަލުކުރައްވާނެއެވެ. މި ސިޓީއަކީ ގިނަ ޢަދަދެއްގެ ދިވެހިން ދިރިއުޅޭ އަދި ބޭސްފަރުވާ އަށާއި ވިޔަފާރި ކުރުމަށް ގޮސްއުޅޭ ސިޓީއެކެވެ. ރައީސުލްޖުމްހޫރިއްޔާ ރާއްޖޭން ބޭރަށް ކުރައްވާ ދަތުރުފުޅު ތަކުގައި އެ ޤައުމު ތަކުގައި ދިރިއުޅޭ ދިވެހިންނާ ބައްދަލުކުރެއްވުމަށް ޚާއްޞަ އިސްކަމެއް ދެއްވައެވެ.