ޚަބަރު
ހަނިމާދޫ އެއާރޕޯޓުން ހިފެހެއްޓި 200އަށް ވުރެ ގިނަ ބަނގުރާ ފުޅި ނައްތާލައިފި
ހަނމާދޫ ޕޮލިސް ސްޓޭޝަންގެ ބެލުމުގެ ދަށުގައި ހުރި ބަނގުރާ ނައްތާލުން، ފޮޓޯ: ޕޮލިސް
ހަނިމާދޫ އިންޓަނޭޝަލް އެއާރޕޯޓުން ހިފެހެއްޓި 200އަށް ވުރެ ގިނަ ބަނގުރާ ފުޅި ހދ. ހަނިމާދޫ ޕޮލިސް ސްޓޭޝަނުން ނައްތާލައިފިއެވެ.
ދިބެހި ފުލުހުންގެ ޚިދުމަތުން ހާމަކޮށްފައިވާ ގޮތުގައި، ހަނިމާދޫ ޕޮލިސް ސްޓޭޝަނުން ނައްތާލި ތަކެތީގެ ތެރޭގައި ހިމެނެނީ 215 ބަނގުރާ ފުޅި އާއި 4 ދަޅު ބަނގުރަލެވެ. އަދި މިއީ އޭވިއޭޝަން ސެކިއރިޓީ ކޮމާންޑުން ޕޮލިހާ ހަވާލުކުރި ތަކެތި ކަމުގައި ވެސް ހާމަކޮށްފައިވެއެވެ.
އޭވިއޭޝަން ސެކިއުރިޓީއިން މި ތަކެތި ހިފަހައްޓާފައި ވަނީ ފުރަން ދިޔަ ފަތުރުވެރިންގެ އަތުންނެވެ. އަދި މިއީ މިދިޔަ އަހަރުގެ ޑިސެންބަރު މަހުގެ 14 ވަނަ ދުވަހުން ފެށިގެން ހިފަހައްޓާފައިވާ ތަކެތިކަމަށް ވެސް ހާމަކޮށްފައިވެއެވެ.
ހަނިމާދޫ ޕޮލިސް ސްޓޭޝަނުގެ ބެލުމުގެދަށުގައި ހުރި ބަނގުރާ ނައްތާލައިފިhttps://t.co/SceuuNcQ2H pic.twitter.com/BvGVi27X76
— Maldives Police (@PoliceMv) May 18, 2025
ބަނގުރާ ނައްތާލުމުގައި ފުލުހުން ޢަމަލުކުރަނީ އެކަމަށް ކަނޑައަޅާފައިވާ ވަކި އުސޫލެއްގެ ދަށުންނެވެ. އެގޮތުން، މިކަން ކުރެވެނީ ފުލުހުންގެ ބެލުމުގެ ދަށަށް ގެނެވޭ ބަނގުރަލާއި ބަނގުރަލުގެ މައްސަލަތަކާ ގުޅިގެން ހިފެހެއްޓޭ ތަކެތި ނައްތާލުމުގައި އަމަލުކުރާނެ ގޮތުގެ ގަވާއިދުގެ ދަށުން އެކަމަށްޓަކައި އެކުލަވައިލި ކޮމިޓީގެ ބެލުމުގެ ދަށުންނެވެ.
ރާއްޖޭގައި ބަނގުރާ ގެންގުޅެވޭނީ ކަނޑައެޅިފައިވާ ޤަވާއިދާ އެއްގޮތަށް، ހުއްދަ ހޯދައިގެން، ކަނޑައެޅިފައިވާ ވަކިތަންތަނެއްގައެވެ. އެ ނޫން ގޮތަކަށް ރާއްޖޭގައި ބަނގުރާ ގެންގުޅުމަކީ ޤާނޫނީ ކުށެކެވެ.
