ނިކަރާގުއާއިން އިސްރާއީލާއެކު އޮތް ޑިޕްލޮމެޓިކް ގުޅުން ނިމުމަކަށް ގެނެސްފި

ނިކަރާގުއާ ސަރުކާރުން ވަނީ އިސްރާއީލާއެކު އޮތް ޑިޕްލޮމެޓިކް ގުޅުން ރަސްމީކޮށް ކަނޑާލާފައެވެ. މި ފިޔަވަޅަކީ ޣައްޒާގައި ހިނގަމުންދާ ހަނގުރާމައާ ގުޅިގެން އަޅާފައިވާ ރަމްޒީ ފިޔަވަޅެކެވެ. އޮރްޓެގާގެ ސަރުކާރުން ވަނީ އިސްރާއީލުގެ ވެރިންނަށް "ފެޝިސްޓުން" އަދި "ނަސްލު ނައްތާލާ ބަޔަކު"ކަމުގެ ސިފަ ދީ، އެފަރާތްތައް ހަރުކަށި އިބާރާތުން ކުށްވެރިކޮށްފައެވެ.

 ނިކަރާގުއާގެ ނައިބު ރައީސް ރޮޒާރިއޯ މުރިލޯ މި ނިންމުން އިޢުލާންކުރެއްވީ، ޣައްޒާ ހަނގުރާމަ ފެށުނުތާ އެއް އަހަރު ފުރުމާ ގުޅިގެން ނިކަރާގުއާގެ ކޮންގްރެސްއިން ފާސްކުރި ގަރާރަކާ އެކުގައެވެ. މުރިލޯ ވިދާޅުވި ގޮތުގައި، ރައީސް ޑޭނިއަލް އޮރްޓެގާ ވަނީ "އިސްރާއީލުގެ ފެޝިސްޓް އަދި ނަސްލު ނައްތާލުމުގެ ސަރުކާރާއެކު ޑިޕްލޮމެޓިކް ގުޅުން ކަނޑާލުމަށް" އަންގަވާފައެވެ.

 މި ނިންމުމަކީ މައިގަނޑު ގޮތެއްގައި ރަމްޒީ ފިޔަވަޅެއް ކަމުގައި ބެލެވެއެވެ. ސަބަބަކީ ނިކަރާގުއާގެ ވެރިރަށް މަނާގުއާގައި އިސްރާއީލުގެ ރެޒިޑެންޓް އެމްބަސެޑަރެއް ނެތުމާއި، ދެ ޤައުމުގެ ދެމެދުގައި މާބޮޑު ގުޅުމެއް ނެތުމެވެ. އެހެންނަމަވެސް، މި ނިންމުން އިޢުލާންކޮށްފައިވަނީ ޣައްޒާގައި ހިންގަމުންދާ އަނިޔާވެރި ޢަމަލުތަކާއި، ލުބުނާން ހިމެނޭގޮތަށް މެދުއިރުމަތީގައި ހަނގުރާމައިގެ އަމަލުތައް ފުޅާވަމުންދާ ދަނޑިވަޅެއްގައެވެ.