ކެޔޮޅުންގެ އެވޯޑާއި ޚިދުމަތްތެރި ފަރުމަސްވެރިޔާގެ އެވޯޑަށް އެދި ކުރިމަތިލާނީ ކިހިނެއް؟

މަސްވެރިކަމާއި ކަނޑުގެ ވަސީލަތްތަކާބެހޭ ވުޒާރާއިން ވަނީ ކެޔޮޅުންގެ އެވޯޑާއި ޚިދުމަތްތެރި ފަރުމަސްވެރިޔާގެ އެވޯޑަށް ކުރިމަތިލުމުގެ ފުރުޞަތު ހުޅުވާލައިފައެވެ. މިނިސްޓްރީގެ މަޢުލޫމާތު ދެއްވާފައިވާ ގޮތުގައި، މި އެވޯޑުތަކަށް ކުރިމަތިލުމުގެ ސުންގަޑިއަކީ 2024 ވަނަ އަހަރުގެ ނޮވެމްބަރު މަހުގެ 7 ވަނަ ދުވަހެވެ. އެވޯޑަށް ކުރިމަތިލާ ފޯމު މިނިސްޓްރީގެ ވެބްސައިޓުން ޑައުންލޯޑްކުރެވެން ހުންނާނެއެވެ.

 މި އެވޯޑުތަކަށް ކުރިމަތިލެވޭނީ އާމްދަނީ ހޯދުމަށް ކުރާ މައިގަނޑު މަސައްކަތަކީ މަސްވެރިކަން ކަމުގައިވާ ފަރާތްތަކަށާއި، މަސްވެރިކަންކުރާ އުޅަނދެއްގައި ކެޔޮޅެއްގެ ދައުރު އަދާކޮށްފައިވާ ފަރާތްތަކަށެވެ. މިނިސްޓްރީން އިތުރަށް ބަޔާންކޮށްފައިވާ ގޮތުގައި:

- އެންމެ ޚިދުމަތްތެރި ޒުވާން ކެޔޮޅު އެވޯޑަށް ކުރިމަތިލެވޭނީ 35 އަހަރުން ދަށުގެ ފަރާތްތަކަށެވެ.

- އެންމެ ޚިދުމަތްތެރި ތަޖުރިބާކާރު ކެޔޮޅު އެވޯޑަށް ކުރިމަތިލެވޭނީ 35 އަހަރުން މަތީގެ ފަރާތްތަކަށެވެ.

 މި އެވޯޑުތަކަށް އެދި ހުށަހަޅާ ފޯމު ފޮނުވާނީ މިނިސްޓްރީގެ އީމެއިލް އެޑްރެސް [email protected] އަށެވެ. ފޯމާއެކު ހުށަހަޅަންޖެހޭ ލިޔެކިޔުންތަކުގެ ތެރޭގައި އައިޑީ ކާޑުގެ ކޮޕީއާއި، ތަޢުލީމީ އަދި މަސްވެރިކަމުގެ ރޮނގުން ލިބިފައިވާ ސަނަދުތަކުގެ ކޮޕީ ހިމެނެއެވެ.

 މި އެވޯޑުތަކަށް އެދި އަމިއްލަ ހައިސިއްޔަތުން ނުވަތަ އެހެން ފަރާތަކުން ވެސް ނަން ހުށަހެޅިދާނެއެވެ. އިތުރު މަޢުލޫމާތު ބޭނުންވާ ފަރާތްތަކަށް މިނިސްޓްރީގެ ނަންބަރު 3339229 އަށް ގުޅައިގެން މަޢުލޫމާތު ސާފުކުރެވޭނެއެވެ.

 މި އެވޯޑުތަކަކީ ރާއްޖޭގެ މަސްވެރިކަމުގެ ދާއިރާގައި މަސައްކަތްކުރާ ފަރާތްތަކުގެ ހިތްވަރާއި ހުނަރު ވަޒަންކޮށް، އެފަރާތްތަކުގެ މަސައްކަތަށް ހިތްވަރު ދިނުމަށް ދެވޭ އެވޯޑުތަކެކެވެ.