ސަހާރާ ޑެޒަރޓްގައި 50 އަހަރަށްފަހު ފެންބޮޑުވުން

މޮރޮކޯގެ ދެކުނު-އިރުމަތީ ސަރަޙައްދުގައި ހިމެނޭ ސަހާރާ ޞަޙަރާގައި 50 އަހަރުގެ މުއްދަތަށްފަހު ފުރަތަމަ ފަހަރަށް ފެންބޮޑު ވެއެއްޖެއެވެ. ފެންބޮޑުވެފައިވަނީ  އާދަޔާ ޚިލާފަށް ވާރޭވެހުމާއި ގުޅިގެންނެވެ.

މޮރޮކޯގެ މޫސުމާބެހޭ އިދާރާއިން ފޯރުކޮށްދީފައިވާ މަޢުލޫމާތުގެ އަލީގައި އެސޯސިއޭޓެޑް ޕްރެސް (އޭޕީ) އިން ހާމަކުރާ ގޮތުގައި، ރަބާތުގެ ދެކުނުން 450 ކިލޯމީޓަރު ދުރުގައިވާ ޓަގޫނިޓޭ އަށް ސެޕްޓެމްބަރު މަހު އެންމެ 24 ގަޑިއިރުގެ ތެރޭގައި 100 މިލިމީޓަރަށްވުރެ ގިނަ ވާރޭވެހިފައިވެއެވެ. މިއީ މި ސަރަޙައްދަށް ނިިސްބަތްވާ ގޮތުން ވަރަށް މަތީ މިންވަރެކެވެ.

މެޓް އެޖެންސީގެ ރިޕޯޓުގައި ފާހަގަކޮށްފައިވާ ގޮތުގައި، ސެޕްޓެމްބަރު  މަހުގެ އެންމެ ދެ ދުވަހެއްގެ ތެރޭގައި ވިއްސާރަވެފައިވަނީ ގިނަ ހިކި ސަރަޙައްދުތައް ހިމެނޭގޮތަށް އަހަރަކަށް އެވްރެޖްކޮށް ވެހޭ 250 މިލިމީޓަރަށްވުރެ އިތުރަށެވެ. މިއީ މި ސަރަޙައްދަށް ނިސްބަތްވާ ގޮތުން ވަރަށް އިސްތިސްނާ ޙާލަތެކެވެ.

ނާސާއިން ނަގާފައިވާ  މަންޒަރުތަކުން ދައްކާ ގޮތުގައި، މި ވާރޭގެ ސަބަބުން ޒަގޯރާ އާއި ޓާޓާއާ ދެމެދުގައި އޮންނަ ހިކިފައިވާ  ލޭކް އިރިކީ އަލުން ފެނުން ފުރިފައިވެއެވެ. މިއީ ފަންސާސް އަހަރަށްފަހު މި ކޯރު ފެނުން ފުރުނު ފުރަތަމަ ފަހަރެވެ.

މި ހާދިސާއިން ހާމަވަނީ މޫސުމަށް އަންނަމުންދާ ބަދަލުތަކާއި، އޭގެ ސަބަބުން ދުނިޔޭގެ އެންމެ ހިކި ސަރަޙައްދުތަކަށް ވެސް ކުރިމަތިވާ އަސަރުތަކެވެ. މިފަދަ ނާދިރު ހާދިސާތަކުން ތިމާވެށްޓަށާއި އެ ސަރަޙައްދުގެ ދިރުންތަކަށް ކުރާނެ އަސަރުތައް ދިރާސާކުރުމަކީ ނުހަނު މުހިންމު ކަމެކެވެ.