ދުނިޔެ
ޖަޕާނުގެ އެޓޮމިކް ބޮމުން ސަލާމަތްވި ފަރާތްތަކުގެ ޖަމްޢިއްޔާއަށް 2024 ވަނަ އަހަރުގެ ނޮބެލް ސުލްޙަވެރިކަމުގެ އިނާމު
ނިހޮން ހިދަންކިޔޯ ޖަމްޢިއްޔާގެ އެއް ރައީސް ކަމުގައިވާ ތޯޝިޔުކި މިމަކި.
ނޯވޭގެ ނޮބެލް ކޮމިޓީން 2024 ވަނަ އަހަރުގެ ނޮބެލް ސުލްޙަވެރިކަމުގެ އިނާމު ޖަޕާނުގެ "ނިހޮން ހިދަންކިޔޯ" ޖަމްޢިއްޔާއަށް ދިނުމަށް ނިންމައިފިއެވެ. މި ޖަމްޢިއްޔާއަކީ ހިރޯޝިމާ އަދި ނާގަސާކީގައި އެޓޮމިކް ބޮމުން ސަލާމަތްވި ފަރާތްތަކުން އުފައްދާފައިވާ، "ހިބަކުޝާ" ގެ ނަމުންވެސް މަޝްހޫރު ޖަމްޢިއްޔާއެކެވެ.
ނިހޮން ހިދަންކިޔޯއަށް މި ޝަރަފުވެރި އިނާމު ލިބިފައިވަނީ ނިއުކްލިއަރ ހަތިޔާރުން އެއްކިބާވެފައިވާ ދުނިޔެއެއް ޤާއިމުކުރުމަށް ކުރަމުންދާ މުހިންމު މަސައްކަތްތަކަށާއި، ނިއުކްލިއަރ ހަތިޔާރުގެ ބޭނުން ފުރަގަސް ދިނުމުގެ މުހިންމުކަން ހެކިންގެ ބަޔާންތަކުގެ އަލީގައި ދައްކުވައިދީފައިވާތީއެވެ.
މި އިނާމު ލިބުމާ ގުޅިގެން ނިހޮން ހިދަންކިޔޯގެ ފަރާތުން ރަސްމީ ބަޔާނެއް އަދި ނެރެފައި ނުވިނަމަވެސް، މި އިނާމަކީ އެޓޮމިކް ހަތިޔާރުގެ ނުރައްކާތެރިކަމާ ދެކޮޅަށް ކުރަމުންދާ މަސައްކަތްތަކަށް ލިބުނު މުހިންމު ހިތްވަރެއްގެ ގޮތުގައި ބެލެވެއެވެ.
ނޮބެލް ސުލްޙަވެރިކަމުގެ އިނާމަކީ އަހަރަކު އެއްފަހަރު، ދުނިޔޭގެ ސުލްޙަ އަދި އަމާންކަމަށް އެންމެ ފާހަގަކޮށްލެވޭ ހިއްސާއެއް ކޮށްފައިވާ ފަރާތްތަކަށް ދެވޭ ޝަރަފުވެރި އިނާމެކެވެ. މި އިނާމު ދިނުމުގެ ރަސްމިއްޔާތު އާންމު ގޮތެއްގައި ބާއްވަނީ ކޮންމެ އަހަރެއްގެ ޑިސެމްބަރު މަހުގެ 10 ވަނަ ދުވަހު ނޯވޭގެ ވެރިރަށް އޮސްލޯގައެވެ.