ސިނަމާލެ ބްރިޖު މޮނިއުމަންޓް ޕާކު ރަސްމީކޮށް ހުޅުވައިފި

ސިނަމާލެ  ބްރިޖު މޮނިއުމަންޓް ޕާކު  ރަސްމީކޮށް ހުޅުވައިފިއެވެ. މި ޕާކު ހުޅުވުމުގެ ރަސްމިއްޔާތު ޝަރަފުވެރިކޮށްދެއްވީ ޗައިނާގެ ސަފީރު އެކްސަލަންސީ ވަންގ ލިޝިން އާއި އިންފްރާސްޓްރަކްޗަރ މިނިސްޓަރ ޑރ. ޢަބްދުﷲ މުއްޠަލިބު އެވެ. ސިނަމާލެ ބްރިޖުގެ މަޝްރޫޢަކީ ރާއްޖޭގައި ހިންގުނު އެންމެ ބޮޑު އުމްރާނީ ތަރައްޤީގެ މަޝްރޫޢުއެވެ.

މީގެ އިތުރުން ހުޅުވުމުގެ ރަސްމިއްޔާތު އިތުރަށް ފުރިހަމަކޮށްދިނުމަށް ގިނައަދަދެއްގެ ކުޑަކުދިން ވަނީ ރަސްމިއްޔާތުގައި ބައިވެރިވެފައެވެ. 

މި ޕާކަކީ ދިވެހިރާއްޖެއާއި ޗައިނާއާ ދެމެދު އޮތް  އެކުވެރިކަމުގެ ނިޝާނެއްގެ ގޮތުގައި ބިނާކުރެވުނު ޗައިނާ-މޯލްޑިވްސް ފްރެންޑްޝިޕް ބްރިޖުގެ ހަނދާނީ ޕާކެކެވެ. މި ބްރިޖަކީ އިޖުޖުތިމާޢީ އަދި އިޤްތިޞާދީ ކުރިއެރުމަށް މަގުފަހިކޮށްދީ، އެކި ސަރަޙައްދުތައް ގުޅުވާލުމުގައި މުހިންމު ދައުރެއް އަދާކުރާ ތަރައްޤީގެ މަޝްރޫޢެކެވެ.

މި ޕާކު ހުޅުވުމާ ގުޅިގެން ވާހަކަފުޅު ދައްކަވަމުން މިނިސްޓަރ ޑރ. މުއްޠަލިބު ވިދާޅުވީ، "މި ޕާކަކީ ދެ ޤައުމުގެ ދެމެދުގައި އޮތް  ރަޙްމަތްތެރިކަމުގެ ބަދަހި ގުޅުމުގެ ނިޝާނެއް" ކަމަށެވެ. އަދި ޗައިނާގެ ސަފީރު އެކްސަލަންސީ ވަންގ ލިޝިން ފާހަގަކުރެއްވީ މި ޕާކަކީ "ދެ ޤައުމުގެ އެކުވެރިކަން އިތުރަށް ފުޅާވެގެންދާނެ ތަނެއް" ކަމުގައެވެ.

ބްރިޖު މޮނިއުމަންޓް ޕާކުގައި ބްރިޖުގެ މަސައްކަތްކުރި ދުވަސްވަރުގެ ފޮޓޯތަކާއި ބްރިޖުގެ މަޢުލޫމާތު ހިމެނޭ ފޮޓޯތައް އާންމުންނަށް ފެންނާނެހެން ބަހައްޓާފައިވާއިރު، އާއިލާތަކަށް އެ ތަނުގައި މަޑުކޮށްލައިގެން ތިބެވޭނެ އިންތިޒާމު ވެސް ހަމަޖައްސާފައިވެއެވެ.

ސިނަމާލެ ބްރިޖަކީ ދިވެހިރާއްޖެއާއި ޗައިނާގެ މެދުގައި އޮތް އެކުވެރިކަމުގެ މުހިންމު ނިޝާނެކެވެ. މާލެއާއި ހުޅުމާލެ ގުޅުވާލުމަށް ޓަކައި ޗައިނާ ސަރުކާރުގެ ފާހަގަކޮށްލެވޭ އެހީތެރިކަމާއެކު ނިންމާލެވުނު މި މަޝްރޫޢަށް ޖުމްލަ 200 މިލިއަން އެމެރިކާ ޑޮލަރު ހޭދަވެފައިވެއެވެ.

މި މަޝްރޫޢުގެ ފައިނޭންސިންގ ތަފްޞީލަށް ބަލާއިރު:
- ޗައިނާ ސަރުކާރުގެ ހިލޭ އެހީގެ ގޮތުގައި: 116 މިލިއަން އެމެރިކާ ޑޮލަރު
- ޗައިނާ ސަރުކާރުގެ ލޯނުގެ ގޮތުގައި: 72 މިލިއަން އެމެރިކާ ޑޮލަރު
- ދިވެހި ސަރުކާރުގެ ޙިއްޞާގެ ގޮތުގައި: 12 މިލިއަން އެމެރިކާ ޑޮލަރު

މީގެއިތުރުން ސިނަމާލެ ބްރިޖު މޮނިއުމަންޓް ޕާކު ތަރައްޤީކުރުމުގެ ޚަރަދު ކޮށްފައިވަނީ ބްރިޖު އިމާރާތްކުރި ކުންފުނީގެ ހަރަދުގައެވެ.
އަދި ބްރިޖުގެ މަރާމާތާއި ބެލެހެއްޓުމުގެ މަސައްކަތްތައް ކުރިއަށްދަނީ ޗައިނާ ސަރުކާރުގެ އެހީތެރިކަމާއެކުގައިކަން ފާހަގަ ކޮށްލަންޖެހެއެވެ.