ސްރީލަންކާއަށް ހަމަލާއެއް ދޭންއުޅޭ ކަމުގެ މަޢުލޫމާތުލިބި އެ ސަރަޙައްދަށް ދަތުރުކުރުން އެމެރިކާގެ އެމްބަސީން މަނާކޮށްފި

ސްރީލަންކާގެ އަރުގަމް ބޭ ސަރަޙައްދުގައި ރައްކާތެރިކަމަށް ނުރައްކާވެދާނެކަމުގެ އިތުބާރުހުރި މަޢުލޫމާތު ލިބިފައިވާކަމަށް ބުނެ، އެމެރިކާގެ އެމްބަސީން އެ ސަރަޙައްދަށް ދަތުރުކުރުމާމެދު ސަމާލުވުމަށް އިރުޝާދު ދީފިއެވެ.

ކޮލަމްބޯގައި ހުންނަ އެމެރިކާގެ އެމްބަސީން ނެރުނު ދަތުރުފަތުރުގެ އިންޒާރުގައި ބަޔާންކޮށްފައިވަނީ، އަރުގަމް ބޭ ސަރަޙައްދުގެ މަޝްހޫރު ފަތުރުވެރިކަމުގެ ތަންތަނަށް އަމާޒުކޮށް ނުރައްކާތެރި ހަމަލާއެއް ދީފާނެކަން އިތުބާރުހުރި ފަރާތަކުން މަޢުލޫމާތު ލިބިފައިވާ ކަމަށެވެ. މި ކަމާ ގުޅިގެން، އެމްބަސީގެ މުވައްޒަފުންނަށް އަރުގަމް ބޭއަށް ދަތުރުކުރުން ވަގުތީގޮތުން މަނާކޮށްފައިވާ ކަމަށްވެސް އެމްބަސީން ހާމަކޮށްފައިވެއެވެ.

އެމެރިކާގެ ރައްޔިތުންނަށް އަރުގަމް ބޭ ސަރަޙައްދަށް ދަތުރުކުރުމުން ދުރުހެލިވުމަށް ބާރުއަޅާފައިވާއިރު، އަޅަންވީ ރައްކާތެރިކަމުގެ ފިޔަވަޅުތަކުގެ ތެރޭގައި ޝައްކުކުރެވޭ ހަރަކާތްތަކާއި ކުއްލި ހާދިސާތައް ފުލުހުންނަށް ރިޕޯޓުކުރުމަށާއި، އަބަދުވެސް ވިސްނުންތެރިކަމާއެކު މާޙައުލަށް ސަމާލުވުމަށް އެމްބަސީން އިރުޝާދު ދީފައިވެއެވެ.

މީގެ އިތުރުން، މުވާސަލާތީ ވަސީލަތެއް އަބަދުވެސް އަތުގައި ބެހެއްޓުމަށާއި، އަދި އެންމެ ފަހުގެ ޚަބަރާއި އަޕްޑޭޓްތަކަށް ސަމާލުވުމަށްވެސް އެމްބަސީން އިރުޝާދު ދީފައިވެއެވެ.

މި އިންޒާރާ ގުޅިގެން ސްރީލަންކާގެ ސަލާމަތީ ބާރުތަކުން މިހާތަނަށް އެއްވެސް ބަޔާނެއް ނެރެފައެއް ނުވެއެވެ. ނަމަވެސް، މި ކަމަކީ އެ ޤައުމުގެ ފަތުރުވެރިކަމުގެ ސިނާޢަތަށް އަސަރުކޮށްފާނެ ކަމެއްކަމަށް ލަފާކުރެވެއެވެ.