ސްޓެލްކޯއިން އަންހެނުންނަށް ޚާއްޞަކޮށްގެން އިލެކްޓްރީޝަން ކޯހެއް ހިންގަނީ

ކަރަންޓުގެ ދާއިރާއަށް އަންހެނުން ޝައުޤުވެރިކުރުވައި، އެ ދާއިރާގައި ފިރިހެނުންނާ އެއް ހަމައެއްގައި މަސައްކަތްކުރުމުގެ ފުރުސަތު ފަހިކޮށްދިނުމަށްޓަކައި ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން "ބިގިނަރސް އިލެކްޓްރީޝަން ކޯސް ފޯރ ވިމެން" ގެ ނަމުގައި ޚާއްޞަ ކޯހެއް ހިންގުމަށް ތައްޔާރުވަމުންދާ ކަމަށް އެ ކުންފުނިން މިއަދު ހާމަކޮށްފިއެވެ.

މި ކޯހުގައި ހިލޭ ބައިވެރިވުމުގެ ފުރުސަތު މިހާރު ވަނީ ހުޅުވާލާފައެވެ. ކޯހުގައި ރައްކާތެރި ގޮތުގައި ކަރަންޓު ބޭނުންކުރުމާއި، ކަރަންޓަށް ކުރާ ޚަރަދު ކުޑަކުރުމުގެ އިތުރުން، ކަރަންޓު ވަޔަރުކުރުމުގެ އަސާސީ މަޢުލޫމާތު ކިޔަވައިދިނުމަށް ވަނީ ހަމަޖެހިފައެވެ.

ސްޓެލްކޯއިން ބުނީ މި ކޯސް ކުރިއަށް ގެންދަން ހަމަޖެހިފައިވަނީ މާލޭގައި ކަމަށާއި، ކޯހުގެ މުއްދަތަކީ 4 ދުވަސް ކަމަށެވެ. އަދި ކޮންމެ ދުވަހަކު 3 ގަޑިއިރު ކިޔަވައިދޭނެ ކަމަށްވެސް އެ ކުންފުނިން ހާމަކުރެއެވެ.

ކޯހުގައި ބައިވެރިވުމުގެ ސުންގަޑިއަކީ 4 ނޮވެމްބަރ 2024 ވާ ހޯމަ ދުވަހުގެ 15:00 ގެ ކުރިން ކަމަށް ސްޓެލްކޯއިން ވަނީ އާންމުކޮށްފައެވެ. ކޯހުގައި ބައިވެރިވުމަށް ކިއުއާރު ކޯޑް ސްކޭންކުރުމުން ބައިވެރިވެވޭނެ ކަމަށާއި، އިތުރު މަޢުލޫމާތު ހޯދުމަށް 3338244 ނުވަތަ 3338236 އަށް ގުޅުމަށް ނުވަތަ [email protected] އަށް އީމެއިލް ކުރުމަށް ސްޓެލްކޯއިން ވަނީ ބުނެފައެވެ.

މި ކޯހަކީ އަންހެނުން އިލެކްޓްރިކަލް ދާއިރާއަށް އަހުލުވެރިކުރުވައި، އެ ދާއިރާގައި އަންހެނުންނަށްވެސް ވަޒީފާގެ ފުރުސަތުތައް އިތުރުކުރުމަށް އަމާޒުކޮށްގެން ހިންގާ ކޯހެއް ކަމަށް ސްޓެލްކޯއިން ބުންޏެވެ.