ސައިކްލޯން ޑާނާ އިންޑިޔާގެ އިރުމަތީ ސަރަޙައްދަށް އެރުމާއެކު ގިނަ ގެއްލުންތަކެއް

އިންޑިޔާގެ އިރުމަތީ ސަރަޙައްދަށް ހުކުރު ދުވަހު އެރި ސައިކްލޯން ޑާނާގެ ސަބަބުން ގޭގޭގެ ފުރާޅުތައް އަރައިގެން ގޮސް، ގަސްތަކާއި ކަރަންޓު ވިއުގަ ވަނީ ބިންމައްޗަށް ވައްޓާލާފައެވެ. ނަމަވެސް މިހާތަނަށް ބަލާއިރު މި ސައިކްލޯންގެ ސަބަބުން މާބޮޑު ގެއްލުމެއް ލިބިފައިވާކަމަކަށް ނުފެނެއެވެ.

ސައިކްލޯން އެރުމުގެ ކުރިން އޮޑިޝާ އަދި ވެސްޓް ބެންގާލް ސްޓޭޓްތަކުން މަދުވެގެން 1.1 މިލިއަން މީހުން ވަނީ ރައްކާތެރި ތަންތަނަށް ބަދަލުކޮށްފައެވެ. ސައިކްލޯން އެއްގަމަށް އެރީ ހުކުރު ދުވަހުގެ މެންދަމުގެ ފަހުންނެވެ.

ޕޫރީ ސަރަޙައްދުގެ އޮފިޝަލެއް ކަމަށްވާ ސިއްދާރުތު ސްވައިން އޭއެފްޕީއަށް މަޢުލޫމާތު ދެމުން ބުނެފައިވަނީ މި ސައިކްލޯންގެ ސަބަބުން އެ ސަރަޙައްދުގައި "ބޮޑެތި ގެއްލުންތަކެއް" ލިބިފައިވާ ކަމަށެވެ. އޭނާ އިތުރަށް ބުނެފައިވަނީ ގިނަ އަދަދެއްގެ ގަސްތަކާއި ކަރަންޓު ބައްތިތައް ވަނީ ވެއްޓިފައި ކަމަށާއި، ގޮނޑުދޮށުގައި ހުރި ވަގުތީ ފިހާރަތައް ވަނީ ވައިގަދަވުމުގެ ސަބަބުން އަރައިގެން ގޮސްފައި ކަމަށެވެ.

މިހާތަނަށް އެއްވެސް މީހަކަށް ގެއްލުމެއް ލިބުނު ކަމުގެ ރިޕޯޓެއް ލިބިފައެއް ނުވެއެވެ.

ސައިކްލޯން ޑާނާގެ ސަބަބުން މޫދުގެ ލޮނުގަނޑު 1.15 މީޓަރު (3.75 ފޫޓު) އުފުލި، ގޮނޑުދޮށުގެ ބައެއް ސަރަޙައްދުތަކަށް ވަނީ ފެންބޮޑުވެފައެވެ. ކޮލްކަތާގެ މޫސުމާބެހޭ އޮފީހުގެ ފޯކާސްޓަރެއް ކަމަށްވާ ސޯމެނާތު ދައްތާ އޭއެފްޕީއަށް ބުނެފައިވާ ގޮތުގައި ސައިކްލޯން އެއްގަމަށް އެރިއިރު ގަޑިއަކަށް 120 ކިލޯމީޓަރުގެ ބާރުމިނުގައި ވައި ޖެހެމުން ދިޔައެވެ.

ދުނިޔޭގެ އެންމެ ބޮޑު މެންގްރޫވް ފޮރެސްޓް ކަމަށްވާ ސުންދަރުބަންސްއަށް ވެސް ވަނީ ގަދަ ވައިގެ ސަބަބުން އަސަރުކޮށްފައެވެ. ވެސްޓް ބެންގާލްގެ މިނިސްޓަރު ބަންކިމް ޗަންދުރާ ހަޒްރާ އޭއެފްޕީއަށް ބުނެފައިވާ ގޮތުގައި ސައިކްލޯންގެ ސަބަބުން ސަދޭކަ ގަހަށްވުރެ ގިނަ ގަސް ވަނީ ވެއްޓިފައެވެ. އަދި ގޮނޑުދޮށާ ކައިރި ސަރަޙައްދުތަކުގައި ހުރި ސަދޭކަ ގެއަށްވުރެ ގިނަ ގޭގެ ފުރާޅުތައް ވެސް ވަނީ އަރައިގެން ގޮސްފައެވެ.

ސައިކްލޯންގެ ސަބަބުން ބުރާސްފަތި ދުވަހުގެ ރޭ އިންޑިޔާގެ ތިންވަނައަށް އެންމެ ބޮޑު ސިޓީ ކަމަށްވާ ކޮލްކަތާގެ ވައިގެ ބަނދަރު ވަނީ ބަންދުކޮށްފައެވެ.

މިއަހަރުގެ މޭ މަހު އައި ސައިކްލޯން ރެމަލްގެ ސަބަބުން އިންޑިޔާގައި މަދުވެގެން 48 މީހުން މަރުވި އިރު، ބަންގްލަދޭޝްގައި މަދުވެގެން 17 މީހުން މަރުވިއެވެ. 2020 ވަނަ އަހަރު އައި "ސުޕަރ ސައިކްލޯން" އަމްފާންގެ ސަބަބުން ބަންގްލަދޭޝް އަދި އިންޑިޔާގައި 100 އަށްވުރެ ގިނަ މީހުން މަރުވެ، މިލިއަނުން މީހުންނަށް އޭގެ އަސަރުކުރިއެވެ.

މި ސަރަޙައްދަށް އައި އެންމެ ނުރައްކާތެރި ސައިކްލޯން ކަމަށް ބެލެވެނީ 1970 ވަނަ އަހަރު އައި ސައިކްލޯނެކެވެ. އެ ސައިކްލޯންގެ ސަބަބުން ސަތޭކަ ހާހުން މީހުން މަރުވިއެވެ.