ރައީސުލްޖުމްހޫރިއްޔާގެ ނައިބު އިނގިރޭސިވިލާތުގެ ރަސްގެފާނަށް ރާއްޖެއަށް ޒިޔާރަތްކުރުމަށް ދަޢުވަތު އަރުވައިފި

ކޮމަންވެލްތުގެ ވެރިންގެ ބައްދަލުވުމުގައި ބައިވެރިވެވަޑައިގަތުމަށް ލަންޑަނަށް ވަޑައިގެން އުޅުއްވާ ރައީސުލްޖުމްހޫރިއްޔާގެ ނައިބު އަލްއުސްތާޛު ޙުުސައިން މުޙައްމަދު ލަޠީފް، އިނގިރޭސިވިލާތުގެ ރަސްގެފާނު ޗާލްސް ތިންވަނައާ ބައްދަލުކުރައްވައި، ރާއްޖެއަށް ޒިޔާރަތްކުރެއްވުމަށް ދަޢުވަތު އަރުވައިފިއެވެ.

ކޮމަންވެލްތުގެ އިސްވެރިޔާގެ ހައިސިއްޔަތުން ރަސްގެފާނު ބޭއްވެވިރޭގަނޑުގެ ފަރިއްކޮޅުގައި ބައިވެރިވެވަޑައިގެން ރައީސުލްޖުމްހޫރިއްޔާގެ ނައިބު، ރަސްގެފާނާ ބައްދަލުކުރެއްވިއެވެ. މި ބައްދަލުކުރެއްވުމުގައި ރައީސުލްޖުމްހޫރިއްޔާގެ ނައިބު، މިއަހަރުގެ ބައްދަލުވުން ބޭއްވުމަށް ކުރެވިފައިވާ އިންތިޒާމުތަކަށް ތަޢުރީފުކުރައްވައި، މި ބައްދަލުވުން ކާމިޔާބުކަމާއެކު ކުރިއަށްދިއުމަށް މިކަން މުހިންމު ދައުރެއް އަދާކޮށްފައިވާ ކަމަށް ވިދާޅުވިއެވެ.

މީގެއިތުރުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ފަރާތްޕުޅުން ރައީސުލްޖުމްހޫރިއްޔާގެ ނައިބު، ރަސްގެފާނު ޗާލްސް ތިންވަނައަށް ދިވެހިރާއްޖެއަށް ޒިޔާރަތްކުރެއްވުމަށް ހޫނު މަރުޙަބާއެއް ދަންނަވައި، އެމަނިކުފާނަށް ފަސޭހަފުޅުވާ ދުވަސްވަރެއްގައި ރާއްޖެއަށް ވަޑައިގަތުމަށް ދަޢުވަތު އެރުވިއެވެ.