ފަލަސްތީނުގެ ރައްޔިތުންނަށް އެހީވުމަށް ދިވެހިން ޖަމާކުރި 1.2 މިލިއަން ޑޮލަރު އަންރުވާއަށް ރައްދުކޮށްފި

ފަލަސްތީނުގެ ރައްޔިތުންނަށް އެހީވުމަށް "ފަލަސްތީނާއެކު ދިވެހިން" ގެ ނަމުގައި ބޭއްވުނު ޓެލެތޯނުން ޖަމާކުރެވުނު 1.2 މިލިއަން ޑޮލަރަށްވުރެ ގިނަ ފައިސާ، ޔުނައިޓެޑް ނޭޝަންސް ރިލީފް އެންޑް ވާރކްސް އޭޖެންސީ ފޮރ ޕަލަސްތީނިއަން ރެފިއުޖީޒް (އަންރުވާ) އަށް  ވަނީ ފޮނުވާފައެވެ.

މިނިސްޓްރީ އޮފް ފޮރިން އެފެއާޒުން  ނެރުނު ނޫސްބަޔާނެއްގައި ބުނެފައިވާ ގޮތުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން، ޤައުމީ ފެންވަރުގައި ކުރިއަށް ގެންދިޔަ މި ޓެލެތޯނު ޕަބްލިކް ސާރވިސް މީޑިއާއިން ބާއްވާފައިވަނީ 12 ޖޫން 2024 ގައެވެ. އެ ޓެލެތޯނުން ލިބުނު ފައިސާގެ ޖުމްލަ އަދަދަކީ 1,248,826.56 ޑޮލަރެވެ. މި އަދަދު ވަނީ އޮޑިޓް ފާމްއެއް ކަމުގައިވާ ކްރޯވ މޯލްޑިވްސް އެލް.އެލް.ޕީ. އިން ކަަށަވަރުކޮށްފައެވެ.

ފޮރިން މިނިސްޓްރީން ބުނެފައިވާ ގޮތުގައި، މިފަދަ ބޮޑު އަދަދެއްގެ ފައިސާ ފަލަސްތީނުގެ ރައްޔިތުންނަށްޓަކައި ދިވެހި ރައްޔިތުން ހަދިޔާކޮށްފައިވާކަމީ ފަލަސްތީނުގެ މިނިވަންކަމަށް ރާއްޖެއިން ކުރާ ތާޢީދާއި، އަބަދުވެސް، އަދި ވަކީން ޚާއްސަކޮށް މިފަދަ ދަތި އުނދަގޫ ދަނޑިވަޅެއްގައި، އެ ޤައުމާއި އެ ޤައުމުގެ ރައްޔިތުންނާއެކު ސާބިތުކަމާއެކު ދިވެހިން ތިބި ކަމުގެ އަލިގަދަ ހެއްކެކެވެ.

މީގެއިތުރުން، ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ހިންގަމުންދާ ނަސްލު ނައްތާލުމުގެ އަމަލުތަކާއި ބައިނަލްއަޤްވާމީ ޤާނޫނާއި އިންޓަރނޭޝަނަލް ހިއުމެނިޓޭރިއަން ލޯއާ ޚިލާފަށް ދެމުން ގެންދާ ހަމަލާތައް ދިވެހި ސަރުކާރުން ހަރުކަށިބަހުން ކުށްވެރިކުރާކަމަށް ބަޔާނުގައި ބުނެފައިވެއެވެ.

ފައިސާ ޖަމާކުރިކަން ކަށަވަރުކޮށްދޭ ލިޔެކިޔުންތައް  ފޮރިން މިނިސްޓްރީން ނެރުނު ނޫސް ބަޔާނާއެކު ވަނީ ހިއްސާކޮށްފައެވެ. މީގެ ތެރޭގައި ރާއްޖޭގެ މަރުކަޒީ ބޭންކުން އަންރުވާއަށް ފައިސާ ޖަމާކުރިކަމުގެ 'ޑެބިޓު އެޑްވައިޒު' ގެ ކޮޕީއާއި "އަންރުވާ ފޮރ ޕަލަސްތީން" އެކައުންޓަށް ރާއްޖެއިން ފޮނުވި ފައިސާ ލިބިފައިވާކަން ކަށަވަރުކޮށްދީ ޖޭ.ޕީ.މޯގަން ބޭންކުން އިޝޫ ކޮށްފައިވާ ޓްރާންސެކްޝަން ތަފްޞީލް ހިމެނެއެވެ.

ފަލަސްތީނުގެ މައްސަލައަކީ ދިވެހިރާއްޖެއިން އަބަދުވެސް އިސްކަންދޭ މައްސަލައެކެވެ. އަދި ފަލަސްތީނުގެ މިނިވަންކަމަށް ތާއީދުކުރުމާއި، އެ ޤައުމުގެ ރައްޔިތުންނަށް އެހީތެރިވުމަކީ ދިވެހި ސަރުކާރުގެ ޚާރިޖީ ސިޔާސަތުގެ މުހިންމު ބައެކެވެ.

މި ޓެލެތޯނުގައި ދިވެހި ރައްޔިތުން ދެއްކި އެއްބައިވަންތަކަމާއި ހިތްތިރިކަމަކީ، ދިވެހިންގެ އިންސާނިއްޔަތުކަމާއި އެހެން ޤައުމުތައުމުތަކުގެ ރައްޔިތުންނަށް އެހީތެރިވުމުގެ ރޫހު ދައްކުވައިދޭ ކަމެކެވެ. އަދި މިފަދަ ދަނޑިވަޅެއްގައި ފަލަސްތީނުގެ ރައްޔިތުންނަށް އެހީތެރިވުމަށް ދިވެހިން ދެއްކި ޝައުޤުވެރިކަމަކީ، ބައިނަލްއަޤްވާމީ މުޖުތަމަޢުގައި ދިވެހިރާއްޖެއަށް ލިބޭ ހެޔޮނަމެކެވެ.

"ފަލަސްތީނާއެކު ދިވެހިން" ޓެލެތޯނުން ލިބުނު ފައިސާ ޔުނައިޓެޑް ނޭޝަންސް ރިލީފް އެންޑް ވާރކްސް އޭޖެންސީ ފޯރ ޕަލަސްތީނިއަން ރެފިއުޖީޒް (އަންރުވާ) އަށް ފޮނުވުމާ ގުޅޭގޮތުން ދިވެހި ސަރުކާރުން ނެރޭ ބަޔާން

📃ނޫސް ބަޔާން | https://t.co/m7DojJa9DD pic.twitter.com/wRYahtnKXL

— Ministry of Foreign Affairs 🇲🇻 (@MoFAmv) October 27, 2024