ޖަލު އޮފިސަރުން ސްކޭންކުރަން ފުލް ބޮޑީ ސްކޭން މެޝިން ގެންނަނީ

ޖަލުތަކުން ކުރާ ސްކޭމް ކޯލްތައް ހުއްޓުވުމަށްޓަކައި ޖަލު އޮފިސަރުން ސްކޭންކުރުމަށް ފުލް ބޮޑީ ސްކޭން މެޝިން ގެނައުމުގެ މަސައްކަތް ކުރަމުންދާ ކަމަށް ހޯމްލޭންޑް ސެކިއުރިޓީ މިނިސްޓަރު ޢަލީ އިޙްސާން މިއަދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރު އިޙްސާން ވިދާޅުވީ، މަގާމާ ހަވާލުވިއިރު ޖަލުތަކުން ކުރާ ސްކޭމް ކޯލްތައް ވަރަށް ގިނަ ކަމަށެވެ. އޭގެ އިތުރުން، ޖަލުގައި ތިބޭ ގައިދީންނަށް ފޯނާއި މަސްތުވާތަކެއްޗާއި ޖަލަށް ވެއްދުން މަނާތަކެތި ވައްދައިދޭ ކަމުގެ ތުހުމަތުގައި ސަލާމަތީ ބާރުތަކުން ކުރިއަށް ގެންދިޔަ އޮޕަރޭޝަންގައި 19 އޮފިސަރެއް ފާހަގަކުރެވުނު ކަމަށް އިޙްސާން ވިދާޅުވިއެވެ.

ސިފައިންނާއި ފުލުހުން އަދި ޖަލު އޮފިސަރުން ގުޅިގެން ކުރިއަށް ގެންދިޔަ އޮޕަރޭޝަންގައި ޖަލުން ގިނަ އަދަދެއްގެ ފޯނު އަތުލައިގަނެވުނު ކަމަށް އިޙްސާން ވިދާޅުވިއެވެ. އަދި ޖަލުގައި ޖިއޯ ފެންސިން ހަދައި ޖަލުގައި ފޯނު ނުކުރެވޭ ގޮތް ހެދުމުގެ މަސައްކަތް ކުރަމުންދާ ކަމަށާއި އެއީ ޖަލުން ފޯނުން ކުރުން ހުއްޓުވޭނެ ދާއިމީ ހައްލެއް ކަމަށް  ވިދާޅުވިއެވެ.

މިނިސްޓަރު އިޙްސާން އިތުރަށް ވިދާޅުވީ، މަގާމާ ހަވާލުވެ ވަޑައިގެންނެވިއިރު ޖަލު އޮފިސަރުން ޖަލަށް ވަންނަނީ ސްކޭން ނުކުރެވި ކަމަށާއި ސްކޭން ކުރާނެ މެޝިންވެސް ނެތް ކަމަށެވެ. ނަމަވެސް، މިހާރު ވަގުތީ ގޮތުން މެޓަލް ޑިޓެކްޓާ ހަރުކޮށްފައިވާ ކަމަށާއި ފުލް ބޮޑީ ސްކޭން ކުރެވޭނެ މެޝިން ގެނައުމުގެ މަސައްކަތް ކުރަމުންދާ ކަމަށް  ހާމަކުރެއްވިއެވެ.

މި ފިޔަވަޅުތަކަކީ ޖަލުތަކުގެ ސަލާމަތާއި ރައްކާތެރިކަން އިތުރުކޮށް، ޖަލުތަކުން ކުރާ ސްކޭމް ކޯލްތައް ހުއްޓުވުމަށް އެޅޭ މުހިންމު ފިޔަވަޅުތަކެކެވެ.