ހަސަން ކުރުސީ' އެކައުންޓަކީ އަޅުގަނޑުގެ އެކައުންޓެއް ނޫން، ލަންކާގެ ރައީސަށް ދިން އިންޒާރާއި ގުޅުމެއް ނެތް : ރައީސް ނަޝީދު

ދިވެހިރާއްޖޭގެ ކުރީގެ ރައީސް މުޙައްމަދު ނަޝީދު، 'ހަސަން ކުރުސީ'  ކިޔާ އެކްސް  އެކައުންޓެއް ބޭނުން ނުކުރައްވާ ކަމަށް ހާމަކުރައްވައިފިއެވެ. އެމަނިކުފާނު ވިދާޅުވީ، ސްރީލަންކާގެ ރައީސް އަނޫރަ ކުމާރަ ދިސަނާޔަކައަށް އަމާޒުކޮށް ފޮނުވާފައިވާ ޓްވީޓަކާއި އެމަނިކުފާނާއި އެއްވެސް ގުޅުމެއް ނެތް ކަމަށެވެ. މިކަމުގެ ސަބަބުން ދެޤައުމުގެ ގުޅުންތަކަށް ބުރޫއެރުވުމަށް މަސައްކަތްކުރާ ބަޔަކު ތިބޭތީ ކަންބޮޑުވެ ވަޑައިގަންނަވާ ކަމަށްވެސް އެމަނިކުފާނު ވިދާޅުވިއެވެ.

Let me state for the record, once again, that I do not operate @HKurusee X account. Needless to say, I had nothing to do with the recent tweet against HE President Dissanayake. I’ve always been a friend of 🇱🇰 regardless of who's in power & SL has always assisted Maldives. Sad to…

— Mohamed Nasheed (@MohamedNasheed) September 9, 2025

މިކަން ހާމަކުރައްވާފައިވަނީ ރައީސް ނަޝީދު، ލަންކާގެ ނިއުސް ޕޯޓަލް 'ލަންކާ-އީ-ނިއުސް' ގައި  ސެޕްޓެމްބަރު 8 ވަނަ ދުވަހު ޝާއިޢުކޮށްފައިވާ ޚަބަރެއް، އެމަނިކުފާނުގެ އެކްސް އެކައުންޓުގައި ހިއްސާ ކުރެއްވުމުންނެވެ. އެ ޚަބަރުގައި ބުނެފައިވަނީ 'ހަސަން ކުރުސީ' ނަމުގައި ހިންގާ އެކްސް އެކައުންޓަކުން ސްރީލަންކާގެ ރައީސަށް އިންޒާރެއް ދީފައިވާ ކަމަށާއި، މިކަމުގެ ސަބަބުން ސްރީލަންކާއާއި ރާއްޖެއާ ދެމެދު ބޮޑު ހަލަބޮލިކަމެއް އުފެދިފައިވާ ކަމަށެވެ.

'ހަސަން ކުރުސީ' އެކައުންޓާއި ގުޅޭ ކަންބޮޑުވުންތައް:

ލަންކާ-އީ-ނިއުސްގެ ޚަބަރުގައި ބުނެފައިވަނީ، ސްރީލަންކާގެ ކުރީގެ ރައީސް ރަނިލް ވިކްރަމަސިންހަ ކޯޓު އަމުރަކަށް ހައްޔަރުކުރުމާ ގުޅިގެން، 'ހަސަން ކުރުސީ' އެކައުންޓުން ރައީސް ދިސަނާޔަކައަށް އަމާޒުކޮށް އިންޒާރުގެ މެސެޖެއް ފޮނުވާފައިވާ ކަމަށެވެ. މިކަމުގެ ސަބަބުން ސްރީލަންކާގެ ކަމާބެހޭ ފަރާތްތަކުން ވަނީ އެކަމާބެހޭ ތަހުގީގު ފަށާފައެވެ.

މީގެ އިތުރުން އެ ޚަބަރުގައި ބުނެފައިވަނީ، 'ހަސަން ކުރުސީ' އެކައުންޓަކީ ދިވެހިރާއްޖޭގެ ވަރަށް މައްޝޫރު ސިޔާސީ ބޭފުޅެއް، ކުރީގެ ރައީސެއް އަދި ރައްޔިތުންގެ މަޖިލީހުގެ ރައީސެއް ހިންގަވާ އެކައުންޓެއް ކަމަށް ދިވެހިރާއްޖޭގެ ސޯޝަލް މީޑިއާ ބޭނުންކުރާ ފަރާތްތަކުން ދިގު މުއްދަތެއްގައި ތުހުމަތުކުރަމުން އަންނަ ކަމަށެވެ. އަދި އެބޭފުޅާ، ރަނިލް ވިކްރަމަސިންހައާ ގާތްގުޅުމެއް ބަހައްޓަވާ ކަމަށްވެސް ޚަބަރުގައި ފާހަގަކޮށްފައިވެއެވެ.

ދިވެހިރާއްޖެއާއި ލަންކާގެ ގުޅުންތަކަށް ބުރޫއެރުމުގެ ބިރު:

ރައީސް ނަޝީދު އެމަނިކުފާނުގެ އެކްސް ޕޯސްޓުގައި ފާހަގަކުރެއްވީ، ލަންކާގައި ކޮންމެ ސަރުކާރެއް އޮތް ނަމަވެސް، ލަންކާއަކީ އަބަދުވެސް ރާއްޖޭގެ ގާތް އެކުވެރިއެއް ކަމަށާއި، ރާއްޖެއަށް އެހީތެރިކަން ފޯރުކޮށްދީފައިވާ ގައުމެއް ކަމަށެވެ. އަދި ދެޤައުމުގެ ގުޅުންތަކަށް ބުރޫއެރުވުމަށް މަސައްކަތްކުރާ ބަޔަކު ތިބޭތީ ކަންބޮޑުވެ ވަޑައިގަންނަވާ ކަމަށްވެސް އެމަނިކުފާނު ވިދާޅުވިއެވެ.

'ލަންކާ-އީ-ނިއުސް' ގެ ޚަބަރުގައި، ސްރީލަންކާގެ ތަހުގީގުތަކުން 'ހަސަން ކުރުސީ' އެކައުންޓް ހިންގާ ފަރާތް ނުވަތަ އެކައުންޓާއި ގުޅުން ހުރި އައިޕީ އެޑްރެސް، ވައިފައި ނެޓްވޯކްތަކާއި އިލެކްޓްރޯނިކް ޑިވައިސްތައް ދެނެގަތުމަށް މަސައްކަތްކުރާ ކަމަށްވެއެވެ. އަދި މިކަން ދިވެހިރާއްޖޭގެ ކުރީގެ ވެރިއަކާ ގުޅިއްޖެނަމަ، މިއީ ހަމައެކަނި ސައިބަރ ކްރައިމެއްގެ ބަދަލުގައި ސިޔާސީ ގުޅުންތަކުގެ ބޮޑު މައްސަލައަކަށް ވެގެންދާނެ ކަމަށް ކޮލޮމްބޯގައި ހުންނަ ސައިބަރ ސެކިއުރިޓީ އެނަލިސްޓެއް ހަވާލާދީ އެ ޚަބަރުގައި ބުނެފައިވެއެވެ.
މިކަމުގެ ސަބަބުން ދިވެހިރާއްޖެއާއި ސްރީލަންކާއާ ދެމެދުގައި އޮންނަ ގުޅުންތަކުގެ ނާޒުކުކަން ދައްކުވައިދޭ ކަމަށް ގިނަ ބަޔަކު ދެކެއެވެ.