ވ. އަތޮޅުގެ ފަސް ރަށަކަށް ސްޓެލްކޯ އެމްޑީ ޒިޔާރަތްކުރައްވައި، ހިދުމަތްތައް އިތުރަށް ފުރިހަމަ ކުރުމަށް މަޝްވަރާކުރައްވައިފި

ދިވެހިރާއްޖޭގެ ކަރަންޓުގެ ހިދުމަތް ފޯރުކޮށްދިނުމުގައި އެންމެ އިސްކޮށް ހަރަކާތްތެރިވާ ކުންފުނި ކަމަށްވާ ސްޓެލްކޯގެ މެނޭޖިންގ ޑިރެކްޓަރ،  ޝަމާހް ރަޝީދު އާއި އެ ކުންފުނީގެ ބައެއް އިސްވެރިން، މިދިޔަ ހަފްތާ ބަންދުގައި ވ. އަތޮޅުގެ ފަސް ރަށަކަށް ޒިޔާރަތްކުރައްވައިފިއެވެ.

 މި ޒިޔާރަތުގެ މައިގަނޑު މަގުސަދަކީ އެ ރަށްރަށުގައި ސްޓެލްކޯއިން ފޯރުކޮށްދެމުންގެންދާ ހިދުމަތްތައް އިތުރަށް ހަރުދަނާކޮށް، ރައްޔިތުންނަށް އެންމެ ފުރިހަމަ ހިދުމަތެއް ފޯރުކޮށްދިނުމާ ގުޅޭގޮތުން މަޝްވަރާކުރުމެވެ.

ސްޓެލްކޯއިން އެކްސް މެދުވެރިކޮށް ހާމަކުރެއްވި މައުލޫމާތުތަކަށް ބަލާއިރު، މެނޭޖިންގ ޑިރެކްޓަރ ޝަމާހް ރަޝީދުގެ އިތުރުން ކުންފުނީގެ އިސްވެރިން ވަނީ ވ. އަތޮޅުގެ ފެލިދޫ، ފުލިދޫ، ކެޔޮދޫ، ރަކީދޫ އަދި ތިނަދޫއަށް ޒިޔާރަތްކުރައްވާފައެވެ. މި ޒިޔާރަތުގައި އެ ރަށްރަށުގެ އިންޖީނުގެތަކަށް ވަޑައިގެން، ކަރަންޓުގެ ހިދުމަތް ދިނުމަށް މިހާރު ހުރި އިންތިޒާމުތައް ބައްލަވައިލައްވާފައިވެއެވެ.

އަދި، އެ ރަށްރަށުގައި މަސައްކަތްކުރައްވާ ސްޓެލްކޯގެ މުވައްޒަފުންނާއި ބައްދަލުކުރައްވައި، ހިދުމަތްތައް އިތުރަށް ފުރިހަމަ ކުރުމަށް ކުރެވިދާނެ ކަންކަމާއި ގުޅޭގޮތުން ފުޅާ ދާއިރާއެއްގައި މަޝްވަރާކުރައްވާފައިވާ ކަމަށް ސްޓެލްކޯއިން މައުލޫމާތުދެއެވެ.

މިކުންފުނީގެ މެނޭޖިންގ ޑިރެކްޓަރ @shamah_rasheed އާއި، ކުންފުނީގެ ބައެއް އިސްވެރިން ވަނީ ހަފްތާ ބަންދުގައި ވ. އަތޮޅުގައި މިކުންފުނިން ހިދުމަތްދެމުންގެންދާ ފެލިދޫ، ފުލިދޫ، ކެޔޮދޫ، ރަކީދޫ އަދި ތިނަދޫއަށް ވަޑައިގެން އެ ރަށްރަށުގެ އިންޖީނުގެއަށް ޒިޔާރަތްކުރައްވާ މިކުންފުނިން… pic.twitter.com/YXA9oQe7ad

— STELCO (@STELCOMALDIVES) September 14, 2025

މި މަޝްވަރާތަކުގައި މުވައްޒަފުންގެ ހިޔާލުތަކާއި، ކުރިމަތިވާ ގޮންޖެހުންތަކާއި، ހިދުމަތް ރަނގަޅުކުރުމަށް ހުރި ފުރުސަތުތަކާ ބެހޭގޮތުން ވަނީ ތަފްސީލީ މަޝްވަރާތަކެއް ކުރެވިފައެވެ.

ސްޓެލްކޯއިން މިފަދަ ޒިޔާރަތްތައް އާންމުކޮށް ކުރައްވަމުން ގެންދަވަނީ، އެ ކުންފުނިން ރާއްޖޭގެ އެކި ކަންކޮޅުތަކުގައި ފޯރުކޮށްދޭ ހިދުމަތްތައް އަމަލީ ގޮތުން ބައްލަވައިލައްވައި، ރައްޔިތުންނަށް އެންމެ ފަސޭހައިން އަދި އެންމެ ހަރުދަނާކޮށް ހިދުމަތް ފޯރުކޮށްދިނުމުގެ ބޭނުމުގައެވެ.