ހުޅުމާލެ ޕޮލިހުން މަކަރާއި ހީލަތުގެ މައްސަލައެއްގައި މީހަކު ހޯދަނީ

ހުޅުމާލެ ފޭސް 1 ޕޮލިސް ސްޓޭޝަނުން ތަޙްޤީޤު ކުރަމުންދާ މަކަރާއި ހީލަތުގެ މައްސަލައެއްގައި ތުހުމަތުކުރެވޭ މީހަކު ހޯދުމަށް ފުލުހުން މަސައްކަތް ކުރަމުންދާ ކަމަށް ޕޮލިސް މީޑިއާއިން މަޢުލޫމާތު ދީފިއެވެ.

ފުލުހުން ހޯދަމުންދަނީ އއ. މާޅޮހުގެ ބަނަފުސާގޭ ޙައްވާ ތަޢުލީމާ (41 އަހަރު) އެވެ. މި މައްސަލައިގައި ތުހުމަތު ކުރެވެނީ މަކަރާއި ހީލަތުން މީހެއްގެ އަތުން ފައިސާ ހޯދާފައިވާ ކަމަށެވެ.

ފުލުހުން ބުނީ ޙައްވާ ތަޢުލީމާ އުޅޭ ވަކި ތަނެއް ނޭނގޭތީ، ތަޙްޤީޤަށް ހާޒިރުވުމަށް ޗިޓު ރައްދު ކުރެވިފައި ނުވާ ކަމަށެވެ. އެހެންކަމުން، ޖިނާއީ މައްސަލަތައް ތަޙްޤީޤުކުރުމުގައި ފުލުހުން ޢަމަލުކުރާނެ އިޖުރާއަތުގެ ގަވާއިދުގެ 27 ވަނަ މާއްދާގައިވާ ގޮތުގެމަތިން ތަޙްޤީޤަށް ހާޒިރުވުމަށް އަންގައި އިޢުލާނުކޮށްފައިވާ ކަމަށް ފުލުހުން ބުންޏެވެ.

ޙައްވާ ތަޢުލީމާ ވަނީ 2024 ނޮވެމްބަރު 6 ވަނަ ދުވަހުގެ ހެނދުނު 10:00 އަށް ހުޅުމާލެ ފޭސް 1 ޕޮލިސް ސްޓޭޝަނަށް ހާޒިރުވުމަށް އަންގާފައެވެ. އޭނާ ހާޒިރުކުރެވެނީ މި މައްސަލައިގެ ތުހުމަތުގައި ސުވާލުކުރުމަށް ކަމަށް ފުލުހުން ބުނެފައިވެއެވެ.

ފުލުހުން އިތުރަށް ބުނީ މި މައްސަލައާ ގުޅޭ އެއްވެސް މަޢުލޫމާތެއް އެނގޭ ފަރާތެއް ވާނަމަ، އެ މަޢުލޫމާތު ފުލުހުންނާ ހިއްސާކޮށްދިނުމަށެވެ.