ސަރުކާރު ހިއްސާވާ ކުންފުނިތަކަށް 6.4 ބިލިއަން ރުފިޔާގެ ފައިދާ

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ އެނުއަލް ފައިނޭންޝަލް ރިވިއުއިން ހާމަކޮށްފައިވާ ގޮތުގައި، މިދިޔަ އަހަރު ސަރުކާރު ހިއްސާވާ ކުންފުނިތަކަށް 6.4 ބިލިއަން ރުފިޔާގެ ފައިދާއެއް ލިބިފައިވެއެވެ. މި ފައިދާގެ ބޮޑު ބައެއް ނިސްބަތްވަނީ ފަސް ކުންފުންޏަކަށެވެ.

މިދިޔަ އަހަރު ކުންފުނިތަކުގެ އާމްދަނީގެ ގޮތުގައި ލިބިފައިވަނީ 53 ބިލިއަން ރުފިޔާއެވެ. މިއީ އޭގެ ކުރީ އަހަރާ އަޅާބަލާއިރު 40 ޕަސެންޓުގެ ކުރިއެރުމެކެވެ.

ފައިދާ ލިބުނު ކުންފުނިތަކުގެ ތެރެއިން 98 ޕަސެންޓު ނިސްބަތްވަނީ ފަސް ކުންފުންޏަކަށެވެ. އެއީ ބޭންކް އޮފް މޯލްޑިވްސް (ބީއެމްއެލް)، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)، ދިރާގު، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އަދި ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އެވެ.

މި ފަސް ކުންފުނީގެ ފައިދާގެ ތަފްސީލަށް ބަލާއިރު، ބީއެމްއެލް އަށް ދެ ބިލިއަން ރުފިޔާ، އެޗްޑީސީ އަށް 1.7 ބިލިއަން ރުފިޔާ، ދިރާގަށް 896 މިލިއަން ރުފިޔާ، އެމްއޭސީއެލް އަށް 834 މިލިއަން ރުފިޔާ އަދި އެސްޓީއޯ އަށް 818 މިލިއަން ރުފިޔާ ލިބިފައިވެއެވެ.

ސަރުކާރު ހިއްސާވާ 30 ކުންފުނި ހިންގާއިރު، މިދިޔަ އަހަރު ފައިދާ ނެރެވިފައިވަނީ 15 ކުންފުންޏަކުންނެވެ. އަނެއް 15 ކުންފުނި ހިންގާފައިވަނީ ގެއްލުމުގައެވެ. ގެއްލުންވި ކުންފުނިތަކުގެ ޖުމްލަ ގެއްލުމުގެ އަދަދު 660 މިލިއަން ރުފިޔާއަށް އަރާފައިވެއެވެ.

އެންމެ ބޮޑު ގެއްލުމެއް ވެފައިވަނީ ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އަށެވެ. މި ކުންފުންޏަށް 173 މިލިއަން ރުފިޔާގެ ގެއްލުމެއް ވެފައިވެއެވެ. މީގެ އިތުރުން، ރީޖަނަލް އެއަރޕޯޓްސް، އައްޑޫ އެއަރޕޯޓް ކުންފުނި، އައިލެންޑް އޭވިއޭޝަން، ޕަބްލިކް ސަރވިސް މީޑިއާ (ޕީއެސްއެމް)، ހައްޖު ކޯޕަރޭޝަން އަދި ފަހި ދިރިއުޅުން ކޯޕަރޭޝަނަށްވެސް ބޮޑެތި ގެއްލުންތަކެއް ވެފައިވެއެވެ.

ސަރުކާރު ހިއްސާވާ 30 ކުންފުނީގައި މިހާރު 34،000 އަށް ވުރެ ގިނަ މުވައްޒަފުން މަސައްކަތްކުރާ ކަމަށް ރިޕޯޓުގައި ފާހަގަކޮށްފައިވެއެވެ. އަދި މި ކުންފުނިތަކުގެ އެސެޓްގެ ޖުމްލަ އަގު 220 ބިލިއަން ރުފިޔާއަށް އަރާ ކަމަށްވެސް ބަޔާންކޮށްފައިވެއެވެ.