ފަސްޓް ލޭޑީ މާކް ފައުންޑޭޝަންގެ އެފްރިކާ އޭޝިއާ ލުމިނަރީ 2024 އަހަރީ ކޮންފަރެންސްގައި ބައިވެރިވެވަޑައިގެންފި

ރައީސުލްޖުމްހޫރިއްޔާގެ އަނބިކަނބަލުން އަލްފާޟިލާ ސާޖިދާ މުޙައްމަދު، މިއަދު މާކް ފައުންޑޭޝަންގެ އޭޝިއާ-އެފްރިކާ ލުމިނަރީ 2024 އަހަރީ ބައްދަލުވުމުގެ 11 ވަނަ ދައުރުގެ އިފްތިތާޙީ ރަސްމިއްޔާތުގައި ޝަރަފުވެރިކަމާއެކު ބައިވެރިވެވަޑައިގެންނެވިއެވެ.

މި އަހަރުގެ ބައްދަލުވުން ބޭއްވެނީ ޓެންޒޭނިއާގެ ސަރުކާރުގެ އެއްބާރުލުމާއެކު، އެ ޤައުމުގެ ރައީސާ އަލްފާޟިލާ ޑރ. ސަމިއާ ސުލުހު ހަސަންގެ ރިޔާސަތުގެ ދަށުންނެވެ.

މި ބައްދަލުވުމުގައި ފަސްޓް ލޭޑީ ސާޖިދާ މުޙައްމަދު، މަތީ ފެންވަރުގެ ފަސްޓް ލޭޑީސް ޕެނަލްގައި މުހިންމު ޚިޠާބެއް އިއްވެވުމަށް ހަމަޖެހިފައިވެއެވެ. އަދި މީގެ އިތުރުން، މާކް ފައުންޑޭޝަން ފަސްޓް ލޭޑީސް އިނީޝިއޭޓިވް (އެމްއެފްއެފްއެލްއައި) ކޮމިޓީގެ ބައްދަލުވުމުގައި ޚާއްޞަ ވާހަކަފުޅެއް ދެއްކެވުމަށްވެސް ހަމަޖެހިފައިވެއެވެ.

މި ބައްދަލުވުމަކީ އޭޝިއާ އަދި އެފްރިކާގެ ޤައުމުތަކުގެ ފަސްޓް ލޭޑީސްއިންނާއި، ޞިއްޙީ ދާއިރާގެ އިސް ފަރާތްތައް އެއްތަނަކަށް އެއްވެ، ޞިއްޙީ ދާއިރާގެ ކުރިއެރުމާ ގުޅޭގޮތުން މަޝްވަރާކުރާ އިސް ފެންވަރުގެ ބައްދަލުވުމެކެވެ. މި ބައްދަލުވުމުގައި ދިވެހިރާއްޖޭގެ ފަސްޓް ލޭޑީ ބައިވެރިވެވަޑައިގަތުމަކީ، ދިވެހިރާއްޖޭގެ ޞިއްޙީ ދާއިރާގެ ތަރައްޤީއަށް އިތުރު ފުރުޞަތުތަކެއް ފަހިވެގެންދާނެ ކަމެއްގެ ގޮތުގައި ދެކެމެވެ.