ރައީސުލްޖުމްހޫރިއްޔާގެ އަނބިކަނބަލުން ޞިއްޙީ ޚިދުމަތާއި އިޖްތިމާޢީ ހަމަހަމަކަން ހަރުދަނާކުރުމަށް ގޮވާލައްވައިފި

ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ވަނީ މެރކް ފައުންޑޭޝަން އެފްރިކާ އޭޝިއާ ލޫމިނަރީ ކޮންފަރެންސްގެ 11 ވަނަ އަހަރީ ބައްދަލުވުމުގައި ބޭއްވުނު ހައިލެވެލް ފަސްޓް ލޭޑީސް ޕެނަލްގައި ޝަރަފުވެރި މެހުމާނެއްގެ ގޮތުގައި ބައިވެރިވެވަޑައިގެން، ޞިއްޙީ ޚިދުމަތާއި އިޖްތިމާޢީ ހަމަހަމަކަން ހަރުދަނާކުރުމަށް ވަކާލާތުކުރައްވައިފައެވެ.

އެކަމަނާގެ ކީނޯޓް ތަޤުރީރުގައި، ޞިއްޙީ ޚިދުމަތާއި، އަންހެނުން ބާރުވެރިކުރުވުމާއި، ތަޢުލީމު ކުރިއެރުވުމުގައި ބައިނަލްއަޤްވާމީ ފެންވަރުގައި އެއްބާރުލުން ދިނުމުގެ މުހިންމުކަމަށް އަލިއަޅުއްވާލެއްވިއެވެ. މީގެ އިތުރުން، މެރކް ފައުންޑޭޝަނުން ކުރިއަށް ގެންދާ "މޯރ ދޭން އަ މަދަރ" ކެމްޕެއިންގެ މަސައްކަތްތަކަށް ތަޢުރީފުކުރައްވައި، މި ކެމްޕެއިން ރާއްޖެއަށް ތަޢާރަފުކުރެއްވުމަށް ބޭނުންފުޅުވާކަން ހާމަކުރެއްވިއެވެ.

މެޑަމް ސާޖިދާ ވިދާޅުވީ، ދަރިމައިވުމުގެ މައްސަލައަކީ ރާއްޖޭގައި އަދިވެސް ވަރަށް ހައްސާސް މައުޟޫއެއް ކަމަށާއި، އެހެންނަމަވެސް އަންހެނުންނަކީ މުޖުތަމަޢު ބިނާކުރުމުގެ މުހިންމު ދައުރެއް އަދާކުރާ ބައެއް ކަމަށެވެ. އަދި އާސަންދަ ޕަބްލިކް ހެލްތު އިންޝުއަރެންސް ސްކީމްގެ ތެރެއިން އައިވީއެފް ފަދަ އެސިސްޓެޑް ރިޕްރޮޑަކްޓިވް ޓެކްނޮލޮޖީސް (އޭއާރްޓީ) އަށް ފަސޭހައިން ވާޞިލުވެވޭނެ ގޮތް ހެދުމަށް ސަރުކާރުން ކުރަމުންދާ މަސައްކަތްތަކުގެ މައްޗަށްވެސް އަލިއަޅުއްވާލެއްވިއެވެ.

މީގެ އިތުރުން، ކެންސަރުން ރައްކާތެރިވުމާއި ފަރުވާ ދިނުމާއި، ތަޢުލީމު ކުރިއެރުވުމާއި، އެންމެންނަށް ހަމަހަމަ ފުރުސަތުތައް ފަހިކޮށްދިނުމުގެ މުހިންމުކަމުގެ މައްޗަށްވެސް އެކަމަނާ ވާހަކަފުޅު ދެއްކެވިއެވެ.

ރައީސުލްޖުމްހޫރިއްޔާގެ އަނބިކަނބަލުން ވާހަކަފުޅު ނިންމަވާލެއްވީ، ދުޅަހެޔޮ އަދި ހަމަހަމަ ދުނިޔެއެއް ބިނާކުރުމަށްޓަކައި މެރކް ފައުންޑޭޝަނާ ގުޅިގެން އިތުރަށް މަސައްކަތްކުރައްވާނެކަމުގެ ޔަޤީންކަން ދެއްވަމުންނެވެ.