އއ. އަތޮޅުގައި ރައްކާތެރިކަމާއެކު އިންޓަރނެޓް ބޭނުންކުރުމާއި ގުޅޭ ހޭލުންތެރިކަން އިތުރުކުރުމުގެ ޕްރޮގްރާމެއް ހިންގައިފި

ބައިނަލްއަޤްވާމީ ސައިބަރ ހޭލުންތެރިކަމުގެ މަހާ ގުޅުވައިގެން، އއ. އަތޮޅުގައި "އެނގޭތަ؟" ގެ ނަމުގައި އިންޓަނެޓް ރައްކާތެރިކަމާ ގުޅޭ މަޢުލޫމާތު ދިނުމުގެ ޚާއްޞަ ޕްރޮގްރާމެއް ދިވެހި ފުލުހުންގެ ޙިދުމަތުން ކުރިއަށް ގެންގޮސްފިއެވެ. މި ޕްރޮގްރާމުގެ މައިގަނޑު މަޤްޞަދަކީ ރައްކާތެރިގޮތުގައި އިންޓަނެޓް ބޭނުންކުރުމާ ގުޅޭ މަޢުލޫމާތު ފޯރުކޮށްދިނުމާއި، ރައްޔިތުންނާ ގާތުން ޚިދުމަތް ދިނުންކަމުގައި ފުލުހުން ވަނީ ހާމަކޮށްފައެވެ.

މި މަހުގެ 28 ވަނަ ދުވަހު ހިންގުނު މި ޕްރޮގްރާމުގައި، އަތޮޅުގެ އެކި ރަށްރަށުގެ އާންމު ރައްޔިތުންނާއި، ސްކޫލް ދަރިވަރުންނާއި، އޮފީސްތަކާއި ގޭބިސީތަކަށް އަމާޒުކޮށްގެން ހޭލުންތެރިކަން އިތުރުކުރުމުގެ ހަރަކާތްތައް ކުރިއަށް ގެންގޮސްފައިވެއެވެ. ޕްރޮގްރާމުގައި ޚާއްޞަ އަހައްމިއްޔަތުކަމެއް ދީފައިވަނީ އިންޓަނެޓް މެދުވެރިކޮށް ހިންގޭ އެކިއެކި ކުށްތަކުން ރައްކާތެރިވުމުގެ ގޮތްތައް ކިޔައިދިނުމަށެވެ.

މި ގޮތުން، ބައިވެރިންނަށް އަންނަނިވި މުހިންމު މަޢުލޫމާތު ފޯރުކޮށްދީފައިވެއެވެ:
• ސެކިއުރިޓީ ވަރުގަދަ ޕާސްވޯޑު ހަދާނެ ގޮތާއި  ބެލެހެއްޓުމުގެ އުކުޅުތައް
• މަލްޓިފެކްޓަރ އޮތެންޓިކޭޝަން ބޭނުންކުރުމުގެ މުހިންމުކަން
• ފިޝިންގ ލިންކުތައް ދެނެގަތުމުގެ ގޮތްތައް
• އިންޓަނެޓާ ގުޅޭ މައްސަލަތައް ރިޕޯޓުކުރާނެ ރަސްމީ ނިޒާމުތައް

މި ޕްރޮގްރާމަކީ އއ. އަތޮޅުގައި ކުރިއަށްގެންދާ ރައްޔިތުންނާ ގާތުން ޚިދުމަތްދިނުމުގެ ސިލްސިލާ ހަރަކާތްތަކުގެ ތެރެއިން އެއް ހަރަކާތެވެ. މިފަދަ މުހިންމު ޕްރޮގްރާމުތަކުން ރައްޔިތުންގެ މެދުގައި އިންޓަނެޓު ބޭނުންކުރުމާ ގުޅޭ ހޭލުންތެރިކަން އިތުރުވެ، ސައިބަރ ސަލާމަތާއި ރައްކާތެރިކަމަށް އިތުރު ސަމާލުކަމެއް ދެވި، ޑިޖިޓަލް ވެށްޓެއްގައި ރައްކާތެރިކަމާއެކު ދިރިއުޅުމަށް މަގުފަހިވާނެއެވެ.