އޮންލައިން ޖުވާ ހުއްޓުވުމަށް ގާނޫނަށް އިސްލާހު ގެންނަނީ

ދިވެހިރާއްޖޭގައި އޮންލައިންކޮށް ޖުވާ ކުޅުމާއި ބެޓްކުރުން ހުއްޓުވުމަށްޓަކައި ޤާނޫނީ އޮނިގަނޑަށް އިޞްލާޙުތަކެއް ގެނައުމަށް ސަރުކާރުން ނިންމައިފިކަމަށް ބަންޑާރަ ނައިބު  އަޙްމަދު އުޝާމް ވިދާޅުވެއްޖެއެވެ. 

ރާއްޖޭގައި ވަރަށް ފުޅާ ދާއިރާއެއްގައި ޖުވާ ކުޅުމާއި އެފަދަ ޣައިރު ޤާނޫނީ ޙަރަކާތްތައް ހިންގަމުންދާކަން ވަނީ ފާހަގަކުރެވިފައެވެ. މިއީ ޤާނޫނީ އޮނިގަނޑަށް އިޞްލާޙު ގެނެސްގެން ޙައްލުކުރަންޖެހޭ މައްސަލައެއް ކަމަށް  ޤަބޫލުކުރައްވާ ކަމަށާއި މި ކަންކަން ހުއްޓުވުމަށްޓަކައި ޤާނޫނަށް ގެންނަންޖެހޭ އިޞްލާޙުތައް ގެންނާނެ ކަމަށް އުޝާމް ވިދާޅުވިއެވެ.

މިދިޔަ ޖުލައި މަހު، ސަރުކާރުން ވަނީ ޖުވާ ކުޅުމާއި ބެޓްކުރުމަށް ބޭނުންކުރާ ވެބްސައިޓްތައް ރާއްޖޭގައި ބްލޮކްކުރަން ފަށާފައެވެ. ކޮމިއުނިކޭޝަންސް އޮތޯރިޓީ އޮފް މޯލްޑިވްސް  އިން މަޢުލޫމާތު ދެއްވާފައިވާ ގޮތުގައި، މޯލްޑިވްސް ޕޮލިސް ސަރވިސްގެ އެންގުމަކަށް މިފަދަ ވެބްސައިޓްތަކެއް ބްލޮކްކޮށްފައިވެއެވެ. ނަމަވެސް ބްލޮކްކުރެވުނު ވެބްސައިޓްތަކުގެ ޢަދަދު ހާމަކޮށްފައެއް ނުވެއެވެ.

ފަހަކަށް އައިސް ރާއްޖޭގައި ޖުވާ ކުޅޭ ސައިޓްތަކުގެ ބޭނުންހިފާ މިންވަރު ވަނީ މަތިވެފައެވެ. މީގެ އިތުރުން، ޓެލެގްރާމާއި އެހެނިހެން އިޖްތިމާޢީ މީޑިއާ ޕްލެޓްފޯމްތައް މެދުވެރިކޮށް ޖުވާ ކުޅޭ ވެބްސައިޓްތައް ޕްރޮމޯޓްކުރުން ވެސް ވަނީ އާންމުވެފައެވެ.