ސްޕެއިންގެ ވިއްސާރައިގެ ކާރިސާގައި މަރުވި މީހުންގެ އަދަދު 95 އަށް

ސްޕެއިންގެ ވެލެންސިއާ އަދި އޭގެ އަވަށްޓެރި ސަރަޙައްދުތަކަށް ކުރިމަތިވި ބޯކޮށް ވެހުނު ވާރޭގެ ސަބަބުން، ޤައުމު ވަނީ ފާއިތުވި އެތައް އަހަރެއްގެ ތެރޭގައި ދިމާވި އެންމެ ނުރައްކާތެރި ފެންބޮޑުވުމުގެ ކާރިސާއަކާ ކުރިމަތިލާންޖެހިފައެވެ. މިހާތަނަށް މަރުވެފައިވާ މީހުންގެ އަދަދު 95 އަށް އަރާފައިވާއިރު، އެތައް ބަޔަކު ވަނީ ގެއްލިފައެވެ.

އަންގާރަ ދުވަހު ކުއްލިއަކަށް ވެހުނު ބޯ ވާރޭގެ ސަބަބުން ފެންބޮޑުވެ، މަގުތަކާއި އިމާރާތްތައް ވަނީ ފެނުގެ ދަށުގައެވެ. މިކަމުގެ ސަބަބުން ގިނަ ބަޔަކު ސަލާމަތްވުމަށްޓަކައި ގޭގެ ފުރާޅުމައްޗަށް އަރަން ޖެހުނެވެ. އަދި ބައެއް މީހުން ގަސްތަކުގައި ހިފަހައްޓައިގެން ތިބެންޖެހުނެވެ.

ސަރުކާރުން މަޢުލޫމާތު ދެއްވާފައިވާ ގޮތުގައި "ގިނަ އަދަދެއްގެ މީހުން ގެއްލިފައިވާތީ" މަރުވާ މީހުންގެ އަދަދު އިތުރުވާނެކަމަށް ލަފާކުރެވެއެވެ. ވެލެންސިއާގައި 92 މީހުން މަރުވެފައިވާއިރު، ވެލެންސިއާގެ ހުޅަނގުގައިވާ ކަސްޓީޔާ-ލާ މާންޗާގައި 2 މީހަކު މަރުވެފައިވެއެވެ. އަދި މާލަގާގައި 71 އަހަރުގެ އިނގިރޭސި ފިރިހެނަކު ވަނީ ހޮސްޕިޓަލުގައި މަރުވެފައެވެ.

މިއީ 1973 ވަނަ އަހަރު ޤައުމުގެ ދެކުނު-އިރުމަތީގައި ދިމާވި އެންމެ ނުރައްކާތެރި ފެންބޮޑުވުމުގެ ކާރިސާއިން ފެށިގެން މިފަދަ ކާރިސާއަކުން މަރުވި އެންމެ ގިނަ އަދަދެވެ. އެ ކާރިސާގައި މަދުވެގެން 150 މީހުން މަރުވިކަމަށް ލަފާކުރެވެއެވެ.

ބުދަ ދުވަހު ޤައުމާ މުޚާޠަބުކޮށް ދެއްކެވި ވާހަކަފުޅުގައި ބޮޑުވަޒީރު ސާންޗެޒް ވަނީ ރައްޔިތުންނަށް ފަރުވާތެރިވުމަށް އިލްތިމާސްކުރައްވައިފައެވެ. އަދި ކާރިސާގެ ޝިކާރައަކަށްވީ ފަރާތްތަކާއި މެދު ހިތާމަކުރާކަމަށާއި ސަރުކާރު އޮތީ ރައްޔިތުނާއި އެކުގައި އަދި ރައްޔިތުން ދޫކޮށްނުލާނެ ކަމަށް ވިދާޅުވެފައެެވެ.

ވެލެންސިއާ ކައިރީގައިވާ ޗީވާ ނަމަކަށް ކިޔާ ރަށެއްގައި އަންގާރަ ދުވަހުގެ 8 ގަޑިއިރުގެ ތެރޭގައި އަހަރެއްގެ މުޅި ވާރޭ ވެހުނުކަމަށް ޤައުމީ މޫސުމާބެހޭ އޭޖެންސީ އިން މަޢުލޫމާތު ދީފައިވެއެވެ.

ބުދަ ދުވަހުގެ ހެނދުނު ސްޕެއިންގެ ސިފައިންނާއި ކުއްލި ނުރައްކަލުގެ ޚިދުމަތްތަކުން މީހުން ސަލާމަތްކުރުމުގެ މަސައްކަތްތައް ކުރިއަށް ގެންދިޔައެވެ. މީގެ ތެރޭގައި ބެލްކަނިތަކުންނާއި ކާރުތަކުގެ ފުރާޅުމަތިން މީހުން ނަގައި ރައްކާތެރި ތަންތަނަށް ގެންދިއުން ހިމެނެއެވެ.