81 ރަށަށް 24 އަހަރުން ދިން ޚިދުމަތް ، 95 ރަށަށް 8 މަސް ތެރޭގައި ، ބާކީ 10 ރަށް : މިސަރުކާރުގެ ދުވެލި ތަފާތު!

ކޮންމެ ޤައުމެއްގެ އުމްރާނީ ތަރައްޤީއަށްޓަކައި، މާލީ ޚިދުމަތްތައް ފުޅާކުރުމަކީ އިންތިހާއަށް މުހިންމު ކަމެކެވެ. ދިވެހިރާއްޖެއަކީ ޖަޒީރާ ރަށްތަކެއްގެ މައްޗަށް އެކުލެވިގެންވާ ޤައުމެއް ކަމުން، ހުރިހާ ރައްޔިތުންނަށް ފަސޭހައިން ބޭންކިންގ ޚިދުމަތްތައް ލިބޭނެ ގޮތް ހެދުމަކީ، ޒަމާނުއްސުރެ ކުރިމަތިވެފައިވާ ގޮންޖެހުމެކެވެ. ނަމަވެސް، ސަރުކާރުގެ އިސްނެގުމާއިއެކު ދިވެހިރާއްޖޭގެ އެންމެ ބޮޑު ބޭންކު، ބޭންކް އޮފް މޯލްޑިވްސް (ބީއެމްއެލް) އިން ރާއްޖޭގެ ހުރިހާ މީހުންދިރިއުޅޭ ރަށަކަށް އޭޓީއެމް ޚިދުމަތް ފުޅާކުރުމަށް ފަށާފައިވާ މަޝްރޫޢަކީ، ދިވެހި ބޭންކިންގ ދާއިރާއަށް އައި ތާރީޚީ ކުރިއެރުމެއް ކަމަށް ބުނެވިދާނެއެވެ.

ބޭންކް އޮފް މޯލްޑިވްސް (ބީއެމްއެލް) އިން ޤައުމުގެ ފުރަތަމަ އޭޓީއެމް މާލޭގައި ތަޢާރަފުކުރީ 2000 ވަނަ އަހަރުގައެވެ. މިއީ ދިވެހިރާއްޖޭގައި ބޭންކިންގ ޚިދުމަތްތައް ލުއިފަސޭހަކުރުމުގެ އައު ދައުރެއްގެ ފެށުމެވެ. އެއަށްފަހު ފާއިތުވެގެން ދިޔަ 24 އަހަރުގެ ތެރޭގައި، އޭޓީއެމް ޚިދުމަތް މީހުންސިރިއުޅޭ 81  ރަށަށް ފޯރުކޮށްދެވުނު ނަމަވެސް، ރާއްޖޭގެ ގިނަ ރަށްރަށުގެ ރައްޔިތުންނަށް ފައިސާ ނެގުމަށް ނުވަތަ އަމިއްލައަށް ބޭންކިންގ ޚިދުމަތް ހޯދުމަށް ސީދާ ފުރުޞަތެއް ނެތި އުޅެން ޖެހިފައި ތިބީ ދިރިއުޅުމަށް އެޅުނު ވަރަށް ބޮޑު ހުރަހެއްގެ ގޮތުގައެވެ.

މިއަދު 2025 ވަނަ އަހަރަށް ބަލާއިރު، މިކަމުގެ ޙާލަތަށް ވަނީ ބޮޑު ކުރިއެރުމެއް އައިސްފައެވެ. ބީއެމްއެލްއިން އެންމެ އަށް މަސްދުވަހުގެ ތެރޭގައި އިތުރު 95  ރަށުގައި އޭޓީއެމް ޤާއިމުކޮށްފައިވަނީ، ފާއިތުވީ ދިހަވަރަކަށް އަހަރުގެ ތެރޭގައި ޙާޞިލުކުރެވުނު މިންވަރަށްވުރެ މާ ބޮޑު ކުރިއެރުމެކެވެ. މިއަހަރު އެކަނި 95 ރަށުގައި އޭޓީއެމް ޤާއިމުކުރެވިފައިވާއިރު، އއ. މަންދޫގައި ޤާއިމުކުރެވުނީ ބީއެމްއެލްގެ 250 ވަނަ އޭޓީއެމްއެވެ. މިކަމުން ދައްކުވައިދެނީ ބޭންކިންގ ޚިދުމަތް ރާއްޖޭގެ ހުރިހާ ކަންކޮޅަކަށް ފޯރުކޮށްދިނުމަށް ސަރުކާރުން ކުރަމުންދާ މަސައްކަތެވެ.

ތަފާސްހިސާބުތަކުން ދައްކާގޮތުގައި، ބޭންކް އޮފް މޯލްޑިވްސްގެ އޭޓީއެމް ވިއުގައިން މާލޭގައި ދުވާލަކު އެވްރެޖްކޮށް 14,000 މުޢާމަލާތް ހިންގައި، 78 މިލިއަން ރުފިޔާ ދައުރުކުރެވެއެވެ. އަތޮޅުތަކުގައި މި އަދަދު ހުންނަނީ ދުވާލަކު 9,000 މުޢާމަލާތުގައި، އަދި ދައުރުކުރެވޭ ފައިސާގެ އަދަދު 25 މިލިއަން ރުފިޔާގައެވެ.

ބޭންކް އޮފް މޯލްޑިވްސްއިން ރަށްރަށުގައި ޤާއިމުކުރާ އޭޓީއެމްތަކަކީ ފައިސާ ނެގުމާއި ޖަމާކުރުމުގެ އިތުރުން އަސާސީ ބޭންކިންގ ޚިދުމަތްތައް ފޯރުކޮށްދޭ ވަސީލަތްތަކެކެވެ. މި މަޝްރޫޢުގެ ސަބަބުން ރާއްޖޭގެ ކޮންމެ ރަށަކުންވެސް ބޭންކިންގ ޚިދުމަތް ލިބުމުގެ މަގު ތަނަވަސްވެގެންދާނެ ކަމަށް ސަރުކާރުން ލަފާކުރެއެވެ. މީގެ އިތުރުން، ފަތުރުވެރިކަން ކުރިއަރާފައިވާ ބައެއް ރަށްރަށުގައި ޑޮލަރު އޭޓީއެމް ބެހެއްޓުމުގެ މަސައްކަތްވެސް ޤައުމީ ބޭންކުން ކުރިއަށް ގެންދަމުންދެއެވެ.

ގުޅިފައިވާ ޤައުމެއްގެ ގޮތުގައި ކުރިއަށް ދިއުމަށްޓަކައި، މާލީ ޚިދުމަތްތައް ހުރިހާ ރައްޔިތުންނަށް ފަސޭހަކޮށްދިނުމަކީ ކޮންމެހެން ބޭނުންތެރި ކަމެކެވެ. ބީއެމްއެލްގެ މި ތާރީޚީ މަޝްރޫޢުގެ ސަބަބުން، ދިވެހިރާއްޖޭގެ ރައްޔިތުންގެ ދިރިއުޅުމަށް ބޮޑު ހެޔޮ ބަދަލެއް އަންނާނެއެވެ.

މިހާރު ދިވެހިރާއްޖޭގެ ރަށްތަކުގެ ތެރެއިން  އޭޓީއެމް ޚިދުމަތް ޤާއިމުކުރަން ކުރިއަށް ހުރި ރަށްތަކަކީ:

• ލ. އަތޮޅުގެ 7 ރަށް

• ޅ. އަތޮޅުގެ 1 ރަށް

• އައްޑޫ ސިޓީގެ 2 ރަށް

ބޭންކް އޮފް މޯލްޑިވްސްއިން ހާމަކުރައްވާފައިވާ ގޮތުގައި، ޤައުމީ ފެންވަރުގައި ފައިސާގެ ޚިދުމަތްތައް ހޯދުމުގެ ފުރުޞަތު ހުރިހާ ރައްޔިތުންނަށް ކަށަވަރުކޮށްދިނުމުގެ ވަޢުދު ފުއްދުމަށްޓަކައި، ކުރިއަށްއޮތް ދުވަސްތަކުގެ ތެރޭގައި އޭޓީއެމްގެ ފުރިހަމަ ކަވަރޭޖް ހަމަކުރުމަށް ބޭންކުން ވަނީ އަމާޒު ހިފާފައެވެ.

ގައުމީ ފެންވަރުގައި އޭޓީއެމް މަޝްރޫއުގެ ތަފްސީލު

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ އިސްނެގުމުގެ ދަށުން، ބޭންކް އޮފް މޯލްޑިވްސް (ބީއެމްއެލް) އިން "މުޅި ރާއްޖެއަށް ބީއެމްއެލް އޭޓީއެމް" ގެ ނަމުގައި ފަށާފައިވާ މި މުހިންމު މަޝްރޫޢު ރަސްމީކޮށް އިފްތިތާޙު ކުރެވުނީ 2024 ވަނަ އަހަރުގެ ނޮވެމްބަރު މަހުގައެވެ. މި މަޝްރޫޢުގެ ދަށުން ބީއެމްއެލްއާއި މިނިސްޓްރީ އޮފް އިކޮނޮމިކް ޑިވެލޮޕްމަންޓާ ދެމެދު އެއްބަސްވުމެއްގައި ސޮއިކުރެވުނެވެ.

މި މަޝްރޫޢުގެ މައިގަނޑު މަޤްޞަދަކީ ޤައުމުގެ މާލީ ޚިދުމަތްތަކަށް ފަސޭހަކަމާއެކު ވާޞިލުވުމުގެ ފުރުޞަތު ފުޅާކުރުމެވެ. އެގޮތުން، 2025 ވަނަ އަހަރު ނިމުމުގެ ކުރިން ދިވެހިރާއްޖޭގެ ކޮންމެ އާބާދީ އޮންނަ ރަށެއްގައި އޭޓީއެމްގެ ޚިދުމަތް ޤާއިމުކުރުމަށް ވަނީ އަމާޒުކުރެވިފައެވެ.

މި މަޝްރޫޢަކީ އޮޕަރޭޝަނަލް އަދި ލޮޖިސްޓިކަލް ގޮތުން ގިނަގުނަ ގޮންޖެހުންތަކެއް ހުރި މަސައްކަތެކެވެ. 800 ކިލޯމީޓަރުގެ ކަނޑު ސަރަޙައްދެއްގައި ފެތުރިފައިވާ 180 އަށްވުރެ ގިނަ އާބާދީ އޮންނަ ރަށްތަކުގައި ފައިސާގެ ޚިދުމަތް ފޯރުކޮށްދިނުމާއި، އުމްރާނީ ވަސީލަތްތައް ޤާއިމުކުރުމާއި، އިތުބާރުހުރި މުވާޞަލާތީ ވިއުގައެއް ޤާއިމުކުރުން ހިމެނެއެވެ.

މުހިންމު ތަފާސް ހިސާބުތައް (2025 އޮކްޓޯބަރު މަހާ ހަމައަށް):

• އޭޓީއެމްގެ ޚިދުމަތް ފުރަތަމަ ތަޢާރަފުކުރެވުނު އަހަރު: 2000

• އޭޓީއެމް ޤާއިމުކުރެވުނު ރަށްތަކުގެ އަދަދު (2000–2024): 81  ރަށް

• އޭޓީއެމް ޤާއިމުކުރެވުނު ރަށްތަކުގެ އަދަދު (2025 ގެ ފުރަތަމަ 8 މަސް): 95  ރަށް

• ޤައުމީ ފެންވަރުގައި ޤާއިމުކުރެވުނު އޭޓީއެމްގެ ޖުމްލަ އަދަދު: 250 އޭޓީއެމް

• މިވަގުތު އޭޓީއެމް ނެތް  ރަށްތަކުގެ އަދަދު: 10 ރަށް

• މަޝްރޫޢުގެ އަމާޒު: 2025 ނިމޭއިރު %100 އޭޓީއެމް ކަވަރޭޖް ހާސިލުކުރުން

• މަޝްރޫޢު ފެށުނު ތާރީޚު: 2024 ނޮވެމްބަރު

• މަޝްރޫޢުގެ ބައިވެރިން: ބޭންކް އޮފް މޯލްޑިވްސް، މިނިސްޓްރީ އޮފް އިކޮނޮމިކް ޑިވެލޮޕްމަންޓް

މި މަޝްރޫޢުގެ ސަބަބުން ދިވެހިރާއްޖޭގެ ހުރިހާ ކަންކޮޅުތަކެއްގައި މާލީ ޚިދުމަތްތަކަށް ވާޞިލުވުމުގެ ފުރުޞަތު ފުޅާވެ، ރައްޔިތުންނަށް ފަސޭހަކަމާއެކު ފައިސާ ނެގުމާއި ޖަމާކުރުމުގެ ޚިދުމަތް ލިބިގެންދާނެއެވެ. މީގެ އިތުރުން، މި މަޝްރޫޢަކީ ޤައުމުގެ އިޤްތިޞާދީ ތަރައްޤީއަށް މަގުފަހިކޮށްދޭނެ މުހިންމު ފިޔަވަޅެއް ކަމުގައިވެސް ބެލެވެއެވެ.

ބައެއް ފަރާތްތަކުން މި މަޝްރޫޢަށް "ކުޑަ" މަޝްރޫޢެއްގެ ނަމުން ނިސްބަތްކުރި ނަމަވެސް، ހަޤީޤަތުގައި މިއީ، ފާއިތުވެގެންދިޔަ އަހަރުތަކުގެ ތެރޭގައި ގައުމީ ފެންވަރުގައި ހިންގުނު އެންމެ ވަރުގަދަ އަދި މުހިންމު އުމްރާނީ ތަރައްޤީގެ މަސައްކަތްތަކުގެ ތެރޭގައި ހިމެނޭ ބޮޑު ޕްރޮޖެކްޓެކެވެ. މިއީ ހަމައެކަނި ފައިސާ ނަގާ މެޝިންތަކެއް ގާއިމުކުރުމަށްވުރެ މާބޮޑު، މާ ފުން މިނުގެ ބަދަލެއްގެ ފެށުން ކަމަށް ވެގެންދިޔަ މަސައްކަތެކެވެ. މިއީ ދިވެހި ރައްޔިތުންގެ ދިރިއުޅުމަށް ހެޔޮ ބަދަލެއް ގެނެސްދޭނެ، ގައުމުގެ މާލީ ބިންގާ ވަރުގަދަކޮށްދޭނެ މަޝްރޫޢެކެވެ.

އެތައް  އަހަރެއް ވަންދެން، ކައިރި ރަށްރަށުގެ މީހުންނަށް ފައިސާ ނެގުމަށް ނުވަތަ ބޭންކިންގގެ އެހެނިހެން ހިދުމަތްތައް ހޯދުމަށް އަތޮޅުވެރިކަން ކުރާ ރަށަށް ދަތުރުކުރަން ޖެހިފައި އޮތީ ބޮޑު ބުރައެއްގެ ގޮތުގައެވެ. ދަތުރުފަތުރުގެ ދަތިކަމާއި، ހަރަދުގެ ބޮޑުކަމަކީ އެފަރާތްތަކަށް މާލީ ހިދުމަތްތަކުން ބޭނުންވާ ފަސޭހަކަން ލިބުމަށް ހުރަހަކަށްވެފައިވާ ކަމެކެވެ. ނަމަވެސް މިއަދު، މި މަންޒަރު ވަނީ މުޅިން ބަދަލުވެފައެވެ. ގާތްގަނޑަކަށް ކޮންމެ ގޭބިސީއަކަށްވެސް އުނދަގުލަކާނުލާ، އެއްދުވަހުން ފައިސާގެ ހިދުމަތްތައް ލިބޭނެ މަގު ވަނީ ފަހިވެފައެވެ.މިއީ ރައްޔިތުންނަށް ދިރިއުޅުމުގެ ފެންވަރު ރަނގަޅުކޮށްދީ، ވަގުތާއި ފައިސާގެ ބޮޑު ހަރަދަކުން ސަލާމަތްކޮށްދޭ މަސައްކަތެކެވެ.

މާންދޫގައި ބީއެމްއެލްގެ 250 ވަނަ އޭޓީއެމް ގާއިމުކުރުމަކީ  ގައުމީ ފެންވަރުގައި ގެނައި ބޮޑު ބަދަލެއްގެ ރަމްޒެކެވެ. މިއީ ހަމަހިމޭން ކަމާއެކު ދިވެހިރާއްޖޭގެ މާލީ މަންޒަރު ބަދަލުކުރަމުން އަންނަ އިންގިލާބެއްގެ ފެށުން ހާމަކޮށްދޭ ކަމެކެވެ. ކުރީގެ 24 އަހަރުގެ ތެރޭގައި އެންމެ 81 ރަށަށް އޭޓީއެމް ހިދުމަތް ލިބިފައިވާއިރު، މި ސަރުކާރުގެ ދަށުން، އެންމެ 8 މަސް ދުވަހުގެ ތެރޭގައި 95 އާ ރަށަށް މި ހިދުމަތް ލިބިފައިވުމަކީ، މި މަސައްކަތުގެ ބާރުމިނާއި ފުޅާކަން ހާމަކޮށްދޭ ދަލީލެކެވެ.

މިއީ "ކުޑަ މަޝްރޫޢެއް" ނޫނެވެ. މިއީ ގައުމީ ފެންވަރުގައި ހިންގާ މާލީ އުމްރާނީ ތަރައްގީއެކެވެ. ކޮންމެ ދުވަހެއްގެ ދިރިއުޅުމަށް އަސަރުކުރާ، ރަށްރަށުގެ އިގްތިސާދަށް އެހީތެރިވެދޭ، އަދި ގައުމީ އެއްބައިވަންތަކަން ވަރުގަދަކޮށްދޭ މަސައްކަތެކެވެ. މިއީ ރަށްފުށުގެ ރައްޔިތުންނަށް މާލީ މިނިވަންކަން ހޯދައިދީ، އިގްތިސާދީ ފުރުސަތުތައް ފަހިކޮށްދޭ ބިންގަލެކެވެ. މި މަސައްކަތުގެ ސަބަބުން، ރަށްރަށުގެ ވިޔަފާރިތަކަށް ފަސޭހަތައް ލިބި، އާމްދަނީ އިތުރުވެ، ދިރިއުޅުމުގެ ފެންވަރު ރަނގަޅުވާނެއެވެ.

2025 ވަނަ އަހަރު ނިމޭއިރު، ދިވެހިރާއްޖޭގެ ތާރީހުގައި ފުރަތަމަ ފަހަރަށް، ކޮންމެ  ރަށަކަށް  ބޭންކިންގ ހިދުމަތް ލިބޭނެއެވެ. މިއީ ހަމައެކަނި ވަޢުދެއް ނޫނެވެ. މިއީ ހަޤީޤަތަކަށް ހަދަމުން އަންނަ ހުވަފެނެކެވެ. އެއްރަށާއި އަނެއްރަށަށް ގައުމު ގުޅުވައިދޭ ހަމަހިމޭން އިންގިލާބެކެވެ. މި އިންގިލާބުގެ ސަބަބުން، ދިވެހިރާއްޖޭގެ ހުރިހާ ރައްޔިތުންނަށް މާލީ ހިދުމަތްތައް ހަމަހަމަކަމާއެކު ލިބި، މުޅި ގައުމު އިގްތިސާދީ ގޮތުން ކުރިއަރައި، ދެމިތިބޭނެ ދިރިއުޅުމެއް ބިނާކުރުމަށް މަގުފަހިވެގެންދާނެއެވެ.