ސިނަމާލެ ބުރިޖާއި ހައިވޭ ސަރަހައްދުގައި ފާއިތުވި ހަފުތާ ތެރޭގައި ޖުމުލަ 40 އެކްސިޑެންޓް ހިނގާފައިވޭ : ފުލުހުން

މާލޭގެ ސިނަމާލެ ބުރިޖާއި ހައިވޭ ސަރަހައްދުގައި ފާއިތުވި ހަފުތާ ތެރޭގައި ޖުމުލަ 40 އެކްސިޑެންޓް ހިނގާފައިވާ ކަމަށް ދިވެހި ފުލުހުންގެ ޚިދުމަތުން މިއަދު ހާމަކޮށްފިއެވެ. މި އެކްސިޑެންޓްތަކުގައި 4 މީހަކަށް އަނިޔާވެ، 37 އުޅަނދަކަށް ގެއްލުން ލިބިފައިވެއެވެ.

ފުލުހުންގެ ފަރާތުން އެކްސްގައި މިއަދު އާންމުކުރި ތަފާސްހިސާބުން ދައްކާގޮތުގައި، މި މަހުގެ ފަސްވަނަ ދުވަހުން ފެށިގެން 11 ވަނަ ދުވަހުގެ ނިޔަލަށް ހަފުތާއެއްގެ ތެރޭގައި މިހާ ގިނަ އެކްސިޑެންޓްތައް ރިޕޯޓުކޮށްފައިވަނީ މި ސަރަހައްދުގައެވެ.

ހިނގި އެކްސިޑެންޓްތަކަށް ބަލާއިރު، އެންމެ ގިނަ އެކްސިޑެންޓްތައް ހިނގާފައިވަނީ ބުރާސްފަތި ދުވަހުއެވެ. އެ ދުވަހު ބްރިޖާއި ހައިވޭ ސަރަހައްދުން ޖުމުލަ 10 އެކްސިޑެންޓް ފުލުހުންނަށް ރިޕޯޓްކޮށްފައިވެއެވެ. އަދި، އެ ހަފުތާގައި އެންމެ މަދުން އެކްސިޑެންޓް ހިނގާފައިވަނީ ހުކުރު ދުވަހުއެވެ. އެ ދުވަހު ރިޕޯޓްކޮށްފައިވަނީ ދެ އެކްސިޑެންޓެވެ.

Traffic Stats from 5-11 Oct 2025 in Male’, Bridge and Highway: A total of 40 accidents were reported, with the highest involving motorcycle collisions: 11 motorcycle-to-car and 8 motorcycle-to-motorcycle. pic.twitter.com/ZqCL2tNsg6

— Maldives Police (@PoliceMv) October 14, 2025

މި ހާދިސާތަކުގައި އަނިޔާވި ހަތަރު މީހުންގެ ތެރެއިން އެކަކަށް ސީރިއަސް އަނިޔާ ލިބިފައިވާ ކަމަށް ފުލުހުންގެ ތަފާސްހިސާބުން ފާހަގަކުރެއެވެ. މީގެ އިތުރުން 37 އުޅަނދަކަށް ގެއްލުން ލިބިފައިވާކަމަށްވެސް ފުލުހުން ބުނެއެވެ.

ފުލުހުން ބުނި ގޮތުގައި، މި މުއްދަތުގައި ދިމާވި އެކްސިޑެންޓްތަކުގެ ތެރެއިން 75 އިންސައްތަ އެކްސިޑެންޓް ހިނގާފައިވަނީ ދުވާލު ގަޑީގައެވެ. މިދިޔަ ހަފުތާގައި ހިނގި 40 އެކްސިޑެންޓްގެ ތެރެއިން 30 އެކްސިޑެންޓް ހިނގީ ދުވާލު ވަގުތުތަކުގައެވެ. ރޭގަނޑު ހިނގީ 10 އެކްސިޑެންޓެވެ.

އެކްސިޑެންޓްތައް ހިނގިގޮތަށް ބަލާއިރު އެންމެ ގިނައިން އެކްސިޑެންޓް ވެފައިވަނީ ސައިކަލަކާއި ކާރެއް ޖެހިގެންނެވެ. އެފަދަ 11 އެކްސިޑެންޓް ހިނގާފައިވެއެވެ. އަދި، ސައިކަލަކާއި ސައިކަލެއް ޖެހިގެން އަށް އެކްސިޑެންޓް ހިނގިއެވެ. ކާރަކާއި ކާރެއް ޖެހިގެން ހަތަރު އެކްސިޑެންޓް، އަދި ކާރަކާއި ޕިކަޕެއް ޖެހިގެން ތިން އެކްސިޑެންޓް ވަނީ ހިނގާފައެވެ. ފުލުހުން މި ތަފާސްހިސާބު އާންމުކޮށްފައިވަނީ މަގުމަތީގެ ސަލާމަތަށް އިތުރަށް ސަމާލުވުމަށް ހަނދާންކޮށްދިނުމުގެ ގޮތުންނެވެ.