އެއާއޭޝިއާއިން 130 މަންޒިލަކަށް 12 މިލިއަން ހިލޭ ސީޓް ލިބޭ ޕްރޮމޯޝަނެއް

އެއާއޭޝިއާއިން މިއަހަރުގެ ނިމުމާއެކު އެކުންފުނީގެ މަޝްހޫރު ހިލޭ ސީޓް ޕްރޮމޯޝަން އަނބުރާ ގެނެސްދީފިއެވެ. މި ޕްރޮމޯޝަންގައި 12 މިލިއަން ޑިސްކައުންޓް ސީޓް ހިމެނެއެވެ. އެއާއޭޝިއާގެ ވިއުގައިގައި ހިމެނޭ 130 އަށްވުރެ ގިނަ މަންޒިލަށް ދަތުރުކުރުމުގެ ފުރުސަތު މި ކެމްޕޭނުން ހުޅުވާލައިފައިވާއިރު، 2025 ގެ ފުރަތަމަ ދެކުއާޓަރުގައި ދަތުރުފަތުރަށް ޝައުގުވެރިކަން އިތުރުވާނެކަމަށް ބެލެވެއެވެ.

ސިންގަޕޫރުން ކުއާލަލަމްޕޫރު، ޕެނަންގް އަދި އިޕޯއަށް ކުރާ ދަތުރުތަކުގައި ބޭސް ފެއަރ އަކީ ސުމެއްކަމުގައި ހަމަޖައްސާފައިވާއިރު، ލަންކާވީ، ކޯޓާ ކިނަބަލޫ، ކުޗިންގް، ޕުކެޓް، ޖަކާތާ އަދި އިތުރު މަންޒިލުތަކަށް ކުރާ ދަތުރުތައް 69 ސިންގަޕޫރު ޑޮލަރުން ފެށިގެން ލިބެން ހުންނާނެއެވެ.

މީގެ އިތުރުން، އެއާއޭޝިއާ އެކްސްއިން 17 އަހަރު ފުރުމުގެ މުނާސަބަތުގައި ވަނީ ބޮޑު ސޭލްއެއް ފަށައިފައެވެ. މި ސޭލްގައި ނަ ޓްރަންގް، ލަބުއަން ބަޖޯ، ކަތުމަންޑޫ، ސޯލް، އަލްމާޓީ، ހޮކައިޑޯ އަދި އިތުރު މަންޒިލުތަކަށް ކުރާ ދަތުރުތައް ހިމެނެއެވެ. މި ދަތުރުތަކުގެ އަގު ފެށެނީ 188 ސިންގަޕޫރު ޑޮލަރުންނެވެ. 

އެއާއޭޝިއާ އޭވިއޭޝަން ގްރޫޕްގެ ޗީފް ކޮމާޝަލް އޮފިސަރ ޕޯލް ކެރޯލް ވިދާޅުވީ މިއަހަރު ދަތުރުފަތުރަށް ޝައުގުވެރިކަން އިތުރުވެފައިވާކަން ފާހަގަކުރެވޭ ކަމަށާއި، 12 މިލިއަން ޕްރޮމޯޝަނަލް ގޮނޑި ހުޅުވާލައިގެން މިކަން އިތުރަށް ކުރިއެރުވުމަށް މަސައްކަތްކުރާ ކަމަށެވެ.

އެއާއޭޝިއާގެ ހިލޭ ސީޓް އަދި "ބިގް ސޭލް"  2 ނޮވެމްބަރ 2024 ގައި މެންދުރު 12:00 (ޖީއެމްޓީ+8) ގައި ވަނީ ފަށައިފައެވެ. މި ޕްރޮމޯޝަން 10 ނޮވެމްބަރ 2024 ގެ ނިޔަލަށް ކުރިއަށްދާނެއެވެ. މި ޕްރޮމޯޝަންގެ ދަށުން ބުކްކުރެވޭ ދަތުރުތައް 21 އޭޕްރިލް 2025 އާއި 28 މާރިޗު 2026 އާ ދެމެދު ކުރެވޭނެއެވެ.

ހިލޭ ސީޓްގެ އަގުގައި ހިމެނެނީ ބޭސް ފެއަރ އެކަނި ކަމަށާއި، އެއަރޕޯޓް ޓެކްސް، ފިއުލް ސަރޗާޖް އަދި އެހެނިހެން ފީތައް މީގެ ތެރޭގައި ނުހިމެނޭ ކަމަށް އެއާއޭޝިއާއިން ބުނެފައިވެއެވެ.