ނިއުކާސްލް ޔުނައިޓެޑުން އާސެނަލް ބަލިކޮށްލައިފި

އިނގިރޭސި ޕްރިމިއާ ލީގުގައި އިއްޔެ ކުޅުނު މެޗެއްގައި ނިއުކާސްލް ޔުނައިޓެޑުން އާސެނަލް ބަލިކޮށްލައިފިއެވެ. ނިއުކާސްލްގެ ސެންޓް ޖޭމްސް ޕާކް ދަނޑުގައި ކުޅުނު މި މެޗު ނިއުކާސްލުން ކާމިޔާބުކޮށްފައިވަނީ 1-0 އިންނެވެ.

މެޗުގެ ހަމައެކަނި ލަނޑު ޖަހާފައިވަނީ މެޗުގެ 12 ވަނަ މިނެޓުގައި ނިއުކާސްލްގެ އެލެގްޒެންޑާ އިސާކެވެ. އާސެނަލްގެ ޑިފެންސުން ބޯޅަ ކްލިއާކުރުމުގައި ލަސްވުމުގެ ސަބަބުން އިސާކަށް ލިބުނު ފުރުސަތުގެ ބޭނުން ރަނގަޅަށް ހިފިއެވެ.

މެޗުގެ ފުރަތަމަ ހާފުގައި އާސެނަލްގެ ފަރާތުން އާންމުކޮށް ފެންނަ މޮޅު ކުޅުން ނުފެނުނެވެ. ދެވަނަ ހާފުގައި އާސެނަލުން ބައެއް ބަދަލުތައް ގެނައި ނަމަވެސް ނިއުކާސްލްގެ ޑިފެންސް ވަރަށް ވަރުގަދަ ކަމުން އާސެނަލަށް ލަނޑެއް ނުޖެހުނެވެ.

މި ނަތީޖާއާ އެކު ނިއުކާސްލް މިހާރު އޮތީ 15 ޕޮއިންޓާ އެކު ތާވަލުގެ ނުވަވަނައިގައެވެ. އާސެނަލް މިހާރު އޮތީ 18 ޕޮއިންޓާ އެކު ތާވަލުގެ ހަތަރުވަނައަށް ވެއްޓިފައެވެ.

އިއްޔެ ކުޅުނު އަނެއް މެޗުގައި ނޮޓިންހަމް ފޮރެސްޓުން ވެސްޓް ހޭމް ޔުނައިޓެޑް 3-0 އިން ބަލިކޮށްފިއެވެ. މި ކާމިޔާބީއާ އެކު ފޮރެސްޓް މިހާރު އޮތީ 19 ޕޮއިންޓާ އެކު ތާވަލުގެ ތިންވަނައިގައެވެ. ވެސްޓް ހޭމް އުޅެނީ 11 ޕޮއިންޓާ އެކު ތާވަލުގެ 14 ވަނައިގައެވެ.