ސަނީއަށް ރައްދުވާ ޖިންސީ ގޯނާގެ ތުހުމަތުތަކާ ގުޅޭ މައްސަލަ ފުލުހުން ތަޙުޤީޤުކުރަން ފަށައިފި

މޯލްޑިވްސް ޙަލާލް ޓްރެވަލް ބްރޭންޑުގެ ދަށުން ޓްރެވަލް އެޖެންސީއެއް ހިންގާ އަދި ދާއިރާގެ ޚަބަރުތައް ގެނެސްދޭ މީޑިޔާތައް ހިންގާ ޑރ. ސަނީ ޢުމަރަށް ކުރެވޭ ޖިންސީ ގޯނާގެ ތުހުމަތުތަކާ ގުޅޭ މައްސަލައެއް ފުލުހުންނަށް ހުށަހަޅާފައިނުވި ނަމަވެސް، އެ މައްސަލަ ފުލުހުންގެ ސަމާލުކަމަށް އައިސްފައިވުމުން، މައްސަލަ ތަޙުޤީޤުކުރަން ފަށާފައިވާ ކަމަށް ދިވެހި ފުލުހުންގެ ޚިދުމަތުން އަދު ހާމަކޮށްފިއެވެ.

ޢާއިލާގެ ކުދީންތަކަކަށް ޖިންސީ ގޯނާ ކުރިކަން ފާޅުވުމުން، ސަނީ ޢުމަރު ރާއްޖެ ދޫކޮށް ފިލާފައިވާކަމުގެ އަޑުތައް ވަނީ ފެތުރިފައެވެ. އޭނާ އިއްޔެ ފުރައިގެން ދިޔައީ އިންޑިއާގެ ނިއު ދިއްލީއަށް ކަމަށް ބައެއް މީޑިއާތަކުން ވަނީ ރިޕޯޓުކޮށްފައެވެ.

މި ކަމާ ވިދިގެން ފުލުހުން މިއަދު ބުނީ، މި މައްސަލައާ ގުޅިގެން ބަލަން ޖެހޭ ކަންކަން ބެލުމުގެ މަސައްކަތް މިހާރު ފަށާފައިވާ ކަމަށެވެ.

ބައެއް މީޑިޔާތަކުގައި ރިޕޯޓުކޮށްފައިވާ ގޮތުގައި، ސަނީއަށް ކުރެވޭ ތުހުމަތަކީ، އޭނާގެ އަނބިމީހާގެ ޢާއިލާގެ ތިން ކުއްޖަކަށް ޖިންސީ ފުރައްސާރަ ކުރުމުގެ ތުހުމަތެވެ.
 
އެ ކުދީންގެ ޖިންސާއި ޢުމުރާ ބެހޭ ތަފްޞީލުތައް ބައެއް މީޑިޔާތަކުން ޙިއްޞާކޮށްފައިވީ ނަމަވެސް، ފުލުހުން އަދި އެއިން އެއްވެސް މަޢުލޫމާތެއް ކަމަވަރުކޮށްދީފައެއް ނުވެއެވެ.