އަތޮޅު ކައުންސިލުތައް އުވާލިޔަސް ވަޒީފާތަކެއް ނުގެއްލޭނެ: ވަޒީރު އާދަމް ޝަރީފް ޢުމަރު

ލާމަރުކަޒީ ޤާނޫނަށް ގެނައި ބަދަލާ އެކު، އަތޮޅު ކައުންސިލުތައް އުވާލިޔަސް، މުވައްޒަފުންގެ މަޤާމުތަކާއި ވަޒީފާތައް ނުގެއްލޭނެ ކަމުގައި ސިޓީތަކާއި އިދާރީ ދާއިރާތައް ހިނގުމާއި ޢާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ.

މާލެއަތޮޅު ކައުންސިލުން އިސްނަގައިގެން ކުރިއަށްގެންދާ "ކާފު ފޯރަމް" އިފްތިތާޙުކުރުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުން ވަޒީރު އާދަމް ޝަރީފް ވިދާޅުވީ، އަތޮޅުތަކުގެ ކަންކަމުގައި މަޝްވަރާކޮށް، މައްސަލަތައް ޙައްލުކުރުމުގައި ގުޅިގެން މަސައްކަތްކުރުމަކީ ވަރަށް މުހިންމު ކަމެއް ކަމަށެވެ.

އަތޮޅުގެ ކަންކަން ކުރިއަށް ގެންދިއުމަށްޓަކައި އެއް މޭޒެއް ދޮށުގައި ތިބެ މަޝްވަރާކޮށް ޚިޔާލު ބަދަލުކުރުމަކީ ވަރަށް ބޭނުންތެރި ކަމެއް ކަމަށް ވަޒީރު ވިދާޅުވިއެވެ. އަންނަމުންދާ ބަދަލުތަކާ އެކު ވިސްނުމާއި ފިކުރު ބައްޓަންކުރަން ޖެހޭނީ ކުރަން އުޅޭ މަސައްކަތުން ނުކުންނާނެ ނަތީޖާއަށް އަމާޒުކޮށްގެނެވެ. ވީމާ، މި ފޯރަމުގައި ވެސް އެ ވިސްނުމުގެ ދަށުން މަސައްކަތް ކުރެއްވުމަށް ވަޒީރު ވަނީ އެދިވަޑައިގެންފައެވެ.

ލާމަރުކަޒީ ނިޒާމާއި އަދި އަންނަމުންދާ ބަދަލުތަކުގެ މައްޗަށް އަލިއަޅުއްވާލައްވައި ވަޒީރު ވިދާޅުވީ، ފެހި ޤާނޫނޫ އަސާސީން ދިން އެންމެ އަގުބޮޑު ހަދިޔާއަކީ ރާއްޖޭގައި ލާމަރުކަޒީ ނިޒާމު ކަށަވަރުކޮށްދިނުން ކަމަށެވެ. ރައްޔިތުންނަށް ލިބެން ޖެހޭ ބާރުވެރިކަން އެންމެ ފުރިހަމަ މާނާގައި ރައްޔިތުންނަށް ލިބުމަށް މެދުވެރިވި އެންމެ ބޮޑު ސަބަބަކީ ވެސް އެއީ ކަމަށް ވަޒީރު ވިދާޅުވިއެވެ. ނަމަވެސް މި ނިޒާމު އިތުރަށް ތަރައްޤީކުރުމަށްޓަކައި ކުރަން ޖެހޭ ގިނަ މަސައްކަތްތަކެއް ހުރިކަން ވެސް ވަޒީރު ވަނީ ފާހަގަކުރައްވާފައެވެ.

ލާމަރުކަޒީ ނިޒާމަކީ ރައްޔިތުންނާ ގާތުން ވެރިކަން ހިންގާ ނިޒާމެއްކަން އެންމެން ވެސް ޤަބޫލްކުރާއިރު، ރަށެއްގައި ކައުންސިލު ރަނގަޅަށް ހިނގާކަމަށްވާ ނަމަ، އެ ރަށެއްގެ މުހިންމު ހުރިހާ ކަމެއް ނިންމަން ޖެހޭނީ ރައްޔިތުންނަށް ރުޖޫޢަވުމަށް ފަހު، ރައްޔިތުންނާ ގާތުންނެވެ.

ލާމަރުކަޒީ ނިޒާމަށް އަންނަމުންދާ ބަދަލުތަކާ އެކު އަތޮޅު ކައުންސިލުތަކަށް ވާގޮތް އެނގުމަށް ގިނަ ބަޔަކު ތިބީ ބޭނުންވެފައެވެ. މި ގޮތުން، އަތޮޅު ކައުންސިލުތައް އުވުނަސް އަތޮޅުތައް އުވާލެވޭ ގޮތަށް އިޞްލާޙެއް ގެނެސްފައި ނުވާކަމަށް ވަޒީރު ވިދާޅުވިއެވެ. ވީމާ، މިހާރު އައި ބަދަލާ އެކު ކައުންސިލުތަކުގައި ތިބި މުވައްޒަފުންގެ މަޤާމުތަކަށާއި ވަޒީފާތަކަށް އެއްވެސް ބިރެއް ނެތްކަމުގެ ޔަޤީންކަން އެ މަނިކުފާނު ވަނީ ދެއްވާފައެވެ.

އަތޮޅު ކައުންސިލުތަކުގެ ބަދަލުގައި އުފެދޭ އިދާރާތައް އުފެދޭނެކަމަށް ޔަޤީންކުރަނީ އަދި އެ ކަން ނިންމާނީ އެލް.ޖީ.އޭ.ގެ ބޯޑުގެ ފަރާތުން. މި ވަޤުތު ބޯޑުގެ ރައީސަކަށް ވެސް ހުރީ އަޅުގަނޑު. އަޅުގަނޑުމެން ދައުލަތުގެ ކަމާ ބެހޭ ފަރާއްތަކާ މަޝްވަރާކޮށްގެން އަދި މަސައްކަތްތައް ކުރިއަށް ގެންދާއިރު އަޅުގަނޑަށް ޤަބޫލުކުރެވޭ ގޮތުގައި އިދާރާތައް އުފެދިގެން ދާނީ މިހާރު ވެސް އަތޮޅު ކައުންސިލުތައް އޮތް ރަށްރަށުގައި، އެހެންވީމާ އެ ގޮތަކުން މާބޮޑު ބަދަލުތަކެއް އަންނާނެކަމަށް ނުފެނޭ.

ސިޓީތަކާއި އިދާރީ ދާއިރާތައް ހިނގުމާއި ޢާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރު

މިއައި ބަދަލާ އެކު، އަތޮޅުތަކުގައި ދެމުންގެންދާ ޚިދުމަތްތައް ހުއްޓުމެއްނެތި ދެމުންގެންދާނެ ކަމަށާއި، މި ނިޒާމު އިތުރަށް ހަރުދަނާކުރުމަށްޓަކައި ޔަޤީންކަމާއި އިތުބާރާ އެކީގައި ކައުންސިލުތަކާއި ރައްޔިތުންނާ ގުޅިގެން މަސައްކަތްކުރުން މުހިންމު ކަމަށް ވަޒީރު އާދަމް ޝަރީފް ވިދާޅުވިއެވެ. ރަށެށްގައި ހުންނަ އެންމެ މުހިންމު އަދި ރައްޔިތުން އެންމެ ބޮޑަށް ބަރޯސާވާ ތަނަކީ ކައުންސިލު އިދާރާކަން ފާހަގަކުރައްވަމުން ވަޒީރު ވިދާޅުވީ، ރައްޔިތުން ކައުންސިލުތަކާ މެދު ބާއްވާ އިތުބާރާއި ޔަޤީންކަމާއި ޒިންމާދާރީ އެއްދުވަހުން އަނެއް ދުވަހަށް ލިބޭނެ ގޮތަކަށް ކައުންސިލުތަކުގެ މަސައްކަތްތައް ބައްޓަންކުރުމަކީ މުހިންމު ކަމެއް ކަމަށެވެ.

އަތޮޅު ކައުންސިލްތައް އުވާލައި، ރަށާއި ސިޓީ ކައުންސިލުތަކުގެ މެންބަރުންގެ ޢަދަދަށް ބަދަލު ގެނައުމަށް ސަރުކާރުގެ ފަރާތުން ޤާނޫނުތަކަށް ހުށަހެޅި އިޞްލާޙުތައް ރައްޔިތުންގެ މަޖިލިހުން ވަނީ ފާސްކޮށްފައެވެ. ޤާނޫނަށް ހުށަހެޅުނު އިޞްލާޙުގެ ދަށުން، 2000 މީހުންނަށްވުރެ ކުޑަ އާބާދީއެއް އޮންނަ ކޮންމެ ރަށެއްގެ ރަށު ކައުންސިލަށް އިންތިޚާބުކުރާނީ، ކައުންސިލު ރައީސް ހިމެނޭހެން 3 ކައުންސިލަރުންނެވެ. އަދި އެއަށްވުރެ އާބާދީ ބޮޑު ރަށްރަށުގެ ކައުންސިލަށް ޢައްޔަންކުރާނީ، ކައުންސިލް ރައީސް ހިމެނޭހެން 5 ކައުންސިލަރުންނެވެ. ނަމަވެސް މިހާރު ޤާނޫނުގައިވާ ގޮތުން، ހުރިހާ ރަށު ކައުންސިލެއްގައި ވެސް 5 މެންބަރުން ތިއްބަވާނެއެވެ.

މާލެ ސިޓީއާއި، ފުވައްމުލައް ސިޓީ ފިޔަވައި އެހެން ސިޓީތަކުގައި އާބާދީ 10،000 އާއި 25،000 ދެމެދުގެ ޢަދަދެއްނަމަ މޭޔަރު ހިމެނޭހެން 7 ކައުންސިލަރުން، އާބާދީ 25،000 އާއި 50،000 އާ ދެމެދު ނަމަ މޭޔަރު ހިމެނޭހެން 11 ކައުންސިލަރުން، އަދި 50،000 އަށްވުރެ އިތުރުނަމަ މޭޔަރު ހިމެނޭހެން 15 ކައުންސިލަރުން އިންތިޚާބުކުރުމަށް ވަނީ ހުށަހަޅާފައެވެ. އަދި ސިޓީ ކައުންސިލުތަކުގައި އަންހެނުންނަށް ޚާއްޞް ގޮނޑިތައް ކަނޑައަޅާނީ، ހުރިހާ ދާއިރާއެއް ހަމަހަމަވާ ގޮތަށް ދައުރުވާ ގޮތަށް އިލެކްޝަންސް ކޮމިޝަނުން ކަނޑައަޅާ އުޞޫލުގެ ދަށުން ކަމަށް ވެސް، ޤާނޫނަށް ހުށަހެޅި އިޞްލާޙުގައި ވަނީ ބަޔާންކޮށްފައެވެ.