ދާއިރާގެ ރައްޔިތުންނަށް ފޮނުއްވި މެސެޖާ ގުޅިގެން އަސްމާ މަޢާފަށް އެދިވަޑައިގެންފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މާލެ ސަރަޙައްދުގައި ދިރިއުޅޭ ރައްޔިތުންނާ ބައްދަލުކުރެއްވުމަށް ބާއްވަވަމުން ގެންދަވާ ސިލްސިލާ ބައްދަލުވުންތަކުގެ ތެރެއިން، މާފަންނު ރައްޔިތުންނާ އެކު ބާއްވަވާ ބައްދަލުވުމާ ގުޅޭގޮތުން ދާއިރާގެ ރައްޔިތުންނަށް ފޮނުއްވި މެސެޖާ ވިދިގެން ރައްޔިތުންގެ މަޖިލިހުގެ މާފަންނު މެދު ދާއިރާގެ މެންބަރު އަސްމާ ރަޝީދު މަޢާފަށް އެދިވަޑައިގެންފިއެވެ.  

މާފަންނު ރައްޔިތުންނާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބައްދަލުކުރެއްވުމަށް ހަމަޖެހިފައިވަނީ ޑިސެންބަރު 4ވާ ބުރާސްފަތި ދުވަހުގެ ރޭ 8:30ގައެވެ. އެ ބައްދަލުވުން ތާވަލުކޮށްފައި ވަނީ ތާޖުއްދީން ސްކޫލުގެ މާލަމުގައި ބާއްވާ ގޮތަށެވެ. 

ރައީސްގެ އެ ބައްދަލުވުމާ ގުޅޭގޮތުން އަސްމާ، ދާއިރާގެ ރައްޔިތުންނަށް ފޮނުއްވި މެސެޖެއް ކަމަށްބުނެ ބައެއް މީޑިޔާތަކުން އެކި ގޮތްގޮތަށް ވަނީ ރިޕޯޓުކޮށްފައެވެ. އެ ގޮތުން، އެ ބައްދަލުވުމުގައި ރައީސުލްޖުމްހޫރިއްޔާއާއާ ސުވާލެއްކުރަން ނުވަތަ މެސެޖެއް ދޭން ބޭނުންވާ ނަމަ، އެންގުމަށް އެދިވަޑައިގެން، އަސްމާ މެސެޖު ކުރެއްވި ކަމަށް ބައެއް މީޑިޔާތަކުން ރިޕޯޓްކުރިއެވެ. 

އަސްމާކުރެއްވި ކަމަށް ރިޕޯޓްކޮށްފައިވާ އެ މެސެޖާ ގުޅިގެން އެ ކަމަނާއަށް ފާޑުކިޔުން އަމާޒުވިއެވެ. 

މި ކަމުގެ ޙަޤީޤަތް އޮޅުން ފިލުއްވައިދެއްވުމުގެ ގޮތުން އަސްމާ މިއަދު ވަނީ ބަޔާނެއް ޢާންމުކުރައްވާފައެވެ. އެ ބަޔާނުގައި އަސްމާ ވިދާޅުވީ، ރައީސުލްޖުމްހޫރިއްޔާގެ ބައްދަލުވުމާ ގުޅިގެން ނޮވެމްބަރު 26ވަނަ ދުވަހު ފޮނުވި މެސެޖުގެ މާނަ އޮޅޭގޮތަށް ބައެއް ފަރާތްތަކުން މީސްމީޑިޔާގައި މަޢުލޫމާތު ދައުރުކޮށްފައިވާ ކަމަށެވެ. 

އަސްމާ އިތުރަށް ވިދާޅުވީ، އެ މެސެޖަކީ ޖަލްސާގައި އެއްވެސް ސަބަބަކާހުރެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާ ސީދާ ސުވާލު ދެންނެވުމުގެ ފުރުޞަތު ނުލިބޭ ފަރާތްތަކުގެ ޚިޔާލާއި ކަންބޮޑުވުންތައް ރައީސުލްޖުމްހޫރިއްޔާއާ ހަމައަށް ފޯރުކޮށްދެއްވުމުގެ މަޤުޞަދުގައި ފޮނުއްވި މެސެޖެއް ކަމަށެވެ. 

އެއީ ދާއިރާގެ ރައްޔިތުންގެ ޙައްޤުގައި އަދި އަސްމާގެ އަމިއްލަ ޙައިސިއްޔަތުން ފޮނުވި މެސެޖެއްކަމަށް ބަޔާނުގައި ވިދާޅުވެފައިވެއެވެ. 

އެހެނީ، މާފަންނު މެދު ދާއިރާގެ ކޮންމެ ރައްޔިތަކަށް ވެސް އެ ބޭފުޅެއްގެ ޚިޔާލާއި ކަންބޮޑުވުމެއް ވެސް ފާޅުކުރެއްވޭނެ ފުރުޞަތު ލިބުމަކީ އަޅުގަނޑަށް ނުހަނު މުހިއްމު ކަމަކަށް ވާތީއެވެ. އަޅުގަނޑު ފޮނުވި މެސެޖާ ގުޅިގެން އެއްވެސް ބޭފުޅަކަށް އޮޅުމެއް އަރާފައިވާ ނަމަ ނިހާޔަތަށް މަޢާފަށް އެދެމެވެ.

އަސްމާގެ ބަޔާނުގައި ވެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މާލެ ސަރަޙައްދުގެ ރައްޔިތުންނާ ބައްދަލުކުރެއްވުމަށް ފައްޓަވާފައިވާ ސިލްސިލާ ބައްދަލުކުރެއްވުންތަކުގެ ތެރެއިން މިހާތަނަށް ވަނީ ވިލިމާލޭ އަދި މަންޗަންގޮޅީ ރައްޔިތުންނާ ބައްދަލުކުރައްވާފައެވެ.