ވިއްސާރައިގެ ސަބަބުން ސްރީލަންކާއިން ނުފުރި ލަސްވާ ފަރާތްތަކަށް ވިސާގެ ލުއިތަކެއް ދެނީ

ސްރީލަންކާއަށް މިހާރު ކުރިމަތިވަމުންދާ ގަދަ ވިއްސާރައާއި ގޯސް މޫސުމީ ޙާލަތުގެ ސަބަބުން ފްލައިޓްތައް ކެންސަލްވުމާ ގުޅިގެން އެ ޤައުމުން ނުފުރި ލަސްވާ ފަރާތްތަކުގެ ވިސާގައި ލުއިތަކެއް ދިނުމަށް ސްރީލަންކާގެ ޑިޕާޓްމަންޓް އޮފް އިމިގްރޭޝަން އެންޑް އެމިގްރޭޝަނުން ނިންމައިފިއެވެ.

އެ ޤައުމުގައި ހުންނަ ދިވެހި ސަފާރާއިން ހާމަކުރީ، މި ވަޤުތު ސްރީލަންކާގައި ތިބި އެހެން ޤައުމުތަކުގެ ރައްޔިތުންނަށް މި ޙާލަތުގައި ނުފުރި ލަސްވުމާ ގުޅިގެން ވިސާ ހަމަވުމުގެ މައްސަލަތައް ކުރިމަތިވަމުންދާތީ، ސްރީލަންކާގެ އިމިގްރޭޝަނުން އެ ކަމުގައި ލުއި ގޮތްތަކެއް ހަމަޖައްސައިދީފައިވާ ކަމަށެވެ. އެ ގޮތުން، މި މަހުގެ 28ވަނަ ދުވަހު ފުރަން ހަމަޖެހިފައިވާ ފަރާތްތަކުގެ ތެރެއިން މޫސުން ގޯސްވެ، ފްލައިޓްތައް ކެންސަލްކުރުމާ ގުޅިގެން ސްރީލަންކާއިން ނުފުރި ތިބި ފަރާތްތަކުގެ ވިސާގެ ފީ އާއި، ވިސާ ހަމަވެ އިތުރަށް މަޑުކުރަން ޖެހޭ މުއްދަތުގައި ދައްކަން ޖެހޭ ޖޫރިމަނާ ފީތައް މަޢާފުކުރުމަށް ސްރީލަންކާގެ އިމިގްރޭޝަނުން ނިންމާފައިވާ ކަމަށް ސަފާރާއިން ބުނެއެވެ.

Visa Facilitation Measures for Foreign Nationals Affected by Adverse Weather Conditions:-

For urgent assistance, please contact:
High Commission Hotline: +94 76 881 6666
Email: [email protected] pic.twitter.com/APVspRrzGd

— Maldives in SriLanka (@MDVinSriLanka) November 29, 2025

ކުރު މުއްދަތަކަށް ދަތުރުކުރާ ފަތުރުވެރީންގެ ވިސާއާއި، ބިޒްނަސް ވިސާ އަދި ރެޒިޑެންސް ވިސާ ފުރިހަމަ ކުރުމަށް 7 ދުވަހުގެ މުހުލަތެއް ދިނުމަށް ވެސް ސްރީލަންކާގެ އިމިގްރޭޝަނުން ވަނީ ނިންމާފައެވެ. އަދި މި ޚިދުމަތްތައް ސްރީލަންކާގެ އިމިގްރޭޝަންގެ ވެބްސައިޓު މެދުވެރިކޮށް ލިބޭނެ އިންތިޒާމު ވަނީ ހަމަޖައްސާފައެވެ. 

ސްރީލަންކާއަށް މިހާރު ކުރަމުންދާ ވިއްސާރައިގެ ސަބަބުން އެ ޤައުމުގައި ވަނީ ކުއްލި ޙާލަތު ޢިއުލާންކޮށްފައެވެ. އެ ޤައުމަށް ކުރަމުންދާ ވިއްސާރައަކީ، ޠޫފާނު "ދީތުވާ"އާ ގުޅިގެން ކުރާ ވިއްސާރައެކެވެ. އެ ޠޫފާނު މިހާރު ސްރީލަންކާއާ ދުރަށް ދަތުރު ކުރަމުން ދިޔަ ނަމަވެސް، ވިއްސާރައިގައި އެ ޤައުމަށް މިހާރު ވަނީ ފެންބޮޑުވުމާއި ބިންގަނޑު ކަނޑައިގެން ދިޔުން ފަދަ ނުރައްކާތެރި ކަންކަން ކުރިމަތިވެފައެވެ. މީގެ އިތުރުން، ލަންކާގެ މޫސުމީ ޙާލަތުގެ ސަބަބުން މިހާތަނަށް 100އަށް ވުރެ ގިނަ މީހުން މަރުވެފައިވާ ކަމަށް ރިޕޯޓުކޮށްފައިވެއެވެ. ބައިނަލްއަޤުވާމީ މުޖުތަމަޢުން ސްރީލަންކާއަށް އެހީވުމުގެ މަސައްކަތް ކުރަމުން ގެންދާއިރު، ރާއްޖެއިން ވެސް ވަނީ އެހީތެރިކަން ފޯރުކޮށްދިނުމަށް ނިންމާފައެވެ.