ނައިބު ރައީސް "ހެލްތް އެކްސްޕޯ 2024" ހުޅުވައިދެއްވައިފި!

ނައިބު ރައީސް ހުސެއިން މުޙައްމަދު ލަޠީފް “ހެލްތް އެކްސްޕޯ 2024” ހުޅުވައިދެއްވައިފިއެވެ. 

"ހެލްތް އެކްސްޕޯ 2024" އަކީ، ދުޅަހެޔޮ މުޖުތަމަޢެއް ބިނާކުރުމަށް ޞިއްޙީ ދާއިރާއިން ކުރަމުންދާ މަސައްކަތްތަކާއި ޞިއްޙީ ގޮތުން ދުޅަހެޔޮ އާދަތަކަށް އާންމުން ހޭލުންތެރިކުރުމާއި ގުޅޭ މަޢުލޫމާތު ރައްޔިތުންނަށް ފޯރުކޮށްދިނުމަށް، ޞިއްޚީ ވުޒާރާއިން އިންތިޒާމުކުރައްވައިގެން 2 ދުވަހުގެ މުއްދަތަށް ކުރިއަށް ގެންދަވާ ހަރަކާތެކެވެ.

"ހެލްތް އެކްސްޕޯ 2024" ފެށުމުގެ ގޮތުން ހުޅުމާލޭ ސެންޓްރަލް ޕާކުގައި ރޭ އޮތް ރަސްމިއްޔާތުގައި، ނައިބ ުރަޢީސް ހުސެއިން ވަނީ، ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ވެރިކަމުގައި ޞިއްޙީ ދާއިރާއިން ކުރައްވާފައިވާ މަސައްކަތްތަކުގެ ވަނަވަރު ހިމެނޭހެން ތައްޔާރުކޮށްފައިވާ "ހަފުތާ 52" އާންމުކޮށްދެއްވާފައެވެ.

އަދި ނައިބު ރައީސް ހުސެއިން ވަނީ، “ހެލްތް އެކްސްޕޯ 2024” ގައި އާންމުންނަށް މައުލޫމާތު ފޯރުކޮށްދިނުމަށް ތައްޔާރުކޮށްފައިވާ ސްޓޯލްތަކަށް ޒިޔާރަތްކުރައްވައި، އެ ސްޓޯލްތައް ބައްލަވާލައްވާފައެވެ. 

“ހެލްތް އެކްސްޕޯ 2024” ގައި، ޞިއްޙީ ދާއިރާގެ އެކިއެކި ފަރާތްތަކުން ވަނީ ބައިވެރިވެފައެވެ. އެގޮތުން މާލެ ސަރަހައްދުގެ ހޮސްޕިޓަލްތަކާއި، ކްލިނިކްތަކާއި ޖަމިއްޔާ ޖަމާއަތްތަކާއެކު މި އެކްސްޕޯގައި ޤާއިމުކޮށްފައިވާ 50 ސްޓޯލަކުން، އާންމުންނަށް މައުލޫމާތު ލިބޭނެ އިންތިޒާމު، ޞިއްޙަތާބެހޭ ވުޒާރާއިން ވަނީ ހަމަޖައްސަވައިދެއްވާފައެވެ.