ނާސަރީތައް ތަރައްގީކުރުމުގެ މަޝްރޫއަށް އެހީތެރިވުމަށް ޗައިނާގައި ތަމްރީނު ޕްރޮގްރާމެއް

ދިވެހިރާއްޖޭގެ އެކި ސަރަހައްދުތަކުގައި ގާއިމުކުރުމަށް ހަމަޖެހިފައިވާ ނާސަރީތައް ތަރައްގީކުރުމުގެ މަޝްރޫއުތަކަށް އެހީތެރިވުމުގެ ގޮތުން ކުރިއަށްގެންދާ "ނާސަރީ މެނޭޖްމަންޓް ޕްރެޕަރޭޓަރީ ޕްރޮގްރާމް" ގެ ފުރަތަމަ ބައިވެރިންނަށް އަމާޒުކޮށްގެން ބާއްވާ އޮރިއެންޓޭޝަން ސެޝަން ޗައިނާގެ ފޫޖިއަން ޕްރޮވިންސްގައި ބާއްވައިފިއެވެ.

މި ޕްރޮގްރާމަކީ ރާއްޖޭގެ އެކި ކަންކޮޅުތަކުގައި ގަސްގަހާގެހި އާލާކޮށް، ތިމާވެށި ފެހިކުރުމަށާއި ދަނޑުވެރިކަމުގެ ދާއިރާ ކުރިއެރުވުމަށްޓަކައި ގާއިމުކުރާ ނާސަރީތައް ހިންގާ ބެލެހެއްޓުމުގެ ފަންނީ ގާބިލުކަން އިތުރުކުރުމުގެ މަގުސަދުގައި ކުރިއަށްގެންދާ މުހިންމު ތަމްރީނެއް ކަމަށް މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާއިން ވިދާޅުވިއެވެ.

މި ތަމްރީނުގެ ފުރަތަމަ ބުރުގައި ބައިވެރި ވަނީ ރާއްޖެއިން ހޮވާލެވުނު 10 ބައިވެރިންނެވެ.

ރާއްޖޭގެ އެކި ސަރަހައްދުތަކުގައި ގާއިމުކުރާ ނާސަރީތައް ތަރައްގީކުރުމުގެ މަޝްރޫއުތަކަށް އެހީތެރިވުމުގެ ގޮތުން ކުރިއަށްގެންދާ "ނާސަރީ މެނޭޖްމަންޓް ޕްރެޕަރޭޓަރީ ޕްރޮގްރާމް" ގެ ފުރަތަމަ 10 ބައިވެރިންނަށް އަމާޒުކޮށްގެން ބާއްވާ އޮރިއެންޓޭޝަން ސެޝަން މިއަދު ޗައިނާގެ ފޫޖިއަން ޕްރޮވިންސްގައި ބާއްވައިފިއެވެ

— Min. of Climate Change, Environment and Energy, MV (@MoEnvmv) October 28, 2026

ޗައިނާގެ ފޫޖިއަން ޕްރޮވިންސްގައި ބޭއްވުނު މި އޮރިއެންޓޭޝަން ސެޝަނުގައި، ތަމްރީނު ކުރިއަށްދާނެ ގޮތުގެ ތަފުސީލުތަކާއި، ނާސަރީތައް ޒަމާނީ ފެންވަރަށް މެނޭޖްކުރުމުގައި ސަމާލުކަން ދޭންޖެހޭ މުހިންމު ކަންކަމާ ގުޅޭގޮތުން ބައިވެރިންނަށް މައުލޫމާތު ދީފައިވެއެވެ.

މި ޕްރޮގްރާމްގެ ސަބަބުން ރާއްޖޭގެ އެކި ސަރަހައްދުތަކުގައި ތަރައްގީކުރާ ނާސަރީތައް ދެމެހެއްޓެނިވި ގޮތެއްގައި ބެލެހެއްޓުމަށް ބޭނުންވާ ފަންނީ ތަޖުރިބާއާއި ހުނަރު ބައިވެރިންނަށް ލިބިގެންދާނެ ކަމަށް ބެލެވޭ ކަމަށް ތިމާވެއްޓާއި ބެހޭ ވުޒާރާއިން ވިދާޅުވިއެވެ. 

އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ރާއްޖެ ފެހިކުރުމަށާއި ތިމާވެށި ހިމާޔަތްކުރުމަށް ގިނަގުނަ މަސައްކަތްތަކެއް ފަށްޓަވާފައިވާއިރު، މިފަދަ ތަމްރީނުތަކަކީ އެ އަމާޒަށް ވާސިލުވުމަށް އެޅޭ މުހިންމު ބާރެއްކަން ވެސް އެ ވުޒާރާއިން ފާހަގަކުރެއްވިއެވެ.