ސްރީ ލަންކާއަށް ދަތުރުކުރާނަމަ އަދާހަމަ މަޢުލޫމާތު ހޯދައިގެން މެނުވީ ނުފުރުމަށް އެދިއްޖެ

ސްރީ ލަންކާއަށް ދަތުރުކުރާ ދިވެހީން، ދަތުރަށް ފުރުމުގެ ކުރިން އަދާހަމަ މަޢުލޫމާތު ހޯދުމަށް، ސްރީ ލަންކާގައި ހުންނަ ދިވެހިރާއްޖޭގެ ހައިކޮމިޝަނުން އެދިއްޖެއެވެ.

ސޯޝަލް މީޑިއާގައި ހައިކޮމިޝަނުން ޚިއްޞާކުރި ނޯޓެއްގައި ބުނީ، ސްރީ ލަންކާއަށް މިހާރު ކުރަމުންދާ ވިއްސާރައާ ގުޅިގެން ވައިގެ ދަތުރުފަތުރަށް ބުރޫއަރާފައިވާ ކަމަށެވެ. އެހެންކަމުން ދަތުރަށް ފެއްޓެވުމުގެ ކުރިން، ދަތުރުކުރުމަށް ހަމަޖެހިފައިވާ އެއާރލައިނަށް ގުޅައި، އަދާހަމަ މަޢުލޫމާތު ހޯދުމަށް ވަނީ އިލްތިމާސްކޮށްފައެވެ.

މީގެ އިތުރުން، ސްރީ ލަންކާ އެއާރޕޯޓުގައި ނުފުރި ތާށިވެފައި ތިބި ފަރާތްތަކުން ހައިކޮމިޝަނަށް އެންގުމަށް ވެސް ވަނީ އެދިފައެވެ. އެގޮތުން އެ ކޮމިޝަންގެ ނަންބަރު +9476881666 އަށް ގުޅައި އެކަން ރިޕޯޓު ކުރެވޭނެކަމަށް ވަނީ ހާމަކޮށްފައެވެ.

ސްރީ ލަންކާއަށް ކުރިމަތިވެފައިވާ ޙާލަތުގެ ސަބަބުން ފްލައިޓްތައް ކެންސަލްވުމާ ގުޅިގެން، އެ ޤައުމުން ނުފުރި ލަސްވާ ފަރާތްތަކުގެ ވިސާގެ ކަންކަމުގައި ލުއިތަކެއް ދިނުމަށް ވެސް ވަނީ އެ ޤައުމުގެ ސަރުކާރުން ނިންމާފައެވެ. 

އެގޮތުން، މި މަހުގެ 28ވަނަ ދުވަހު ފުރަން ހަމަޖެހިފައިވާ ފަރާތްތަކުގެ ތެރެއިން މޫސުން ގޯސްވެ، ފްލައިޓްތައް ކެންސަލްވުމާ ގުޅިގެން ސްރީނލަންކާއިން ނުފުރި ތިބި ފަރާތްތަކުގެ ވިސާ ފީ އާއި ވިސާ ހަމަވުމަށް ފަހު ވެސް އިތުރަށް މަޑުކުރަން ޖެހޭ މުއްދަތުގައި ދައްކަން ޖެހޭ ޖޫރިމަނާ ފީތައް މަޢާފުކުރުމަށް ސްރީ ލަންކާގެ އިމިގްރޭޝަނުން ނިންމާފައިވާ ކަމަށް ހައިކޮމިޝަނުން ވަނީ އަންގާފައެވެ. 

ސްރީ ލަންކާއަށް މިހާރު ކުރަމުންދާ ވިއްސާރައިގެ ސަބަބުން އެ ޤައުމުގައި ވަނީ ކުއްލި ޙާލަތު ޢިއުލާންކޮށްފައެވެ. އެ ޤައުމަށް ކުރަމުންދާ ވިއްސާރައަކީ، ޠޫފާނު "ދީތުވާ"އާ ގުޅިގެން ކުރާ ވިއްސާރައެކެވެ. އެ ޠޫފާނު މިހާރު ސްރީ ލަންކާއާ ދުރަށް ދަތުރު ކުރަމުން ދިޔަ ނަމަވެސް، ވިއްސާރައިގައި އެ ޤައުމަށް މިހާރު ވަނީ ފެންބޮޑުވުމާއި ބިންގަނޑު ކަނޑައިގެން ދިޔުން ފަދަ ނުރައްކާތެރި ކަންކަން ކުރިމަތިވެފައެވެ. މީގެ އިތުރުން، ލަންކާގެ މޫސުމީ ޙާލަތުގެ ސަބަބުން މިހާތަނަށް 100އަށް ވުރެ ގިނަ މީހުން މަރުވެފައިވާ ކަމަށް ރިޕޯޓުކޮށްފައިވެއެވެ. ބައިނަލްއަޤުވާމީ މުޖުތަމަޢުން ސްރީލަންކާއަށް އެހީވުމުގެ މަސައްކަތް ކުރަމުން ގެންދާއިރު، ރާއްޖެއިން ވެސް ވަނީ އެހީތެރިކަން ފޯރުކޮށްދިނުމަށް ނިންމާފައެވެ.