ފުލުން ދެވަނައިގައި އޮތް ޓީމު އަތުން ބެޔާންއަށް ސަލާމަތް ވެވުނީ އިތުރު ވަގުތު

އިތުރު ވަގުތު ކާމިޔާބުކުރި ގޯލުތަކުން، ޖަރުމަނު ބުންޑަސް ލީގާގެ ފުލުން ދެވަނައިގައި އޮތް ސެއިންޓް ޕައުލީގެ އަތުން ބެޔާން މިއުނިކް ސަލާމަތްވެއްޖެއެވެ. 

މި މެޗުން ބެޔާންއަށް 3 ޕޮއިންޓު ކަށަވަރުކޮށް، ލީގުގެ އެއްވަނައިގައި އޮތް ލީޑަށް ބަދަލެއް ނައިސް ދެމެހެއްޓުމަށް މަގުފަހިވީ، 1-1އިން އެއްވަރުވެގެން މެޗު ނިމެން ދަނިކޮށް، ލުއިޒް ދިއާޒް އާއި ނިކޮލަށް ޖެކްސަން 3 މިނެޓުގެ ތެރޭގައި ކާމިޔާބުކުރި ދެ ގޯލުންނެވެ. 

ބެޔާންގެ އެލިއެންޒް އެރީނާގައި ކުޅުނު މި މެޗުގެ 6ވަނަ މިނެޓުގައި ފުރަތަމަ ލީޑު ނެގީ އެންޑްރެއާސް ހޮންޓޮންޖީގެ ގޯލަކުން، ސެއިންޓް ޕައުލީއެވެ. 

އޭގެ ފަހުން މެޗުގެ މުޅި ކޮންޓްރޯލް ނަގައިގެން ކުޅުނީ ބެޔާންއެވެ. އުއްމީދާއެކު މަސައްކަތް ކުރަމުން ދިޔަ ކުޅުންތެރިންގެ މާޔޫސްކަން އިތުރުވީ، އެ ޓީމަށް ލިބުނު އެންމެ ރަނގަޅު ދެ ފުރުސަތަށް ވެސް ގޯލު ދަނޑި ހުރަސް އެޅުމުންނެވެ. 

ނަމަވެސް، ރޭވިގެން މޮޅަށް ޑިފެންސް ކުރަމުންދިޔަ ސެއިންޓް ޕައުލީގެ ޑިފެންސް ލައިން އެ ޓީމުން ވަނީ ފުރަތަމަ ހާފު ނިމުމުގެ ކުރިން ފޫއަޅުވާލާފައެވެ. ރަފިއަލް ގެރޭރޯގެ މި ގޯލަކީ ލުއިޒް ދިއާޒްގެ ބުރަ މަސައްކަތުން ދިން ބޯޅައަކުން އޭނާ ކާމިޔާބުކުރި ގޯލެކެވެ. 

ދެވަނަ ހާފަށް ބެޔާން ނިކުތީ ބަދަލުތަކާއެކުއެވެ. އަދި އެ ހާފުގައި ބެޔާންއިން ވަނީ މެދުކެނޑިމެއް ނެތި އިދިކޮޅު ޓީމަށް ނުރައްކާކޮށްފައެވެ. 

މެޗުގައި ފުރަތަމަ ފަހަރަށް ބެޔާންއަށް ލީޑު ނެގުނީ އިތުރު ވަގުތުގެ ތިންވަނަ މިނެޓުގައި ލުއިޒް ދިއާޒް ބޮލުން ކާމިޔާބުކުރި ގޯލުންނެވެ. އޭގެ ތިން މިނެޓު ފަހުން އެ ޓީމުގެ ލިޑު ފުޅާކުރީ ޖެކްސަންގެ ގޯލުންނެވެ. 

މި ނަތީޖާއާއެކު ބެޔާން އޮތީ 12 މެޗުން 34 ޕޮއިންޓު ހޯދައި، 8 ޕޮއިންޓުގެ ފަރަގަކާއެކު ލީގުގެ އެއްވަނައިގައެވެ. ދެވަނައިގައި އޮތް ލެޕްޒިގަށް ލިބިފައިވަނީ 26 ޕޮއިންޓެވެ.