"ސިލޯނާއެކު ދިވެހީން" ޓެލެތޯނަށް ސްކޭމަރުންގެ ނުރައްކާ, ފުލުހުންނާއި ބީއެމްއެލްއިން އާންމުން ސަމާލުވުމަށް އިލްތިމާސްކޮށްފި!

ސްރީލަންކާއަށް ދިމާވެފައިވާ ދަތި ހާލަތުން އަރައިގަތުމަށްޓަކައި ޕަބްލިކް ސަރވިސް މީޑިއާ (ޕީއެސްއެމް) އިން އިސްނަގައިގެން ރާއްޖޭގެ އެހެން މީޑިއާތަކާއި ގުޅިގެން ކުރިއަށްގެންދާ "ސިލޯނާއެކު ދިވެހީން" ޓެލެތޯނުގެ ތެރެއިން ސްކޭމަރުން އޮޅުވާލައިގެން ފައިސާ ހޯދުމުގެ ކަންކަން ކުރިއަށްގެންގޮސްދާނެތީ، ހުރިހައި ފަރާތްތަކުންވެސް އެކަމަށް ސަމާލުވުމަށް ދިވެހި ފުލުހުންގެ ޚިދުމަތާއި ބޭންކް އޮފް މޯލްޑިވްސް (ބީއެމްއެލް) އިން އިލްތިމާސްކޮށްފިއެވެ. މިހާރު ކުރިއަށްދާ މި ޓެލެތޯންގެ ސަބަބުން އާންމުންގެ ތެރޭގައި ސްކޭމަރުންގެ ހަރަކާތްތައް އިތުރުވެދާނެކަމުގެ ބިރު އެބައޮތެވެ.

"ސިލޯނާއެކު ދިވެހީން" ޓެލެތޯންގައި ވާހަކަދައްކަވަމުން ދިވެހި ފުލުހުންގެ އިދާރާގެ ސީނިއަރ ސަރޖަންޓް އަބްދުﷲ ޝަހުނީޒް ވިދާޅުވީ، ޓެލެތޯނަށް ވަކި ޚާއްސަ އެކައުންޓް ނަންބަރެއް ޚާއްސަކޮށްފައިވީނަމަވެސް، ސޯޝަލް މީޑިއާ އެޕްލިކޭޝަންތައް ބޭނުންކޮށްގެންވެސް މިފަދަ މެސެޖްތައް ދައުރުކުރަމުންދާކަން ފާހަގަކުރެވޭ ކަމަށެވެ. ޚާއްސަކޮށް މިފަދަ ޓެލެތޯންތައް ކުރިއަށްދާއިރު ސްކޭމަރުން ސްކޭމް ހިންގާކަމަށާއި، މިކަމަށް އާންމު ރައްޔިތުން ސަމާލުވުމަށް އޭނާ ވަނީ އިލްތިމާސްކުރައްވާފައެވެ.

ޚާއްސަގޮތެއްގައި މިފަދަ ޓެލެތޯންއެއް ފެށިގެން ދާއިރުގައި އޭގެ ނާޖާއިޒް ފައިދާ ނެގުމަށްޓަކައި ސްކޭމަރުން މަސައްކަތްތަކެއް ކުރަމުންދާނެ. މިފަދަ ކަންކަމުން ދުރުވުމަށްޓަކައި ޚާއްސަކުރެވިފައިވާ އެކައުންޓް ނަންބަރު ރަނގަޅަށް ކަށަވަރުކުރެއްވުމާއި، ޕީއެސްއެމް މެދުވެރިކޮށްވެސް އަދި ފުލުހުން މެދުވެރިކޮށްވެސް ބީއެމްއެލް މެދުވެރިކޮށްވެސް ކަށަވަރުކުރެވޭނެ ގޮތްގޮތް ހުންނާނެ،

ޝަހުނީޒް 

ބީއެމްއެލްގެ ހެޑް އޮފް ބްރޭންޑް އެންޑް މާކެޓިންގ ސްޓްރެޓެޖީ މުޙައްމަދު ސައީދު ވިދާޅުވީ، ބޭންކުން ދޭ ކޮންމެ ޚިދުމަތަކީ ސެކިއުރިޓީއާއި އެކީގައި ދޭ ޚިދުމަތެއް ކަމަށެވެ. ސެކިއުރިޓީ ބްރީޗްވަނީ އެ ކަސްޓަމަރއަކަށް ކުރަން ނުޖެހޭ ކަމެއް ކުރެވިގެންކަމަށެވެ. އޭނާ ފާހަގަކުރެއްވި ގޮތުގައި، މި ހަރަކާތަށް ޚާއްސަކޮށްގެން ވަކި ބޭންކް އެކައުންޓެއް ހުޅުވިފައިވާއިރު، ފައިސާގެ މުއާމަލާތް ކުރެވޭނެގޮތްތައް ޓީވީއިން ކިޔާދެމުންދާތީ މިކަންކަމަށް ސަމާލުވުމަށް ސައީދު ވަނީ އެދިފައެވެ.

މިސާލަކަށް އެބަހުރި ވަކި ގޮތްތަކެއް ދެއްތޯ. އެއީ އެންމެ ފުރަތަމަ ކަމަކަށް އަޅުގަނޑު ފާހަގަކޮށްލާނަން. ކިއުއާރު ކޯޑަށް ބަލާލާއިރުވެސް ކިއުއާރުކޯޑު މި މަސައްކަތްކުރަނީ ބީއެމްއެލް އެޕް ހުޅުވައިގެން. މާނައަކީ އެބޭފުޅެއްގެ އެޕުންނޭ އެބޭފުޅަކަށް ޓްރާންސްފަރ ކުރެވޭނީ. ދެން އަދި އޭގެ އިތުރުން އެކައުންޓް ނަންބަރަށް ޓްރާންސްފަރ ކުރާއިރުގައިވެސް އެ އެކައުންޓަކީ ސިލޯނާއިއެކު ދިވެހިން މިހެން ޖަހާފައި އޮތް އެކައުންޓްތޯ ޔަޤީންކުރުން އެއީ ވަރަށް މުހިންމުކަމެއް ފައިސާ ޓްރާންސްފަރ ކުރުމުގެ ކުރިން.

މުޙައްމަދު ސައީދު

ޕީއެސްއެމްއިން އިސްނަގައިގެން ރާއްޖޭގެ އެހެން މީޑިއާތަކާއި ގުޅިގެން ކުރިއަށްގެންދާ "ސިލޯނާއެކު ދިވެހީން" ޓެލެތޯންގައި ފައިސާ ޖަމާކުރުމަށް ބީއެމްއެލްއިންވެސް އަދި ޕީއެސްއެމްއިންވެސް އެހެން އެއްވެސް އިދާރާއަކުން މެސެޖެއް ނުކުރާނެކަމަށް މި ހަރަކާތް އިންތިޒާމްކުރާ ފަރާތުން މައުލޫމާތުދެއެވެ. އެހެންކަމުން، އެފަދަ އެއްވެސް މެސެޖެއް ލިބިއްޖެނަމަ އެއީ ސްކޭމެއްކަން ދެނެގަނެ، އެކަމަށް ސަމާލުވުމަށް ވަނީ އިލްތިމާސްކޮށްފައެވެ.

#CeylonaaEkuDhiveheen pic.twitter.com/ivMHft6Fg9

— PSM News (@psmnewsmv) November 30, 2025