ބާރުގަދަ ތޫފާން "ދިތުވާ" މިއަދު އިންޑިއާގެ އިރުދެކުނު އައްސޭރިއަށް އަރާނެކަމުގެ އިންޒާރު ދީފި!

ދެކުނު އޭޝިޔާ ސަރަޙައްދުގައި އުފެދިފައިވާ ބާރުގަދަ ތޫފާން، "ދިތުވާ" މިއަދު އިންޑިޔާގެ އިރުދެކުނު އައްސޭރިފަށުގެ ސަރަޙައްދުތަކަށް އަރާނެ ކަމަށް އެ ޤައުމުގެ މޫސުމާ ބެހޭ އިދާރާއިން އިންޒާރު ދީފިއެވެ. ތޫފާނުގެ ނުރައްކާ އެންމެ ބޮޑަށް ކުރިމަތިވެފައި އޮތީ، އިންޑިޔާގެ އިރުދެކުނުގައި އޮތް ތަމިލް ނާޑޫ ސްޓޭޓްގެ އުތުރާއި، ޕުދުޗެރީގެ ސަރަޙައްދުތަކުގެ އިތުރުން އަންދްރަ ޕްރަދޭޝް ސްޓޭޓްގެ ދެކުނުގެ ސަރަޙައްދުތަކަށެވެ.

އިންޑިޔާގެ މޫސުމާ ބެހޭ އިދާރާއިން ހާމަކުރެއްވި ގޮތުގައި، މިއަދުގެ ހެނދުނުގެ ވަގުތެއްގައި ތޫފާން ދިތުވާ އެ ސަރަޙައްދުތަކަށް އަރާނެއެވެ. އަދި، ތޫފާނުގެ ބާރު އިތުރަށް ގަދަވަމުންދާ ކަމުގެ އިންޒާރު ވެސް އެ އިދާރާއިން ވަނީ ދީފައެވެ. ތޫފާނާ ގުޅިގެން ތަމިލް ނާޑޫގެ އައްސޭރިފަށުގެ ސަރަޙައްދުތަކަށް މިހާރު ވެސް ދަނީ ބޯކޮށް ވާރޭވެހެމުންނެވެ. އަދި، އެ ސަރަޙައްދުގައި އާދަޔާ ޚިލާފަށް ވައި ބާރުވެފައިވާ ކަމަށް ރިޕޯޓުތައް ބުނެއެވެ.

ތަމިލް ނާޑޫން މިވަގުތު ތޫފާނުގެ އަސަރު އެންމެ ބޮޑަށް ކުރަމުން ދަނީ ވޭދާރާނިޔަމްގައި އޮތް ކޯޑީއާކްރާއީ ގޮނޑުދޮށް އޮތް ސަރަޙައްދަށެވެ. އެ ސަރަޙައްދަށް އާދަޔާ ޚިލާފަށް ވައި ބާރުވެ، ބޯކޮށް ވާރޭވެހެމުންދާ ކަމުގައި ރިޕޯޓުތައް ބުނެއެެވެ. ތޫފާން ދިތުވާ އިންޑިޔާގެ އިރުދެކުނުގެ ސަރަޙައްދުތަކަށް އަރާނެ ކަމުގެ އިންޒާރު ދިނުމާ އެކު، އެ ސަރަޙައްދުތަކުގެ އިދާރާތަކުން ވަނީ ރައްކާތެރިކަމުގެ ފިޔަވަޅުތައް އަޅަން ފަށާފައެވެ. އަދި، ކުއްލި ހާލަތްތަކުގައި ހަރަކާތްތެރިވާ ޓީމުތައް ތައްޔާރީ ހާލަތަކަށް ގެނެސްފައެވެ.

ތަމިލް ނާޑޫގެ އިތުރުން އަންދްރަ ޕްރަދޭޝާއި ޕުދުޗެރީއަށް ތޫފާން ދިތުވާ އަރާނެ ކަމުގެ އިންޒާރާ އެކު، އިންޑިޔާގެ މޫސުމާ ބެހޭ އިދާރާއިން ވަނީ އެ ސަރަޙައްދުތަކުގައި ރަތް ސަމާލު (ރެޑް އެލާޓް) އިޢުލާނު ކޮށްފައެވެ. އަދި، ރައްކާތެރިކަމުގެ ފިޔަވަޅުތައް އެޅުމަށް، އައްސޭރިފަށުގެ ސަރަޙައްދުތަކުގައި ދިރިއުޅޭ ރައްޔިތުންނަށް އިރުޝާދު ދީފައެވެ. މި ގޮތުން، ގެދޮރުން ބޭރަށް ނުދިޔުމަށް ޢާންމު ރައްޔިތުންނަށް އަންގައި، އެ އިދާރާއިން ވަނީ ކަނޑު މައްޗަށް ނޭރުމަށް މަސްވެރިންނަށް އިރުޝާދު ދީފައެވެ. ތޫފާން ދިތުވާއާ ގުޅިގެން ރައްކާތެރިކަމުގެ ފިޔަވަޅުތައް އަޅާފައިވާ ސަރަޙައްދުތަކުގެ ތެރޭގައި ތަމިލް ނާޑޫގެ ވެރިރަށް ޗެންނައި ވެސް ހިމެނެއެވެ.