އުދައްޔުގެ މަރު: ކުށް ސާބިތުނުވި މީހާގެ މައްސަލަ އިސްތިއުނާފަށް ހުށަހަޅައިފި

ހުވަދުއަތޮޅު އުތުރުބުރީ މާމެންދޫގައި ބަޔަކު ޙަމަލާ ދީގެން ޤަތުލުކުރި އަޙުމަދު އުދައްޔުގެ މަރުގެ މައްސަލައިގައި، ޤަޞްދުގައި މީހަކު މެރުމުގައި ބައިވެރިވުމުގެ ކުށް ސާބިތުނުވެ، ސަލާމަތްވި މީހާގެ މައްސަލަ އިސްތިއުނާފުކުރުމަށް އެދި ދައުލަތުން ހައި ކޯޓަށް ހުށަހަޅައިފިއެވެ.

2021ވަނަ އަހަރުގެ ފެބްރުއަރީ މަހުގެ 17ވަނަ ދުވަހު ތޫނު އެއްޗެހި ބޭނުންކޮށްގެން ޙަމަލާ ދީ އަޙްމަދު އުދައްޔު މަރާލި މައްސަލައިގައި، ދައުލަތުން ކްރިމިނަލް ކޯޓުގައި ދަޢުވާކުރީ ގއ. މާމެންދޫ ރިހިފަރުދާގޭ އަޙުމަދު ޝަމީމާއި، އެ ރަށު ބިލެތްމާގޭ ޝަރަފް ރަޝީދުގެ އިތުރުން އެ ރަށު ގުލްފާމްގޭ މުޙައްމަދު މާޒިންގެ މައްޗަށެވެ.

އޭގެ ތެރެއިން ޝަމީމާއި މާޒިންގެ މައްޗަށް ކުށް ސާބިތުވެ، މަރުގެ އަދަބު އިއްވި ނަމަވެސް، ޝަރަފްގެ މައްޗަށް މީހަކު މެރުމުގައި ބައިވެރިވުމުގެ ދަޢުވާ ސާބިތުނުވާ ކަމަށް އޮތީ ކަނޑައަޅާފައެވެ. ޝަރަފްގެ މައްޗަށް އެ ކުށް ސާބިތުނުވި މައްސަލަ ދައުލަތުން މިހާރު ވަނީ ހައި ކޯޓަށް ހުށަހަޅާފައެވެ. ނަމަވެސް އެ މައްސަލަ ބަލައިގަތުމާ މެދު ހައި ކޯޓުން އަދި ވަކި ގޮތެއް ނިންމާފައެއް ނުވެއެވެ.

އުދައްޔުގެ މަރުގެ މައްސަލައިގައި ޝަރަފްގެ މައްޗަށް ކުރި ދަޢުވާ ސާބިތުނުވި ނަމަވެސް، އެ މައްސަލައިގައި އޭނާގެ މައްޗަށް ކުރި ނުރައްކާތެރި ހަތިޔާރެއް ބޭނުންކޮށްގެން މާރާމާރީ ހިންގުމުގެ ދަޢުވާ ސާބިތުވެ، އޭނާ ހަތް އަހަރަށް ޖަލަށްލުމަށް ކްރިމިނަލް ކޯޓުން އޮތީ ނިޔާކޮށްފައެވެ.

އުދަައްޔުގެ މަރާ ގުޅިގެން ކުޑަކުއްޖެއްގެ މައްޗަށް ވެސް ދައުލަތުން ޖުވެނައިލް ކޯޓުގައި ދަޢުވާ އުފުލިއެވެ. އެ ކުއްޖާގެ މައްޗަށް ކުށް ސާބިތުވެ، އޭނާ 25 އަހަރަށް ޖަލަށްލުމާ އެކު މަރުގެ ދިޔައިގެ ގޮތުގައި އެއް މިލިއަން ރުފިޔާ ދެއްކުމަށް ޖުވެނައިލް ކޯޓުން ވަނީ ޙުކުމްކޮށްފައެވެ.