"ސިލޯނާއެކު ދިވެހީން" ޓެލެތޯން: މިހާތަނަށް 8 ލައްކައަށް ވުރެ ގިނަ ރުފިޔާ ހަދިޔާކޮށްފައިވޭ!

ބާރުގަދަ ދިތުވާ ޠޫފާނުގެ ސަބަބުން އަވައްޓެރި ސްރީލަންކާއަށް ކުރިމަތިވެފައިވާ ކާރިސީ ޙާލަތާ ގުޅިގެން، އެ ޤައުމަށް އެހީތެރިކަން ފޯރުކޮށްދިނުމަށްޓަކައި ދައުލަތުގެ މީޑިޔާ ޕީ.އެސް.އެމް.އިން އިސްނަގައިގެން، ރާއްޖޭގެ އެކިއެކި މީޑިޔާތަކާ ގުޅިގެން ކުރިއަށް ގެންދާ ޚާއްޞަ ޓެލެތޯންގައި މިހާތަނަށް 800،000 (އަށް ލައްކަ)އަށް ވުރެ ގިނަ ދިވެހި ރުފިޔާ ލިބިފައިވާ ކަމަށް ޕީ.އެސް.އެމް.އިން ހާމަކޮށްފިއެވެ.

"ސިލޯނާއެކު ދިވެހިން"ގެ ނަމުގައި މިއަދު ހެނދުނު ފެށި ޓެލްތޯން ކުރިއަށް ގެންދަން ހަމަޖެހިފައިވަނީ، ހެނދުނު 9:00އިން ފެށިގެން މިރޭ މެންދަމު 1:00އާ ހަމައަށެވެ. 

މިއަދުގެ މިހާތަނަށް އައިއިރު، ބޭންކް އޮފް މޯލްޑިވްސްއިން މި ޓެލެތޯނަށް ޚާއްޞަކޮށްފައިވާ ދިވެހި ރުފިޔާ އެކައުންޓަށް އަށް ލައްކައަށް ވުރެ ގިނަ ރުފިޔާ ފޮނުވާފައިވާއިރު، ޑޮލަރު އެކައުންޓަށް 1،500 ޑޮަލަރު ވަނީ ޖަމާކޮށްފައެވެ. 

މި ޓެލެތޯނަށް ބީ.އެމް.އެލް.އިން ހުޅުވާފަައިވާ ދިވެހި ރުފިޔާ އެކައުންޓަށް އަދި ޑޮލަރު އެކައުންޓަށް ފައިސާ ޓްރާންސްފަރކުރެވޭއިރު، އެ ބޭންކުގެ އިންޓަރނެޓް ބޭންކިންގ އެޕްލިކޭޝަން މެދުވެރިކޮށް ކިއު.އާރް. ކޯޑު ބޭނުންކޮށްގެން ވެސް ފައިސާ ޖަމާކުރެވޭނެއެވެ.

މީގެ އިތުރުން، މާލޭގެ ބައެއް ސަރަޙައްދުތަކުގައި މި ޓެލެތޯނަށް ފައިސާ ހަދިޔާކުރުމަށް ޑޮނޭޝަން ބޮކްސްތައް ބަހައްޓާފައިވާއިރު، އެ ފޮށިތަކަށް ފައިސާ ލައިގެން ވެސް ފައިސާ ހަދިޔާކުރުމުގެ ފުރުޞަތު ވަނީ ފަހިކޮށްދީފައެވެ.

މި މަހުގެ 26ވަނަ ދުވަހު ސްރީލަންކާއަށް އެރި ޠޫފާނު ދިތުވާގައި އެ ޤައުމަށް ގަދަ ވަޔާ އެކު ބޯކޮށް ވިއްސާރާ ވެހި، ފެންބޮޑުވުމުގެ ސަބަބުން 200 އެއްހާ މީހުން މަރުވެ، އެތައް ބަޔަކު ގެއްލި، 40،000އަށް ވުރެ ގިނަ މީހުން އަމިއްލަ ގޯތިގެދޮރު ދޫކޮށް ސަލާމަތީ ސަރަޙައްދުތަކަށް ބަދަލުވާން ވަނީ މަޖުބޫރުވެފައެވެ. 

މި ކާރިސާއާ ގުޅިގެން ސްރީލަންކާއިން ވަނީ، ބައިނަލްއަޤުވާމީ މުޖުތަމަޢާއި އަވައްޓެރި ޤައުމުތަކުގެ މަދަދުވެރިކަމަށް އެދިފައެވެ. 

#CeylonaaEkuDhiveheen pic.twitter.com/ivMHft6Fg9

— PSM News (@psmnewsmv) November 30, 2025