ޝިފާއުގެ މައްޗަށް 16 ދަޢުވާއެއް ސާބިތުވެއްޖެ، ޙުކުމް އިއްވުން އަންނަ ހަފްތާގައި

ޞައްޙަ ނޫން ޓެލެގްރަފިކް ޓްރާންސްފަރ (ޓީ.ޓީ.) ބޭނުންކޮށްގެން ބޭރުގެ ކުންފުނިތަކުން ވިޔަފާރިކުރަމުން ދިޔަ މައްސަލައިގައި، ޙުސައިން ޝިފާއުގެ މައްޗަށް 16 ދަޢުވާއެއް ސާބިތުވާ ކަމަށް ކްރިމިނަލް ކޯޓުން އަދު ނިންމައިފިއެވެ.

ޞައްޙަ ނޫން ޓީ.ޓީ. ފޮނުވައިގެން ބޭރުގެ ކުންފިތަކުން ވިޔަފާރިކުރަމުން ދިޔަ މައްސަލައިގައި، ޢުމުރު ދުވަހުގެ ޖަލު ޙުކުމެއް އަންނަ ގޮތަށް، ޖުމްލަ 23 ދަޢުވާއެއް ދައުލަތުން ޝިފާއުގެ މައްޗަށް އުފުލިއެވެ. 

އެ 23 ދަޢުވާގެ ތެރެއިން އޭނާގެ މައްޗަށް ސާބިތުވެފައިވަނީ: އެނގި ހުރެ ބާޠިލު ލިޔުމެއް ދިނުމުގެ ކުށުގެ 9 ދަޢުވާއަކާއި، މަކަރާއި ޙީލަތް ހެދުމުގެ ކުށުގެ 7 ދަޢުވާއެކެވެ. މިއާ އެކު، އޭނާގެ މައްޗަށް އުފުލާފައިވާ މަނީ ލޯންޑްރިންގެ 7 ދަޢުވާއާ މެދު ފަހުން ގޮތެއް ނިންމަވާނެ ކަމަށް މައްސަލަ ބައްލަވާ ޤާޟީ ޢަލީ ނަދީމް ވިދާޅުވެފައިވެއެވެ.

ޝިފާއުގެ މައްޗަށް ސާބިތުބި 16 ދަޢުވާގެ ޙުކުމް އިއްވުން އަންނަ ހަފްތާގެ ހޯމަ ދުވަހަށް ތާވަލުކޮށްފައިވާއިރު، އެ ދުވަހާ ހަމައަށް އޭނާ ބަންދުގައި ބެހެއްޓުމަށް މިއަދު ކޯޓުން އަމުރުކުރިއެވެ.

ޝިފާއުގެ މައްޗަށް ކުރި 23 ދަޢުވާއަށް 38 އަހަރުގެ ޖަލު ޙުކުމެއް އަންނާނެ ކަމަށާއި، މި މައްސަލަތަކުގައި 123،844.54 ޑޮލަރު (1.9 މިލިއަން ރުފިޔާ) ހިމެނޭ ކަމަށް ޕްރޮސެކިއުޓަރ ޖެނެރަލްގެ އޮފީހުން ކުރީން ބުނެފައިވެއެވެ.

މައްސަލައިގެ ޝަރީޢަތް ނިމި، ޚުލާޞާ ބަޔާން ހުށަހަޅާ ޙިސާބުގައި އޮއްވައި، ދައުލަތުން ޝިފާއުއާ އެކު އިޢުތިރާފުގެ އެއްބަސްވުމެއް ހެދިއެވެ. ނަމަވެސް، މައްސަލަ ބައްލަވާ ޤާޟީ ނިންމެވީ، އެ އެއްބަސްވުން ބަލައިނުގަތުމަށެވެ.

"ކިންގްޑަމް އޮފް ފްރުޓްސް" ނަމަކަށް ކިޔާ، އަމިއްލަ ފަރުދެއްގެ ވިޔަފާރިއެއް މެދުވެރިކޮށް، ރާއްޖެއިން ބޭރުގެ ކުންފުނިތަކާ އެކު މަކަރާއި ޙީލަތް ހަދައިގެން ކުރި ވިޔަފާރީގެ މުޢާމަލާތްތަކުގެ މައްސަލައިގައި 2023ވަނަ އަހަރު ޝިފާއު ހައްޔަރުކުރުމަށް ފަހު ކޯޓުން ދޫކޮށްލުމުން، އޭނާ ރާއްޖެއިން ފިލައި ބޭރަށް ދަތުރުކުރިއެވެ. އޭގެ ފަހުން އޭނާ ހޯދަން އިންޓަޕޮލް މެދުވެރިކޮށް ރެޑް ނޯޓިސް ނެރުމުން، އަމިއްލައަށް އޭނާ ރާއްޖެއަށް އައުމުން ހައްޔަރުކުރުމަށް ފަހު ދޫކޮށްލީ ޕާސްޕޯޓު ހިފަހައްޓާފައެވެ.

އޭނާގެ މައްސަލަތައް ކޯޓުގައި އޮއްވައި، ދަނޑުވެރިކަމާއި ދިރޭ ތަކެއްޗާ ބެހޭ ވުޒާރާގެ ސީނިއަރ ޕޮލިޓިކަލް ޑިރެކްޓަރުގެ މަޤާމަށް ވެސް ޢައްޔަންކުރިއެވެ. ނަމަވެސް މީސްމީޑިޔާގައި އޭނާގެ މައްސަލަ ހާމަކުރުމާ ގުޅިގެން، އޭނާ މަޤާމުން ވަކިކުރެވުނެވެ.