މޫސުމީ ކާރިސާގައި އެންމެ ފުރަތަމަ ވެސް ލަންކާއަށް އެހީގެ އަތެއް ދިއްކޮށްލީ ދިވެހީން: ލަންކާ ސަފީރު

ދިތުވާ ޠޫފާނުގެ ސަބަބުން އަވައްޓެރި ސްރީލަންކާއަށް ކުރިމަތިވެފައިވާ ނުރައްކާތެރި މޫސުމީ ކާރިސާގައި އެ ޤައުމަށް ލިބެމުންދާ ގެއްލުންތަކުން ސަލާމަތްކުރުމަށްޓަކައި އެންމެ ފުރަތަމަ ވެސް އެހީގެ އަތެއް ދިއްކޮށްލީ ދިވެހިރާއްޖެއިން ކަމަށް ސްރީލަންކާއިން ދިވެހިރާއްޖެއަށް ކަނޑައަޅާފައި ހުންނަވާ ސަފީރު، މުޙައްމަދު ރިޒްވީ ޙަސަން ވިދާޅުވެއްޖެއެވެ.

ލަންކާ ސަފީރު ރިޒްވީ މިހެން ވިދާޅުވީ، ދައުލަތުގެ މީޑިއާ ޕީ.އެސް.އެމް.އިން އިސްނަގައިގެން މިއަދު ހެނދުނު 9:00އިން ފެށިގެން ކުރިޔަށްގެންދާ "ސިލޯނާއެކު ދިވެހީން" ޓެލެތޯންގައި ވާހަކަފުޅު ދައްކަވަމުންނެވެ.

ސަފީރުގެ ވާހަކަފުޅުގައި ވިދާޅުވީ، މި ވަޤުތު އެންމެ ބޮޑު އިސްކަމެއް ދޭން ޖެހޭނީ ސްރީލަންކާ ރައްޔިތުންގެ ސަލާމަތްތެރިކަން ކަށަވަރުކޮށްދީ، އަސާސީ ބޭނުންތައް ފުއްދައިދިނުމަށް ކަމަށެވެ.

ސަފީރުގެ ވާހަކަފުޅުގައި، ޠޫފާން ދިތުވާގެ ސަބަބުން ލަންކާއަށް ކުރިމަތިވެފައިވާ އަދި ކުރިމަތިވަމުންދާ ގެއްލުންތަކުގެ މައްޗަށް ވެސް ވަނީ އަލިއަޅުއްވާލައްވާފައެވެ. މި ގޮތުން، ލަންކާގެ ގިނަ މީސްތަކަކަށް ބޮޑެތި ގެއްލުންތަކެއް ލިބެމުންދާކަމާއި، ޙާލުގައި ޖެހިފައިވާ ފަރާތްތައް ރައްކާތެރި ޙިސާބުތަކަށް ބަދަލުކުރުމުގެ މަސައްކަތްތައް ކުރެވެމުންދާކަން، ސަފީރުގެ ވާހަކަފުޅުގައި ފާހަގަކުރައްވާފައިވެއެވެ.  

ލަންކާއިން ރާއްޖެއަށް ކަނޑައަޅާފައިވާ ހުންނަވާ ސަފީރު މުޙައްމަދު ރިޒްވީ ޙަސަން ވަނީ، ދިވެހި ސަރުކާރުން އިސްނަންގަވައި، ދިވެހިރާއްޖެއިން ސްރީލަންކާއަށް ފޯރުކޮށްދެމުންދާ އެހީތެރިކަމާއި އެއްބާރުލުމަށް ތަޢުރީފުކުރައްވައި ޝުކުރު އަދާކުރައްވާފައެވެ.

ސަފީރުގެ ވާހަކަފުޅުގައި، ޒަމާނުއްސުރެން ލަންކާއާއި ރާއްޖެ ދެމެދުގައި އޮންނަ ރަޙުމަތްތެރި ގުޅުން ފާހަގަކުރައްވާފައިވެއެވެ. އެ ގޮތުން، ދެ ޤައުމުގެ ދެމެދުގައި ޙިއްޞާވަނިވި ފަހުމްވުމެއް އޮންނަ ކަމަށާއި، ރާއްޖެއާއި ލަންކާއަށް ކުރިމަތިވާ ދަތި އުނދަގޫ ޙާލަތްތަކުގައި އެއް ޤައުމު އަނެއް ޤައުމަށް އަބަދު ވެސް އެހީތެރިވާ ކަމަށް ސަފީރު ވިދާޅުވިއެވެ. އުނދަގޫ ދަނޑިވަޅުތަކުގައި ރާއްޖެއަކީ އެންމެ ފުރަތަމަ ލަންކާއެކު އެއްބައިވަންތަކަން ދައްކުވައިދޭ ޤައުމު ކަމަށް ވެސް ސަފީރު ރިޒްވީ ވިދާޅުވިއެވެ.

ސްރީލަންކާއާއި ދިވެހިރާއްޖޭގެ ގުޅުމަކީ ނިމުމެއްނެތި ދެމި އޮންނާނެ ގުޅުމެއް ކަމަށާއި، މި ގުޅުން ދެމި އޮންނަނީ ދެ ޤައުމުގެ މެދުގައިވާ އިޙުތިރާމެއްގެ ސަބަބުން ކަމަށް ނިންމަވާލައްވަމުން ސަފީރު ވިދާޅުވިއެވެ.