ކްރައުން އެންޑް ޗަމްޕާއިން ސްރީލަންކާއަށް އެހީތެރިވުމަށް 10،001 ޑޮލަރު ހަދިޔާކޮށްފި!

ސްރީލަންކާއަށް ކުރިމަތިވެފައިވާ ކާރިސާގެ ޙާލަތުގައި އެޤައުމަށް އެހީތެރިކަން ފޯރުކޮށްދިނުމަށްޓަކައި ދިވެހި މީޑިއާތަކުން ކުރިއަށްގެންދާ 'ސިލޯނާއެކު ދިވެހިން' ޓެލެތޯނަށް، ކްރައުން އެންޑް ޗަމްޕާ ކުންފުނިން 10،001 އެމެރިކާ ޑޮލަރު ހަދިޔާކޮށްފިއެވެ.

މިއީ ކާރިސީ ޙާލަތުގައި ތިބި ސްރީލަންކާގެ ރައްޔިތުންނަށް އެހީވުމަށްޓަކައި ދިވެހި ކުންފުނިތަކާއި ފަރުދުންގެ ފަރާތުން ލިބެމުންދާ ދީލަތި އެހީއެކެވެ. ކްރައުން އެންޑް ޗަމްޕާ ކުންފުނީގެ ދަށުން ހިންގާ އެކި ވިޔަފާރިތަކުގައި މަސައްކަތްކުރާ މުވައްޒަފުންގެ ތެރެއިން 25 އިންސައްތަ ނިސްބަތްވަނީ ސްރީލަންކާއަށެވެ. އެމުވައްޒަފުންގެ ޤައުމަށް ކުރިމަތިވީ މިހިތްދަތި ހާލަތުގައި، ޗަމްޕާ ކުންފުނިންވަނީ ސްރީލަންކާގެ ރައްޔިތުންނަށް ދީލަތި އެހީތެރިކަމެއް ފޯރުކޮށްދީފައެވެ. ކްރައުން އެންޑް ޗަމްޕާ ކުންފުންޏާއި ދިވެހިން އަންނަނީ އަވައްޓެރި ޤައުމުތަކަށް ކުރިމަތިވާ މިފަދަ ކާރިސާތަކުގައި އެކި ގޮތްގޮތުން އެހީތެރިކަން ފޯރުކޮށްދެމުންނެވެ.

މިމަހުގެ 26 ވަނަ ދުވަހުން ފެށިގެން ސްރީލަންކާއަށް ކުރިމަތިވި ތޫފާނުގެ ސަބަބުން އެޤައުމުގެ އެކި ސަރަޙައްދުތަކަށް ބޯކޮށް ވާރޭވެހި ބިންގަނޑު ކަނޑައިގެން ދިޔުމުން، ބޮޑެތި ކާރިސާތައްވަނީ ކުރިމަތިވެފައެވެ. މިކާރިސާގައި އެތައް ބަޔަކު މަރުވެ އެތައް ބަޔަކު ހާލުގައިޖެހިފައިވާ މިދަނޑިވަޅުގައި، ދިވެހި މީޑިއާތަކުންވަނީ އެހީތެރިކަން ފޯރުކޮށްދިނުމަށްޓަކައި 16 ގަޑިއިރުގެ ޓެލެތޯނެއް ފަށާފައެވެ.

ސްރީލަންކާގެ ރައްޔިތުންނަށް އެހީވުމަށްޓަކައި ދިވެހި ސަރުކާރުންވެސްވަނީ ދީލަތި އެހީތެރިކަމެއް ފޯރުކޮށްދިނުމަށް ނިންމަވާފައެވެ. އެގޮތުން 50،000 އެމެރިކާ ޑޮލަރާއި 25 ހާސް ކޭސް މަސްދަޅު ސްރީލަންކާއަށް ހަދިޔާކުރުމަށް ވަނީ ނިންމަވާފައެވެ