ސްރީލަންކާގެ ވިއްސާރައިގައި ހާލުގައި ޖެހުނު ދިވެހި ދެ އާއިލާއަކަށް އެހީތެރިކަން ފޯރުކޮށްދީފި

ސްރީލަންކާއަށް ކުރަމުންދާ ވިއްސާރައިގެ ސަބަބުން ހާލުގައި ޖެހުނު ދިވެހި ދެ އާއިލާއަކަށް މިހާރު އެހީތެރިކަން ފޯރުކޮށްދީފައިވާ ކަމަށް ސްރީލަންކާއަށް ދިވެހިރާއްޖޭން ކަނޑައަޅުއްވާފައި ހުންނަވާ ސަފީރު މަސްޢޫދު ޢިމާދު ވިދާޅުވެއްޖެއެވެ. ސަފީރު މިހެން ވިދާޅުވީ ލަންކާއަށް އެހީތެރިކަން ފޯރުކޮށްދިނުމަށް މިހާރު ކުރިއަށްގެންދާ "ސިލޯނާއެކު ދިވެހީން" ޓެލެތޯނުގައި ލަންކާގެ އެންމެ ފަހުގެ އަދާހަމަ ހިއްސާކުރައްވަމުންނެވެ.

ލަންކާއަށް ކުރަމުންދާ ވިއްސާރަ މިހާރު ހަމައަކަށް އެޅުނު ނަމަވެސް، ބައެއް ހިސާބުތަކުގައި ކޯރުތައް ބަންޑުވެ، ބިންގަނޑު ކަނޑައިގެންދިއުން ފަދަ ހާދިސާތައް ދިމާވާނެ ކަމަށް ލަފާކޮށް އެކި އިދާރާތަކުން އިންޒާރު ދީފައިވާ ކަމަށް ސަފީރު މަސްޢޫދު ޢިމާދު ވަނީ ފާހަގަކުރައްވާފައެވެ. އެފަދަ ނުރައްކާތެރި ސަރަހައްދެއް ކަމަށްވާ މަލާބޭ ސަރަހައްދުގައި ދިރިއުޅެމުންދިޔަ ދިވެހި ދެ އާއިލާއަކަށް ބޭނުންވާ އެހީތެރިކަން ފޯރުކޮށްދީ، ރައްކާތެރި ހޮޓަލަކަށް ބަދަލުކޮށްފައިވާ ކަމަށް ސަފީރު ވިދާޅުވިއެވެ.

ސަފީރު ވިދާޅުވީ މި ދެ އާއިލާގެ ހާލަތުވެސް ލަންކާގައި ހުންނަ ރާއްޖޭގެ އެމްބަސީން ވަރަށް ގާތުން ބަލަމުންދާ ކަމަށެވެ. އަދި ލަންކާގައި ދިރިއުޅޭ ދިވެހިންގެ ހާލު ބަލައި، ބޭނުންވާ އެހީތެރިކަން ފޯރުކޮށްދިނުމަށް އެމްބަސީން ހޮޓްލައިން ގާއިމުކޮށް، 24 ގަޑިއިރު ޚިދުމަތް ދެމުންދާ ކަމަށްވެސް އެމަނިކުފާނު ހާމަކުރެއްވިއެވެ.

އަޅުގަނޑުމެންގެ ސްޓޭންޑްބައި ޓީމަކުން މިހާރުވެސް މަސައްކަތް ކުރަމުންދަނީ ކޮންސިއުލަރގައި. ރީޗްއައުޓް ކުރަމުންމިދަނީ ދިވެހިންނަށް އެއްވެސް ކަމެއް ބޭނުންވެއްޖެއްޔާ އަޅުގަނޑުމެން ވަގުތުން ޓްރާންސްޕޯޓް ފޮނުވައިގެން އެމީހުންނަށް ހެލްޕުކޮށްދޭނެ. ފެންބޮޑުވެފައި ހުރި އެއްތަނަކުން ދެ ފެމިލީ ރެސްކިއު ކުރެވިއްޖެ. އެ ބޭފުޅުން ހޮޓަލަށް ލައިދީ، ސޭފްތޯ އެބަ ބަލަން،

ލަންކާއަށް ރާއްޖޭން ކަނޑައަޅުއްވާފައި ހުންނަވާ ސަފީރު 

ވިއްސާރައާ ގުޅިގެން ކޮލަމްބޯ އެއަރޕޯޓުގައި ދަތުރުފަތުރަށް ދަތިތަކެއް ދިމާވަމުންދާކަން ފާހަގަކުރައްވައި، ސަފީރު ވަނީ ކުރިއަށް އޮތް 5 ދުވަހު ދަތުރުކުރާ ފަރާތްތަކުން އެ އެއަރޕޯޓުގައި ޓްރާންސިޓް ނުވާގޮތަށް ދަތުރުކުރުމަށް އިލްތިމާސްކުރައްވާފައެވެ. އަދި ލަންކާގައި ދިރިއުޅޭ ނުވަތަ އެ ގައުމަށް ދަތުރުކުރާ ދިވެހިންނަށް އެއްވެސް އެހީތެރިކަމެއް ބޭނުންވާނަމަ، އެމްބަސީގެ ހޮޓްލައިން ނަންބަރު  އަށް ގުޅުމަށް އެމަނިކުފާނު އިލްތިމާސްކުރެއްވިއެވެ.