ސިލޯނަށް އެހީވުމަށް އަތޮޅުތަކުން އެހީ ހޯދުމަށް ސަރުކާރުން މަސައްކަތް ފަށައިފި

ތޫފާން ދިތުވާގެ ސަބަބުން ސްރީލަންކާއަށް ލިބުނު ބޮޑެތި ގެއްލުންތަކަށް އެހީވުމަށް، ރާއްޖޭގެ ފަރާތުން ކުރިއަށް ގެންދާ "ސިލޯނާ އެކު ދިވެހީން" ޓެލެތޯނަށް އަތޮޅުތަކުން އެހީ ހޯދުމަށް ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާއިބެހޭ ވުޒާރާއިން ކައުންސިލްތަކާއި ގުޅިގެން މަސައްކަތް ކުރަމުންދާ ކަމަށް ވިދާޅުވެއްޖެއެވެ. މި ޓެލެތޯން، ޕީއެސްއެމްއިން ރާއްޖޭގެ މީޑިއާތަކާ ގުޅިގެން ކުރިއަށްގެންދާއިރު، ދައުލަތުގެ އިދާރާތަކާއި، ކުންފުނިތަކާއި، އަމިއްލަ ފަރާތްތަކުން ވެސް ދަނީ އެހީތެރިކަން ފޯރުކޮށްދެމުންނެވެ.

ވުޒާރާއިން ހާމަކުރެއްވި ގޮތުގައި، ކައުންސިލްތަކާ ގުޅިގެން މަސައްކަތް ކުރުމުގެ އިތުރުން، ވުޒާރާގެ ތެރެއިން ވެސް އެހީ ހޯދުމަށް މަސައްކަތް ކުރެވެމުންދެއެވެ. މި މަސައްކަތުގެ ތެރެއިން، ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާއިބެހޭ ވުޒާރާގެ މައިގަނޑު ދައުރަކީ، ކައުންސިލްތަކަށް މިކަމާ ގުޅޭ ފުރިހަމަ މައުލޫމާތު ފޯރުކޮށްދިނުމެވެ.

"ސިލޯނާ އެކު ދިވެހީން" ޓެލެތޯނުގައި ވާހަކަފުޅު ދައްކަވަމުން އެ ވުޒާރާގެ ސްޓޭޓް މިނިސްޓަރ މުޙައްމަދު އިބްރާހިމް ވިދާޅުވީ، ރާއްޖޭގެ 7 ސަރަހައްދެއްގައި ވުޒާރާގެ ދަށުން ހިންގާ ޕަބްލިކް ވޯކްސް ޔުނިޓްތަކުގެ މުވައްޒަފުންނާއި، މާލެއާއި އަތޮޅުތަކުގެ މުވައްޒަފުން އަދި ބިދޭސީ މުވައްޒަފުންގެ އެއްބާރުލުމާއެކު އެހީ ފޯރުކޮށްދިނުމަށް މިހާރު މަސައްކަތް ކުރަމުންދާ ކަމަށެވެ. މީގެ އިތުރުން، ކައުންސިލްތަކާ ގުޅިގެން މަސައްކަތް ކުރުމަށް ވުޒާރާއިން 7 ކްލަސްޓަރއަކަށް ބަހާލައިގެން މަސައްކަތް ކުރާއިރު، ކޮންމެ އަތޮޅެއްގައި ވެސް ކަންކަން އިންތިޒާމު ކުރުމަށް ވެރިއަކު ހުންނަވާ ކަމަށް ސްޓޭޓް މިނިސްޓަރ ފާހަގަކުރެއްވިއެވެ. މި ފަރާތްތައް މެދުވެރިކޮށް، ކައުންސިލްތަކާއެކު ރައްޔިތުން ހޭލުންތެރި ކުރުމަށް މަސައްކަތްތަކެއް ކުރަމުންދާ ކަމަށް ވެސް ވުޒާރާއިން ބުނެއެވެ.

އަޅުގަނޑުމެން މިވަގުތު ޤަބޫލުކުރަންޖެހޭ، އަޅުގަނޑުމެން ދަތި ހާލަތެއް ދިމާވިއިރު އަޅުގަނޑުމެން އަވަށްޓެރި ޤައުމުތަކުން ވަރަށް ދީލަތި އެހީތެރިކަން ލިބުނު. މިއަދު އެފަދަ ޤައުމަކަށް އެހީ ބޭނުންވާ ހިނދު މިއަދު އެހީދީ ޢާންމު ހާލަތައް އާދެވޭނެ ގޮތަށް މަސައްކަތް ކުރަންޖެހޭ. މާލޭގައި މިކުރާ މަސައްކަތާއި އެއްގޮތަށް ރާއްޖޭގެ ކަންކޮޅުތަކުން ތަރުޙީބު ލިބިގެން ރަނގަޅު އެއްޗެއް ދެވޭނެ ކަމަށް އުއްމީދު ކުރަން

ސްޓޭޓް މިނިސްޓަރ އިބްރާހިމް 

މި މަސައްކަތްތައް ކުރިއަށްދާ ގޮތުގެ ތަފްސީލް ދެއްވަމުން ވުޒާރާގެ ޕާމަނެންޓް ސެކެރެޓަރީ މޫމިނާ ވަޙީދު ވިދާޅުވީ، އެ ވުޒާރާއިން އެއްކުރަމުން ދަނީ އެ ވުޒާރާގެ އެހީތައް އެކަނި ކަމަށެވެ. ކައުންސިލްތަކަށް މައުލޫމާތު ފޯރުކޮށްދީ، މިކަމުގެ މުހިންމުކަން އަންގައިދިނުމުން، ކައުންސިލްތަކުން ދޭ އެހީތައް އެ ކައުންސިލަކުން އަމިއްލައަށް ވަކިން ދޭނެ ކަމަށް ވެސް އޭނާ ވިދާޅުވިއެވެ. މައުލޫމާތު ދިނުމުގައި ދެ ކަމަކަށް އިސްކަންދެވޭ ކަމަށް މޫމިނާ ފާހަގަކުރެއްވިއެވެ. އެއީ، ލަންކާގެ ހާލަތުގެ މުހިންމުކަން ބަޔާންކޮށްދިނުމާއި، އެހީވުމުގެ އުސޫލުތައް ހިއްސާކުރުމެވެ.

ވުޒާރާއިން ވިދާޅުވީ، އެ އިދާރާގެ މުވައްޒަފުންގެ ފަރާތުން މި ޓެލެތޯނަށް ދޭ އެހީ މިރޭގެ ވަގުތެއްގައި ފޯރުކޮށްދެވޭނެ ކަމަށެވެ. އަދި ކައުންސިލްތަކާއި ގުޅިގެން ކުރާ މަސައްކަތުން ރަނގަޅު އަދަދެއްގެ އެހީ ފޯރުކޮށްދެވޭނެ ކަމުގެ އުއްމީދު ބޮޑު ކަމަށް ވެސް ވުޒާރާއިން ބުނެއެވެ.