"ސިލޯނާއެކު ދިވެހީން" ޓެލެތޯނަށް 29 ގަޑިއިރުގެ ތެރޭގައި 10.7 މިލިޔަނަށްވުރެ ގިނަ ރުފިޔާ!

ސްރީލަންކާއަށް ކުރިމަތިވެފައިވާ ކާރިސާގައި އެހީތެރިކަން ފޯރުކޮށްދިނުމަށް ކުރިއަށްގެންދާ "ސިލޯނާއެކު ދިވެހީން" ޓެލެތޯނަށް 29 ގަޑިއިރުގެ ތެރޭގައި 10.7 މިލިޔަނަށްވުރެ ގިނަ ރުފިޔާގެ އެހީ ލިބިއްޖެއެވެ.

އާދިއްތަ ދުވަހުގެ ހެނދުނު 9:00 ޖެހިއިރު ފެށި މި ޓެލެތޯން މިއަދުގެ މެންދުރު 2:00 ޖެހުމާއި ހަމައަށް ކުރިއަށްދާއިރު، މި ޓެލެތޯންގައި 37 މީޑިއާއަކުން ވަނީ ބައިވެރިވެފައެވެ.

ބީއެމްއެލްއިން މި ޓެލެތޯންއަށް ޚާއްޞަކޮށްފައިވާ ދިވެހި ރުފިޔާ އެކައުންޓަށް، ހޯމަ ދުވަހުގެ (މިއަދު) މެންދުރު 14:00 ޖެހުމާއި ހަމައަށް ޖުމްލަ 10,722,660 ރުފިޔާ ވަނީ ލިބިފައެވެ. މި ޢަދަދުގެ ތެރޭގައި ހިމެނެނީ 10،049،870 ރުފިޔާ އަދި 43،631 ޑޮލަރެވެ.

#CeylonaaEkuDhiveheen pic.twitter.com/ivMHft6Fg9

— PSM News (@psmnewsmv) November 30, 2025

މީޑިއާ ޓެލެތޯންއަށް އެހީތެރިވާން ބޭނުންވާ ފަރާތްތަކުން ބީއެމްއެލްގެ އެކައުންޓްތަކަށް ފައިސާ ޖަމާކުރުމުގެ އިތުރުން، ޓީވީ ބިލްޑިންގއާއި މާލޭގެ އެކި ސަރަޙައްދުތަކުގައި ބަހައްޓާފައިވާ ފޮށިތަކަށް ވެސް އެހީތެރިކަން ފޯރުކޮށްދިނުމުގެ ފުރުޞަތު ހުޅުވާލާފައިވާއިރު، ސްރީލަންކާއަށް މިމަހުގެ 26 ވަނަ ދުވަހު ކުރިމަތިވި ތޫފާން ޑިތުވާއާ ގުޅިގެން އެޤައުމު ވަނީ ކާރިސާގެ ޙާލަތުގައެވެ.

ސްރީލަންކާއަކީ ޒަމާނުއްސުރެ ދިވެހިރާއްޖެއާ ނުހަނު ގާތް ރަޙުމަތްތެރި ޤައުމެކެވެ. އަދި އެޤައުމުގެ ރައްޔިތުންނަކީ ދިވެހިންނާ ވަރަށް ގާތް ގުޅުންތަކެއް ބާއްވާ އެކުވެރި ބަޔެކެވެ. ރާއްޖޭން ބޭރުގައި އެންމެ ގިނަ ދިވެހިން ދިރިއުޅެމުން އަންނަ އެއް ޤައުމަކީވެ ސް އަވަށްޓެރި އެކުވެރި ސްރީލަންކާއެވެ.