ހުޅުމާލެ ފޭސް ތިނެއްގެ 40 ހެކްޓަރުގެ ބިން ހިއްކާ ނިންމާލައިފި

ހުޅުމާލެ ފޭސް ތިނެއް ހިއްކުމުގެ މަޝްރޫޢު ހަލުވިކަމާއެކު ކުރިއަށްދާއިރު، މިހާތަނަށް 40 ހެކްޓަރުގެ ބިން ހިއްކާ ނިމިފައިވާ ކަމަށް މޯލްޑިވްސް އެއަރޕޯޓްސް ކޮމްޕެނީ، އެމްއޭސީއެލްއިން ވިދާޅުވެއްޖެއެވެ.

މޯލްޑިވްސް އެއަރޕޯޓްސް ކޮމްޕެނީއިން ވިދާޅުވީ، މި މަސައްކަތް މިހާ ހަލުވިކަމާއެކު ކުރިއަށް ގެންދެވޭ މައިގަނޑު ސަބަބަކީ މަސައްކަތަށް ދެ ޑްރެޖަރު ބޭނުންކުރަމުން ދިއުން ކަމަށެވެ.

އެމްއޭސީއެލް އިން ވިދާޅުވީ، ހުޅުމާލެ ފޭސް 3 ގެ ބިން ހިއްކުމުގެ މަޝްރޫޢު އަވަސްކުރުމަށް ގެނައި ދެ ޑްރެޖަރާއިއެކު މަސައްކަތް ހަލުވިކަމާއެކު ކުރިއަށްދާއިރު، ޖުމްލަ 63 ހެކްޓަރުގެ ބިން ހިއްކުމަށް ހަމަޖެހިފައިވާ މި މަޝްރޫޢުގެ ތެރެއިން 40 ހެކްޓަރުގެ ބޮޑު ސަރަޙައްދެއްގެ ބިން ހިއްކާ ނިމިފައިވާ ކަމަށެވެ. މިއާއެކު، މި މަޝްރޫޢުގެ 63.5 އިންސައްތަ މަސައްކަތް މިހާރު ވަނީ ނިމިފައެވެ. ބިންހިއްކުމަށް ބޭނުންކުރާ ދެ ޑްރެޖަރު ރާއްޖެ އައިސްފައިވަނީ މިދިޔަ މަހުގެ ފަހުކޮޅުގައެވެ.

Hulhumalé Phase 3 Land Reclamation Project Update:
A total of 40 hectares of land has been reclaimed, achieving 63.5% progress to date. Reclamation works are ongoing, with dredgers PRINS DER NEDERLANDEN and ORANJE, each with a capacity of 22,000 CBM, currently in operation. pic.twitter.com/BTGIvFUbEV

— Maldives Airports Company Ltd (@MACLmedia) December 21, 2025

ހުޅުމާލެ ފޭސް 3 ހިއްކުމުގެ މަޝްރޫޢު ފުރަތަމަ ފެށީ 2024 ވަނަ އަހަރުގެ ސެޕްޓެމްބަރު މަހު ފުރަތަމަ ދުވަހުއެވެ. ނަމަވެސް، ހުޅުމާލޭގެ މާސްޓާ ޕްލޭން ރިވައިޒް ކުރުމުގެ މަސައްކަތް ކުރިއަށްދާތީ، އެ މަޝްރޫޢަށް ވަނީ ވަޤުތީގޮތުން މަޑުޖެހުމެއް އައިސްފައެވެ. މަސައްކަތް މަޑުޖެހިފައި އޮތުމަށްފަހު، ބާކީ ހުރި ބިންތައް ހިއްކުމުގެ މަސައްކަތް އަލުން ފަށާފައިވަނީ ނޮވެމްބަރު 10 ވަނަ ދުވަހު ހަވީރެވެ.

ހުޅުމާލޭ ތިންވަނަ ފިޔަވައްސާއި ގިރާވަރު، ގުޅީފަޅު އަދި އުތުރުތިލަފަޅު ހިއްކުމުގެ މަޝްރޫޢަކީ މާލޭ ސަރަޙައްދުގައި ދިރިއުޅޭ ފަރާތްތަކަށް ދިމާވެފައިވާ ބޯހިޔާވަހިކަމުގެ މައްސަލައަށް ޙައްލު ހޯދައިދިނުމަށް ސަރުކާރުން ކުރިއަށްގެންދާ ބޮޑު މަޝްރޫޢެކެވެ. ސަރުކާރުން ވަނީ މި މަސައްކަތް އަވަހަށް ނިންމައި، ބޯހިޔާވަހިކަމުގެ ފުރުޞަތު ވީހާވެސް ގިނަ ރައްޔިތުންނަށް ހޯދައިދިނުމަށް މަސައްކަތް ކުރަމުންދާ ކަމަށް ވިދާޅުވެފައެވެ.