ދިވެހިރާއްޖެ އާއި އަބޫދާބީ އާ ދެމެދު މާލީ ރަޖިސްޓްރީ ހިންގުން ހަރުދަނާކުރުމަށް އެމްއޯޔޫއެއްގައި ސޮއިކޮށްފި

ދިވެހިރާއްޖޭގެ އިޤްތިޞާދީ ތަރައްޤީއާއި ވިޔަފާރިއާބެހޭ ވުޒާރާއިން ވަނީ އަބޫދާބީ ގްލޯބަލް މާކެޓް (އޭޑީޖީއެމް) ރަޖިސްޓްރޭޝަން އޮތޯރިޓީއާއެކު ރާއްޖޭގެ ރަޖިސްޓްރީ ހިންގުން ހަރުދަނާކުރުމަށް އެއްބަސްވުމެއްގައި ސޮއިކޮށްފައެވެ. މި އިސްތިރާޖީ ބައިވެރިވުމަކީ ދިވެހިރާއްޖޭގެ އިންޓަރނޭޝަނަލް ފައިނޭންޝަލް ސެންޓަރުގެ ކުރިއެރުމަށް އެހީތެރިވެދޭނެ ކަމެއް ކަމަށާއި، އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިޤްތިޞާދީ ތަރައްޤީގެ ވިސްނުމާ އެއްގޮތްވާ ކަމެއްކަމުގައި ވަނީ ހާމަކޮށްފައެވެ.

މި އެމްއޯޔޫގައި ސޮއިކުރެވުނީ އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު އޮނަރަބަލް މުޙައްމަދު ސަޢީދާއި އޭޑީޖީއެމް ރަޖިސްޓްރޭޝަން އޮތޯރިޓީގެ ސީއީއޯ މިސްޓަރ ހަމަދު ސަޔާހް އަލްމަޒްރޫޢީ ބައިވެރިވެވަޑައިގެންނެވި ރަސްމިއްޔާތެއްގައެވެ.

އޭޑީޖީއެމްއާއެކު މި ވެވުނު އެއްބަސްވުމަކީ ދިވެހިރާއްޖެ ސަރަޙައްދީ މާލީ މަރުކަޒަކަށް ހެދުމުގެ މަގުގައި އެޅުނު މުހިންމު ފިޔަވަޅެކެވެ. އޭޑީޖީއެމްގެ ރެގިއުލޭޓަރީ އަދި އޮޕަރޭޝަނަލް ތަޖުރިބާގެ ބުރިބާގެ ބޭނުން ހިފައިގެން، އަޅުގަނޑުމެން މިދަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިޤްތިޞާދީ ތަރައްޤީގެ ލަނޑުދަނޑިތަކާ އެއްގޮތްވާ ގޮތުގެ މަތިން، ބައިނަލްއަޤްވާމީ އިންވެސްޓްމަންޓްތައް ރާއްޖެއަށް ގެނައުމަށް މަގުފަހިކުރާ ބައިނަލްއަޤްވާމީ މާލީ މަރުކަޒެއްގެ ބިންގާ އަޅަމުން ކަމުގައި  ވިޔަފާރިއާބެހޭ ވަޒީރު އޮނަރަބަލް މުޙައްމަދު ސަޢީދް ވަނީ ވިދާޅުވެފައެވެ.

މި އެއްބަސްވުމުގެ ދަށުން ދެ ފަރާތުން އެއްބާރުލުން ދޭނެ މައިގަނޑު 5 ދާއިރާއެއް ފާހަގަކޮށްފައިވެއެވެ. އެއީ:

1. ޤާނޫނީ އަދި އިޖުރާއީ އޮނިގަނޑު: ރަޖިސްޓްރީ ހިންގުން ހަރުދަނާކުރުމަށް އޮނިގަނޑުތައް އެކުލަވާލުން.
2. ޤާބިލުކަން އިތުރުކުރުމުގެ ޕްރޮގްރާމްތައް: މުވައްޒަފުންގެ ހުނަރު އިތުރުކުރުމަށް ތަމްރީނު ޕްރޮގްރާމްތަކާއި މުވައްޒަފުން ބަދަލުކުރުން.
3. ހިންގުމުގެ މިންގަނޑުތައް: އެންމެ ރަނގަޅު އުސޫލުތައް ހިއްސާކޮށްގެން މިންގަނޑުތައް ރަނގަޅުކުރުން.
4. ބައިނަލްއަޤްވާމީ މަޢުލޫމާތު ބަދަލުކުރުން: ބައިނަލްއަޤްވާމީ މިންގަނޑުތަކާ އެއްގޮތްވާ ގޮތުގެ މަތިން މަޢުލޫމާތު ހިއްސާކުރުން.
5. ޓެކްނިކަލް އެހީތެރިކަން: ރަޖިސްޓްރީ ހިންގުމުގެ ހަރުދަނާކަން އިތުރުކުރުމަށް ޓެކްނިކަލް އެހީތެރިކަން ފޯރުކޮށްދިނުން.

މި އެއްބާރުލުމުގެ ސަބަބުން ދެމެހެއްޓެނިވި ގޮތެއްގައި މަޢުލޫމާތު ހިއްސާކުރުމާއި، އެކުގައި ތަމްރީނު ޕްރޮގްރާމްތައް ހިންގުމަށް މަގުފަހިވެގެންދާނެއެވެ. މީގެ މަޤްޞަދަކީ ދިވެހިރާއްޖޭގެ މާލީ ދާއިރާގެ ތަރައްޤީ އަވަސްކުރުމާއި، އަބޫދާބީއާއެކު އޮންނަ އިޤްތިޞާދީ ގުޅުން ބަދަހިކުރުމާއި، އަދި ބޭރުގެ އިންވެސްޓްމަންޓްތައް ރާއްޖެއަށް ގެނައުމެވެ.

މި އެއްބާރުލުމަކީ ދިވެހިރާއްޖެ ސަރަޙައްދުގެ އިސް މާލީ މަރުކަޒަކަށް ހެދުމުގެ މަސައްކަތުގައި ކުރިއަށް އެޅޭ މުހިންމު ފިޔަވަޅެއް ކަމުގައި ބެލެވެއެވެ.

މި އެއްބަސްވުމުގެ ސަބަބުން ރާއްޖޭގެ މާލީ ދާއިރާގެ ހިންގުންތެރިކަން އިތުރުވެ، ބައިނަލްއަޤްވާމީ މިންގަނޑުތަކާ އެއްގޮތަށް ރާއްޖޭގެ މާލީ ޚިދުމަތްތައް ތަރައްޤީވެގެންދާނެ ކަމަށް އުންމީދުކުރެވެއެވެ. އަދި މިކަމުގެ ސަބަބުން ރާއްޖެއަށް އިތުރު އިންވެސްޓްމަންޓްތައް ގެނައުމަށާއި، އިޤްތިޞާދީ ގޮތުން ރާއްޖެ ކުރިއެރުވުމަށް މަގުފަހިވެގެންދާނެއެވެ.