ބަރުދަން ލުއިކުރުމަށް ސޯޝަލް މީޑިއާގައި މަގުބޫލުވަމުންދާ "އޯޓްޒެމްޕިކް" ބުއިމަކީ ހަގީގަތުގައިވެސް ފައިދާހުރި ކަމެއްބާ؟

މިއަދުގެ ދުނިޔޭގައި ބަރުދަން ލުއިކުރުމަށް އަވަސް އަދި ފަސޭހަ ގޮތްތައް ހޯދުން ގިނަ ބައެއްގެ އާދައަކަށް ވެފައިވާއިރު، މި ދުވަސްވަރު ސޯޝަލް މީޑިއާގައި އެންމެ ގަދައަށް ދެކެވޭ އެއް ވާހަކައަކީ "އޯޓްޒެމްޕިކް" ނަމަކަށް ކިޔާ ބުއިމެއްގެ ވާހަކައެވެ. ސޯޝަލް މީޑިއާގެ އެކި މަންސަތަކުގައި މި ބުއިން އިޝްތިހާރު ކުރަމުންދަނީ މަދު ދުވަސްކޮޅެއްގެ ތެރޭގައި ބަރުދަން ލުއިކޮށްދޭ ގުދުރަތީ ފަރުވާއެއްގެ ގޮތުގައެވެ.

"އޯޓްޒެމްޕިކް" މި ނަން ނަގާފައިވަނީ ހަކުރު ބަލީގެ ދެވަނަ ގިންތީގެ މީހުންނަށް ފަރުވާ ދިނުމަށް ބޭނުންކުރާ މަޝްހޫރު ބޭހެއް ކަމަށްވާ "އޮޒެމްޕިކް"  އަށް ނިސްބަތްކޮށެވެ. ސޯޝަލް މީޑިއާގައި ދައުރުވާ ވީޑިއޯތަކުން ދައްކާ ގޮތުގައި، މި ބުއިމަކީ ބަނޑުފުރިފައި ހުންނަ ކަމުގެ އިހުސާސް ގިނަވަގުތު ކުރުވައި، ބަރުދަން ލުއިކުރުމަށް ބޭނުންކުރާ ބޭސްތަކަށް އޮތް ގުދުރަތީ ބަދަލެކެވެ. ބައެއް މީހުން ދައުވާކުރާ ގޮތުގައި މި ބުއިން ބޭނުންކޮށްގެން އެންމެ ދެ މަސް ދުވަހުގެ ތެރޭގައި 18 ކިލޯ (40 ޕައުންޑް) ބަރުދަން ލުއިކުރެވިދާނެއެވެ.

"އޯޓްޒެމްޕިކް" އަކީ ކޮބާ؟
މި ބުއިން ތައްޔާރުކުރުމަކީ ވަރަށް ފަސޭހަ އަދި އަވަސް ކަމެކެވެ. މީގައި ހިމެނެނީ އޯޓްސް، ފެން އަދި ތާޒާ ލުނބޯ ހުތެވެ. މި ތަކެތި އެއްކޮށް ގްރައިންޑް ކޮށްލުމުން މި ބުއިން ތައްޔާރުކޮށްލެވެއެވެ. އަދި ރަހަ މީރުކުރުމަށްޓަކައި ބައެއް މީހުން ފޮނިތޮށި ނުވަތަ ކުޑަ މާމުއިކޮޅެއް މީގެ ތެރެއަށް އެއްކުރެއެވެ.

މީގައިވާ ސިއްހީ ހަގީގަތަކީ ކޮބާ؟

ކާނާއާ ބެހޭ ދިރާސާތަކުން ދައްކާ ގޮތުގައި އޯޓްސްގައި "ބީޓާ-ގްލޫކަން"  ކިޔާ ފައިބަރުގެ ބާވަތެއް ހިމެނެއެވެ. މިއީ ހަޖަމުކުރުން ލަސްކޮށްދީ، ގިނަ އިރުވަންދެން ބަނޑުފުރިފައި ހުރި ކަމުގެ އިހުސާސް ކޮށްދޭ މާއްދާއެކެވެ. "ޔޫރަޕިއަން ޖާނަލް އޮފް ކްލިނިކަލް ނިއުޓްރިޝަން" ގައި ޝާއިއުކޮށްފައިވާ ދިރާސާއަކުން ދައްކާ ގޮތުގައި ހެނދުނުގެ ނާސްތާގައި އޯޓްސް ބޭނުންކުރާ މީހުންނަށް، އެހެން ގޮދަނުގެ ބާވަތްތައް ބޭނުންކުރާ މީހުންނަށްވުރެ ބަނޑުހައިވުން ކުޑައެވެ.

މީގެ އިތުރުން ލުނބޯ ހުތަކީ ވިޓަމިން ސީ އާއި އެންޓިއޮކްސިޑެންޓްސް އިން މުއްސަނދި އެއްޗެކެވެ. ނަމަވެސް ބަރުދަން ލުއިކުރުމުގައި ލުނބޯ ހުތުގެ ދައުރަކީ ވަރަށް މަދު މިންވަރެއްގެ ކަމެއް ކަމަށް މާހިރުން ފާހަގަކުރެއެވެ.

މާހިރުންގެ އިންޒާރު
ސޯޝަލް މީޑިއާގައި މި ބުއިން މަގުބޫލުވަމުން ދިޔަ ނަމަވެސް، ކާނާއާ ބެހޭ މާހިރުން މިކަމުގައި އިންޒާރުދެއެވެ. މި ބުއިމަކީ ހެނދުނުގެ ނާސްތާގެ ބަދަލުގައި ބޭނުންކުރާ އެއްޗެއް ކަމަށްވިޔަސް، ހަމައެކަނި މި ބުއިމަށް ބަރޯސާވުމަކީ ހަށިގަނޑަށް ބޭނުންވާ މުހިންމު އެހެނިހެން މާއްދާތަކުން މަހުރޫމުވެ، ސިއްހީ މައްސަލަތައް ކުރިމަތިވެދާނެ ކަމެއް ކަމަށް އެ ފަރާތްތަކުން ބުނެއެވެ. އެހެންކަމުން، ބަރުދަން ލުއިކުރުމުގައި މިފަދަ "ޓްރެންޑް" ތަކަށް އެކަނި ބަރޯސާނުވުމަށް މާހިރުން އިރުޝާދުދެއެވެ.