ރާއްޖޭގެ ފުރަތަމަ އެއާ ޓްރެފިކް ކޮންޓްރޯލަރ މުޙައްމަދު ނަޢީމް އަވަހާރަވެއްޖެ

ދިވެހިރާއްޖޭގެ މަދަނީ އުދުހުންތަކުގެ ތާރީޚުގައި ފާހަގަކޮށްލެވޭ މުހިންމު ޝަޚްޞިއްޔަތެއް ކަމަށްވާ، ރާއްޖޭގެ ފުރަތަމަ އެއާ ޓްރެފިކް ކޮންޓްރޯލަރ މުޙައްމަދު ނަޢީމް ޙުސެއިން އަވަހާރަވެއްޖެއެވެ. ނަޢީމް އަވަހާރަވީ އުމުރުފުޅުން 74 އަހަރުގައެވެ.

ނަޢީމް އަވަހާރަވުމާ ގުޅިގެން ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވަނީ  ހިތާމަ ފާޅުކުރައްވާފައެވެ. ވަޒީރު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ރާއްޖޭގެ އެވިއޭޝަން ސިނާޢަތަށް ނަޢީމް ކޮށްދެއްވި އަގުހުރި މަސައްކަތްޕުޅުތަކުގެ ހަނދާން ދިވެހި ތާރީޚުގެ ސަފްޙާތަކުގައި ތާއަބަދު ފެންނަން ހުންނާނެ ކަމަށެވެ.

މީގެ އިތުރުން މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ނެރުނު ތަޢުޒިޔާގެ މެސެޖެއްގައި ބުނެފައިވަނީ، ނަޢީމްގެ ވަކިވެދިޔުމަކީ ރާއްޖޭގެ އޭވިއޭޝަން ސިނާޢަތަށް ލިބުނު ފޫނުބެއްދޭނެ ބޮޑު ގެއްލުމެއް ކަމަށެވެ. އަދި ނަޢީމްގެ ހަނދާންތައް އެ ސިނާޢަތުން އަބަދުވެސް އައުކުރާނީ ނުހަނު ޝުކުރުވެރިކަމާ އެކުގައި ކަމަށްވެސް އެ ކުންފުނިން ފާހަގަކޮށްފައިވެއެވެ.

We are deeply saddened to learn of the passing of Mr. Mohamed Naeem Hussain, the first Air Traffic Controller of the Maldives. His passing is a great loss to the aviation community, and he will be remembered with respect and gratitude for his contributions.

May Allah (SWT) grant… pic.twitter.com/wpgBIQWoes

— Maldives Airports Company Ltd (@MACLmedia) January 13, 2026

މުޙައްމަދު ނަޢީމަކީ ވެލާނާ އިންޓަރނޭޝަނަލް އެއާޕޯޓު ރަސްމީކޮށް ހުޅުވުމަށްޓަކައި އެންމެ ފުރަތަމަ ތަމްރީންކޮށް، ޚިދުމަތަށް ނުކުންނެވި ބޭފުޅުންގެ ތެރޭގައި ހިމެނިވަޑައިގަންނަވާ ބޭފުޅެކެވެ. ރާއްޖޭގެ އެންމެ ފުރަތަމަ އެއާ ޓްރެފިކް ކޮންޓްރޯލަރގެ މަޤާމު ފުރުއްވުމުގެ ޝަރަފު ހޯއްދަވާފައިވާ ނަޢީމަކީ، ދިވެހި ސަރުކާރަށް ގިނަ ދުވަސްތަކެއް ވަންދެން އިޚްލާޞްތެރި ޚިދުމަތްތަކެއް ކުރައްވާފައިވާ ބޭފުޅެކެވެ.

ޚާއްޞަކޮށް ރާއްޖޭގެ އެވިއޭޝަން ސިނާޢަތް ތަރައްޤީކޮށް ކުރިއެރުވުމަށްޓަކައި އޭނާ ކުރެއްވި މަސައްކަތްޕުޅުތަކަކީ މިއަދުގެ ޒަމާނީ އުދުހުންތަކުގެ ބިންގާ އެޅުމުގައި ވަރަށް މުހިންމު ދައުރެއް އަދާކުރި މަސައްކަތްތަކެކެވެ.