ބަނޑަށް އުނދަގޫވުމާއި ލޮނުގެ ނުފޫޒު: ސިއްހަތަށް ހުރި ނުރައްކަލެއް

ގިނަ ފަހަރަށް މާ ގިނައިން ކެވޭހެން ހީނުވިޔަސް، ބަނޑު ފުރިފައި ހުންނަ އިހުސާސްވުމާއި، ބަނޑު ހަރުވެފައި ހުރުމަކީ އަހަރެމެންގެ ތެރެއިން ގިނަ ބަޔަކަށް ދިމާވާ އުނދަގޫ ކަމެކެވެ. މިގޮތަށް ބަނޑުފޮއްސިވުން ނުވަތަ 'ބްލޯޓިންގް' ދިމާވާން މެދުވެރިވާ އެންމެ އާންމު އެއް ސަބަބަކީ ކެއުމުގައި ހިމެނޭ ލޮނުގެ މިންވަރު އިތުރުވުމެވެ.

ލޮނަކީ ހަށިގަނޑަށް ކޮންމެހެން ބޭނުންތެރި މާއްދާއެއް ނަމަވެސް، ގިނަ މީހުންނަށް ނޭނގި ނަމަވެސް ބޭނުންވާ ވަރަށް ވުރެ އިތުރަށް ލޮނު ކެެވެއެވެ. ވަކިން ހާއްސަކޮށް، ބަންދުކޮށްފައި ހުންނަ ތައްޔާރީ ކާނާގެ ބާވަތްތަކުގައި ނުހަނު ގިނަ އަދަދަކަށް ލޮނު ހުރެއެވެ. މިފަދަ ތަކެތި ގަވާއިދުން ކެއުމުގެ ސަބަބުން ހަށިގަނޑަށް އެތެރެވާ ލޮނުގެ މިންވަރު އިންތިހާއަށް އިތުރުވެގެންދެއެވެ.

ލޮނުގެ ސަބަބުން ބަނޑުފޮއްސިވަނީ ކިހިނެއް ހެއްޔެވެ؟ ހަށިގަނޑަށް މާ ގިނައިން ލޮނު (ސޯޑިއަމް) އެތެރެވުމުން، ހަށިގަނޑުގެ ސެލްތަކުގައި އިތުރަށް ފެން ހިފަހައްޓައެވެ. މިގޮތަށް ފެން ހިފެހެއްޓުމުގެ ނަތީޖާއެއްގެ ގޮތުން ބަނޑު ފުފި، އުނދަގޫތައް ކުރިމަތިވެއެވެ. 2019 ވަނަ އަހަރު ކުރެވުނު ދިރާސާއަކުން ދައްކާގޮތުގައި، މީހަކު ކަނީ ކޮންމެ ކަހަލަ ކާނާއެއް ކަމުގައި ވީނަމަވެސް، ލޮނު ގިނަ ނަމަ ބަނޑުފޮއްސިވުމުގެ ފުރުސަތު ބޮޑެވެ. މި ދިރާސާގައި ހުޅަނގުގެ ކާނާ ކާ މީހުންނާއި ފައިބަރު ގިނަ ކާނާ ކާ މީހުން ބައިވެރިކުރެވުނު އިރު، ދެ ގްރޫޕަށް ވެސް ލޮނު ގިނަވުމުން ބަނޑަށް އުނދަގޫތައް ކުރިމަތިވިއެވެ.

އެމެރިކަން ހާޓް އެސޯސިއޭޝަނުން އިރުޝާދުދޭ ގޮތުގައި، ދުވާލެއްގެ މައްޗަށް ބޭނުންކުރަންވާނީ 2،300 މިލިގްރާމަށް ވުރެ މަދު ލޮނެވެ. މިއީ ގާތްގަނޑަކަށް އެންމެ ސައިސަމުސަލެއްގެ ލޮނެވެ.

ލޮނު ގިނަވުމަކީ ހަމައެކަނި ބަނޑަށް އުނދަގޫވާ ކަމެއް ނޫނެވެ. މީގެ ސަބަބުން ސިއްހީ ގިނަ ނުރައްކާތަކެއް ކުރިމަތިވެއެވެ. އޭގެ ތެރޭގައި:

• ލޭގެ   ޕްރެޝަރު މަތިވުން.
  
• ހިތުގެ ބަލިތަކާއި، ހާޓް އެޓޭކް އަދި ސްޓްރޯކް ޖެހުމުގެ ފުރުސަތު އިތުރުވުން.
  
• ކިޑްނީގެ މައްސަލަތައް ކުރިމަތިވުން.
  
• ކަށިތައް ބަލިކަށިވުން.
  
• ބަނޑުގެ ކެންސަރަށް މަގުފަހިވުން.

މާ ގިނައިން ނުކައި ހުއްޓާވެސް ބަނޑަށް އުނދަގޫވާނަމަ، ތިމާގެ ކެއުމުގައި ލޮނު ހިމެނޭ މިންވަރަށް ސަމާލުކަން ދޭންޖެހެއެވެ. ބަންދުކުރި ކާނާގެ ބަދަލުގައި ތާޒާ މޭވާއާއި ތަރުކާރީ ބޭނުންކުރުމަކީ ބަނޑުގެ ހަޖަމުކުރުމުގެ ނިޒާމަށާއި މުޅި ހަށިގަނޑުގެ ދުޅަހެޔޮކަމަށް ލިބޭނެ ބޮޑު ކުރިއެރުމެކެވެ.